သျှမ်းပြည်အတွင်းရှိ ခေတ်ကာလ အခြေအနေ မကောင်းသည့်ကြား အသက်မပြည့်သေးသည့် ကလေးငယ်များကို မက်လုံးအမျိုးမျိုးပေးပြီး လိမ်လည်ဖြားယောင်းနေကြောင်း စုံစမ်းသိရသည်။

ပြီးခဲ့သည့် မေလ ၂၇ ရက် နံနက်ပိုင်း ၁၀ နာရီဝန်းကျင် အောင်ပန်းမြို့ လှည်းရိုးရပ်ကွက်မှ နေအိမ်ကနေ ပျောက်ဆုံးသွားသည့် မောင်ဉက္ကာဆိုသူကို ၎င်းမိသားစုဝင်များက အဆင့်ဆင့်ချိတ်ဆက်ပြီး ရှာဖွေခဲ့ရာ မိုးကုတ်မြို့၌ ပြန်လည်တွေ့ရှိခဲ့သည်။

ဖြစ်စဉ်မှာ အသက် ၁၆ နှစ်အရွယ် မောင်ဉက္ကာ ကို အွန်လိုင်းပေါ်မှ မိုးကုတ်မြို့နေ အမျိုးသားတစ်ဦး နှင့် အပြန်အလှန် ချိတ်ဆက်ပြီး အလုပ်ရှာဖွေပေးခြင်း ကျောင်းထားပေးခြင်း နှင့် ခရီးထွက်ရမည် ဟုသည့် မက်လုံးပေးကာ ခေါ်ဆောင်သွားကြောင်း မောင်ဉက္ကာ၏ ဉီးလေးဖြစ်သူက ပြောသည်။

“သူ့ကို ဘယ်လိုခြေရာခံမိတုန်းဆိုတော့ အစက ပျောက်သွားတာ ဖုန်းလည်းပိတ်ထားတယ်။ ဒီကလေး ဘယ်မှ မသွားတတ်၊ မလာတတ် ကလေးလည်းဟုတ်တော့ ကျနော်တို့ ရှာဖို့က တော်တော်ခက်ခဲတယ်။ ရှာဖို့ ခက်ခဲတော့ အဲ့မှာသူ့အစ်မက သဲလွန်စလေးရမလားဆိုပြီး အဲ့ည မွှေနှောက်ပြီးရှာတော့ သူရဲ့ဖေ့ဘုတ် Password စာအုပ်ထဲမှာ တွေ့တယ်။ တွေ့တော့ မိုးကုတ်ကတစ်ယောက်နဲ့ အချိတ်ဆက်၊ အပြန်အလှန်စကားပြောတဲ့ဟာတွေ့တယ် “ ဟု ၎င်းဦးလေးက ပြောသည်။

မောင်ဉက္ကာသည် မေလ ၂၇ ရက် နံနက်ပိုင်း ၁၀ နာရီဝန်းကျင်တွင် ၎င်းနေအိမ်မှ ထွက်သွားပြီး ရဲထောက်ခံစာ၊ ရပ်ကွက်ထောက်ခံစာ နှင့် မန္တလေး ကားလက်မှတ်ကို ဖြတ်ယူပြီး မန္တလေးမြို့ရှိ အမည်မဖော်လို ဟိုတယ်တစ်ခု၌ ထိုမိုးကုတ်မြို့နေ အမျိုးသားတစ်ဦး နှင့်အတူ တစ်ညတည်းခဲ့ပြီးသည့်နောက် မိုးကုတ်မြို့ကို လိုင်းကားအဆင့်ဆင့်စီးပြီး သွားခဲ့သည်။

“မန္တလေးဟိုတယ်တစ်ခုမှာ သူတစ်ညတည်းခဲ့တယ်လို့ သတင်းရတော့ အဲ့ဟိုတယ်ဆီကို ဖုန်းဆက်မေးခဲ့တာ။ ပျောက်သွားကလေးနဲ့ ခေါ်သွားတဲ့သူရဲ့ ဓာတ်ပုံကို ပို့ပေးတယ်။ ဟိုဖက်ကလည်း ဟုတ်တယ်။ ဒီကလေးနဲ့ ဒီလူတစ်ယောက် မနေ့က ဟိုတယ်မှာလာတည်းသွားတယ်လို့ ပြောတယ်။ အဲ့ဆို ကျနော်တို့ကို ကူညီပေးပါ၊ ဒါ ရာဇဝတ်မြောက်တယ် အသက်မပြည့်သေးတဲ့ ကလေးကို ခေါ်သွားတာဆိုတော့ သူတို့ ဘယ်ကိုသွားသလဲ ဆိုပြီး အကူညီတောင်းခဲ့တယ် “ ဟု ၎င်း ဦးလေးက ဖြစ်ပျက်ခဲ့သည့် အကြောင်းကို ပြောသည်။

