မြန်မာနိုင်ငံ နေရာအနှံ့အပြားတွင် စစ်ကောင်စီနှင့် တော်လှန်ရေးပူးပေါင်းတပ်ဖွဲ့တို့ နှစ်ဖက်ထိတွေ့တိုက်ပွဲ ပြင်းထန်လာသည့်နှင့်အမျှ နှစ်ဖက်ထိခိုက်သေဆုံးမှု အကျအဆုံးများလာစဉ်တွင် အပြန်အလှန် တပ်သားစု ပြုလုပ်လာနေကြောင်း တွေ့ရသည်။

လက်ရှိ သျှမ်းမြောက်ဒေသအတွင်း ဖြစ်ပေါ်နေသော “ ၁၀၂၇ စစ်ဆင်ရေး “ အပါအဝင် နေရာအနှံ့အပြား တိုက်ပွဲကြောင့် စစ်ကောင်စီဘက်မှ မြေပြင်စစ်ရေး ကျဆုံးမှု များလာပြီးနောက် စစ်မှုထမ်းဟောင်း ခေါ်ယူခြင်း၊ တပ်သားအသစ်စုဆောင်းခြင်း ပြုလုပ်နေသလို ကိုကန်းတပ်ဖွဲ့ MNDAA မှ ၎င်းထိန်းချုပ်ရာ ဒေသအတွင်း တပ်သားအသစ် စုဆောင်း နေကြောင်း တွေ့ရသည်။

ယခုတစ်ခါတွင် စစ်ကောင်စီဝါဒဖြန့် တယ်ရီဂရမ်မှ လူမှုကွန်ပေါ် စစ်တပ်ထောက်ခံသူများကို ကော့မန့်၊ မက်ဆင်ဂျာ Chat Box မှတစ်ဆင့် ဆက်သွယ်၍ တပ်သားအသစ်စုဆောင်းခိုင်းရန် လှုံ့ဆော်နေသည်။

Archive Link – https://archive.ph/YtiFK

ထို့ကြောင့် လူငယ်များအနေဖြင့် အထူးသတိပြုရန် လိုအပ်သည်။ လူမှုကွန်ရက်စာမျက်နှာပေါ်မှ ပျံ့နှံ့နေသော အကြောင်းအရာ၊ အလုပ်ခေါ်စာ အခွင့်အလမ်း စသည့်ဖြင့် အလုပ်မျိုးကို အလွယ်တကူ မယုံကြည်ကြရန် လိုအပ်သည်။

ယခုခေတ်ကာလ အခြေအနေ မကောင်းသည့်ကြားတွင် လူငယ်များကို မက်လုံးအမျိုးမျိုးပေးပြီး သွေးဆောင်ဖြားယောင်း လိမ်လည်မှုများ ရှိနေသည်။

မူရင်းလင့် – https://burmese.shannews.org/archives/35128

ထို့အပြင် စစ်ကောင်စီ ဝါဒဖြန့်ချယ်နယ်များသည် စစ်ရေးအတွက် ထောက်တိုင်တစ်ခု အဖြစ်အသုံးပြု နေကြောင်း၊ လှုမှုကွန်ရက်ပေါ်မှ တစ်ဆင့် စစ်တပ်ဝေဖန်သူများ၊ NUG နှင့် PDF ပတ်သက်သူများကို လိပ်စာဖော်ပြခြင်းဖြင့် ဖမ်းဆီးရန် လှုံ့ဆော်မှုကြောင့် ဖမ်းဆီးခံရသူများ ရှိနေသည်။

စစ်တပ်အာဏာသိမ်းချိန် ၂၀၂၂ ဖေဖော်ဝါရီလမှ ၂၀၂၃ စက်တင်ဘာလကုန် အထိ လှုမှုကွန်ရက်ပေါ်တွင် စစ်ကောင်စီကို ဆန့်ကျင်ဝေဖန်ပြီး လူထုလှုပ်ရှားမှုနှင့် နွေဦးတော်လှန်ရေး အဖွဲ့အစည်းများကို ထောက်ခံ အားပေးသည့် ရေးသားမှုများနှင့် ပြောဆိုဆက်သွယ်မှုများကြောင့် ဖမ်းဆီးခံရသူ ၁,၃၁၆ ဦး ရှိကြောင်း Data For Myanmarက အောက်တိုဘာလတွင် ထုတ်ပြန်ထားသည်။