စိုင်းခွမ်မိန်း၊ ၂၀၂၃ ဒီဇင်ဘာလ ၂၀ ရက်
သျှမ်းပြည် နမ့်ဆန်မြို့နယ်တွင် တအာင်းအမျိုးသား လွတ်မြောက်ရေးတပ်မတော် (TNLA)က မြို့သိမ်းတိုက်ပွဲဆင်နွှဲခဲ့သည့် တစ်ပတ်အတွင်း အရပ်သား ၈ ဦးထက်မနည်း သေဆုံးခဲ့ကြောင်း စုံစမ်းသိရသည်။
ဒီဇင်ဘာလ ၁၀ ရက်မှ ၁၆ ရက်နေ့အထိ TNLA တပ်ဖွဲ့၏ နမ့်ဆန်မြို့သိမ်းတိုက်ပွဲ တစ်ပတ်အတွင်း စစ်ကောင်စီတပ်၏ လက်နက်ကြီးနှင့် လေကြောင်းဗုံးကြဲ တိုက်ခိုက်မှုကြောင့် အရပ်သား ၈ ဦးထက်မနည်း သေဆုံးပြီး ၁၀ ဦးကျော် ထိခိုက်ဒဏ်ရာ ရရှိခဲ့ကြောင်း တအာင်းအမျိုးသမီး အဖွဲ့အစည်း၏ မှတ်တမ်းများအရ သိရသည်။
“နမ့်ဆန်မြို့မှာ ဒီဇင်ဘာလ ၁၀ ရက်နေ့ကစပြီး တိုက်ပွဲစတာပေါ့နော်။ အဲ့ဒီတိုက်ပွဲဖြစ်ပွားနေတဲ့ အတောအတွင်းမှာဆိုရင် ကျမတို့ စာရင်းပြုစုထားတဲ့ စာရင်းအရဆိုရင် သေဆုံးတာက ၈ ဦးရှိတယ်။ ပြီးရင် နေအိမ်ကတော့ အလုံး ၈၀ ထက်မနည်း ထိခိုက်ပျက်စီးတာရှိတယ်။ ၁၀ ရက်နေ့ကနေ ၁၆ ရက်နေ့အထိ တိုက်ပွဲပြင်းထန်တဲ့ ကာလပေါ့”ဟု တအာင်းအမျိုးသမီးအဖွဲ့၏ ပြောရေးဆိုခွင့်ရှိသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဒီဇင်ဘာလ ၁၆ ရက် ညနေ ၄နာရီခွဲခန့်တွင် စစ်ကောင်စီတပ်က လေကြောင်းဖြင့် နမ့်ဆန်မြို့ပေါ်သို့ ဗုံးကြဲတိုက်ခိုက်ခဲ့ရာ နမ့်ဆန်ပြည်သူ့ဆေးရုံရှေ့သို့ ကျရောက်ပေါက်ကွဲခဲ့ကာ ဇယ်ဘန်ကောက်ရွာမှ အသက် ၁၈ နှစ်အရွယ်ရှိ မိုင်းအခို၊ ၂၂ နှစ်အရွယ်ရှိ မိုင်းစိုင်းစိုင်းနှင့် ၃၃ နှစ်အရွယ်ရှိ မောင်သန်းမောင်တို့ ၃ ဦးမှာ ပွဲချင်းပြီး သေဆုံးသွားခဲ့ပြီး ၁ ဦး ထိခိုက်ဒဏ်ရာရရှိကြောင်း တအာင်းအမျိုးသမီးအဖွဲ့က ဒီဇင်ဘာလ ၁၈ ရက်တွင် ထုတ်ပြန်ထားသည်။
“နမ့်ဆန်မှာ သေသွားတဲ့ ၃ ယောက်ကကျတော့ အဲ့ဒီနေ့တုန်းကတော့ အပြန်အလှန် တိုက်ပွဲဖြစ်ပွားနေတဲ့ အနေအထားတော့ ရှိတယ်။ အဲ့ဒီမှာက လက်နက်ကြီးကျပြီးမှ သေဆုံးတာလဲ ရှိသလို လေယာဉ်နဲ့ လာရောက်ဗုံးကြဲတိုက်ခိုက်တာကြောင့် သေတာလဲရှိတယ်။ အဲ့ဒီမှာ သေသွားတဲ့ ၃ ယောက်က တိုက်ပွဲကြားက လက်နက်ကြီးနဲ့ လေယာဉ်ဗုံးကြဲမှုကြောင့် သေဆုံးခဲ့တာ”ဟု တအာင်းအမျိုးသမီးအဖွဲ့မှ ၎င်းပြောရေးဆိုခွင့်ရှိသူက သျှမ်းသံတော်ဆင့်ကို ဆက်ပြောသည်။
အလားတူ ဒီဇင်ဘာလ ၁၂ ရက်ကလည်း စစ်ကောင်စီတပ်၏ လေကြောင်းဗုံးကြဲမှုကြောင့် နမ့်ဆန်မြို့ နမ္မဝေါရပ်ကွက်မှ အသက် ၃၃ နှစ် အရွယ်ရှိ ကိုဟိန်းလတ် ဆိုသူ သေဆုံးခဲ့ပြီး နေအိမ် ၇ လုံး မီးလောင်ပျက်စီးခဲ့ရကာ စစ်ဘေးရှောင်ရန် နေအိမ်မှထွက်ခွာမည့် အမျိုးသား ၂ ဦးကိုလည်း စစ်ကောင်စီတပ်သားများက သေနတ်ဖြင့် ပစ်သတ်ခဲ့ကြောင်း နမ့်ဆန်မြို့ ဒေသခံများထံမှ သိရသည်။
ထို့အပြင် ဒီဇင်ဘာလ ၁၄ ရက် ညသန်းခေါင်အချိန်တွင် စစ်ကောင်စီတပ်မှ နမ့်ဆန်မြို့နယ် ငွန်ဆိုင်းကျေးရွာအား လေကြောင်းဗုံးကြဲမှုကြောင့် အသက် ၇၀ ကျော်အရွယ် အဘိုးအိုတစ်ဦး မီးလောင်သေဆုံးခဲ့ပြီး စာသင်ကျောင်းနှင့် နေအိမ် ၁၀ လုံးထက်မနည်း မီးလောင်ပျက်စီးခဲ့သည်။
“၁၀၂၇ စစ်ဆင်ရေး” စတင်ခဲ့သည့် တစ်လခွဲကျော်ကာလအတွင်း နမ့်ဆန်မြို့နယ်တွင် စစ်ကောင်စီ၏ လက်နက်ကြီးနှင့် လေကြောင်းဗုံးကြဲမှုကြောင့် ကလေး ၃ ဦး အပါအဝင် စုစုပေါင်း ၁၂ ဦး သေဆုံးပြီး ၃၀ ဦးထက်မနည်း ထိခိုက်ဒဏ်ရာရရှိကာ ပြည်သူနေအိမ် ၁၀၀ နီးပါးခန့် ထိခိုက်ပျက်စီးခဲ့ရကြောင်း နမ့်ဆန်ဒေသခံများထံမှ သိရသည်။