ထို မန္တလေးမြို့ရှိ ဟိုတယ်တစ်ခုမှတစ်ဆင့် မောင်ဉက္ကာ နှင့် ၎င်းကိုခေါ်ဆောင်သွားခဲ့သည့် အမျိုးသားတစ်ဦးသည် Taxi ကားစီးပြီး လိုင်းကား ထပ်မံစီးခဲ့ရာ မိုးကုတ်မြို့သို့ ရောက်ရှိသွားခဲ့ကြောင်း သိရသည်။

ပျောက်ဆုံးနေသူ မောင်ဉက္ကာကို ၎င်းမိသားစုဝင်များက ပြန်လည်ရှာဖွေတွေ့ရန်အတွက် အဆင့်ဆင့် ဖုန်းနံပါတ်တောင်းယူပြီး လိုက်လံစုံစမ်းခဲ့ရာ မိုးကုတ်မြို့တွင်း ရောက်ရှိနေသည့် မောင်ဉက္ကာကို နေရပ်လိပ်စာ အတိအကျ သိခဲ့သည်။

“အဲ့မှာ ကျနော်တို့လည်း အချိတ်အဆက် တဖြည်းဖြည်း နဲ့ ရလာတော့ မိုးကုတ်ကိုခေါ်သွားတဲ့ ကားသမား ဖုန်းနံပါတ် ထပ်ရနိုင်မလားတောင်းတယ်။ မိုးကုတ်မြို့ ဘယ်ရပ်ကွက်၊ ဘယ်လမ်း၊ အိမ်ခြံနံပါတ် ဘယ်လောက်ဆိုပြီး သူက အိမ်တိုင်ရာရောက် ပို့ပေးခဲ့တယ်လို့ ပြောတယ်။ ပို့ပေးခဲ့တဲ့ ရပ်ကွက်က ကျနော်တို့ရဲ့ အသိမိတ်ဆွေ တစ်ယောက်နေတဲ့ ရပ်ကွက်ဖြစ်တယ်။ အဲ့နေ့ ကျနော်တို့ မိတ်ဆွေကို အကူအညီ လှမ်းတောင်းခဲ့တယ် “ ဟု ၎င်းကထပ်လောင်းပြောသည်။

ယင်းကဲ့သို့ အကူအညီ လှမ်းတောင်းခဲ့သည့်အတွက် မေလ ၃၀ ရက်တွင် မောင်ဉက္ကာကို ပြန်လည်အဆက်သွယ် ရခဲ့ပြီး ၎င်း၏ မိသားစုဝင်များက သွားရောက်ခေါ်ယူခဲ့ကာ ယနေ့ ဇွန်လ ၅ ရက် မနက်ပိုင်းတွင် အိမ်ကို ပြန်လည် ခေါ်ယူနိုင်ခဲ့ကြောင်း သိရသည်။

အသက်မပြည့်သေးသည့် ကလေးငယ်တစ်ဦးကို ခေါ်ဆောင်သွားသည့် အမျိုးသားကိုတော့ တရားစွဲဆိုခြင်း တစ်စုံတစ်ရာ မရှိခဲ့ပေ။

အလားတူ မေလ ၁၅ ရက် တန့်ယန်းမြို့ ရပ်ကွက် ၁ အတွင်း နေထိုင်သည့် အသက် ၁၃ နှစ်အရွယ် အမျိုးသမီးငယ်တစ်ဦးနှင့်အတူ ၎င်း၏ သူငယ်ချင်း ၂ ဦးကို အသက် ၂၀ နှစ်အရွယ် အမျိုးသမီး လိမ်လည်ဖြားယောင်းခံရပြီး အဆိုပါ ကလေးငယ် ၃ ဦး အနက် အမျိုးသမီးငယ်တစ်ဦးကို မေလ ၂၀ ရက်မှာ “ဝ” UWSA တပ်ဖွဲ့ ထိန်းချုပ်သည့် မိုင်းပေါက်မြို့ ၌ ပြန်လည်တွေ့ရှိခဲ့သည်။

စစ်တပ်က အာဏာသိမ်းပြီးနောက်ပိုင်း မြန်မာနိုင်ငံတွင် လူပျောက်မှု မကြာခဏ ဖြစ်ပွားနေပြီး အဆိုပါ လူပျောက်မှု နောက်ကွယ်မှာ သတ်ဖြတ်ခံရခြင်း၊ လိမ်လည် ဖြားယောင်းခံရခြင်းကြောင့် နယ်စပ်ဒေသ လောက်ကိုင်၊ မိုင်းပေါက်မြို့တွင် လိမ်လည် ဖြားယောင်းခံနေရကြောင်း သိရသည်။