သျှမ်းပြည် မူဆယ်ခရိုင် ပန်ဆိုင်းမြို့တွင် စစ်ကောင်စီနှင့် ညီနောင်မဟာမိတ်တပ်ဖွဲ့ဝင် ကိုးကန့်တပ်ဖွဲ့ (MNDAA)တို့ တိုက်ပွဲဖြစ်ပြီး ပြည်သူများ နေရပ်မှ စွန့်ခွာခဲ့ရာ လက်ရှိ လူမနေတော့သည့် နေအိမ်များကို ချိတ်ပိတ်သိမ်းသွားမည်ဟု MNDAA က ကြေညာလိုက်ကြောင်း စုံစမ်းသိရသည်။
ယခုရက်ပိုင်းအတွင်း ပန်ဆိုင်းမြို့အတွင်း MNDAAထံ သန်းခေါင်စာရင်းလာမပေးသူ၊ နေအိမ်တွင် ပြန်မလာနေသူများကို လူမနေသည့် အိမ်အဖြစ်သတ်မှတ်ပြီး ချိတ်ပိတ်ကာ ပိုင်ဆိုင်မှု အားလုံးသိမ်းဆည်း သွားမည်ဟု MNDAA က ပန်ဆိုင်းမြို့ပေါ်နေ ဒေသခံပြည်သူများကို ပြောဆိုခဲ့ကြောင်း သိရသည်။
“သူတို့က လူမနေတဲ့ အိမ်တွေ၊လူနေပြီး စာရင်းလာမပေးတဲ့ အိမ်တွေကို ချိတ်ပိတ်ပြီး သိမ်းမယ်လို့ အဲ့ ရပ်ကွက်လူကြီးတွေကိုတဆင့်ပြန် ပြောခိုင်းတာပါ။ ဒီလိုရပ်ကွက်တွေမှာ လိုက်ပြောနေတာ ၂ရက်တော့ ရှိပြီး။စာတွေ ထွက်ထား တာမျိုးတော့မရှိသေးဘူး။သူတို့ စာရင်းတွေ လိုချင်လို့ပေါ့ ပြောရရင် ”ဟု ပန်ဆိုင်းမြို့ဒေသခံအမျိုးသားတစ်ဦးက ပြောသည်။
လက်ရှိတွင် သျှမ်းပြည် မြောက်ပိုင်း မူဆယ်ခရိုင် အတွင်း စစ်ကောင်စီနှင့် ညီနောင်မဟာမိတ်တပ်များ စစ်ရေးပြင်းထန်နေပြီး၊ ညအချိန်တွင် စစ်ကောင်စီဘက်မှ လေကြောင်းဖြင့် ဗုံးကြဲတိုက်ခိုက်မှုရှိနေသည်။
ထို့ကြောင့် ဒေသခံများက နေရပ်ပြန်ပြီးနေထိုင်ရန် အဖြစ်နိုင်သေးကြောင်း၊ နေရပ်ပြန်နေပါက အသက်အန္တရာယ်စိုးရိမ်ရကြောင်းလည်း သျှမ်းသံတော်ဆင့်ကို ပြောဆိုလာသည်။
ထို့ပြင်ပန်းဆိုင်းမြို့တွင် အသက် (၁၆)နှစ်ပြည့် မည်သူမဆို ကိုးကန့်တပ် (MNDAA) ထဲဝင်ကာ စစ်မှုထမ်းရမည်ဖြစ်ကြောင်း အမိန့်ထုတ်ပြန်ထားကြောင်း ဒေသခံများပြောပြချက်အရသိရသည်။
“ယောကျာ်းလေးမရှိရင် မိန်းကလေး ယူမှာပါ ၂ယောက် ၃ ယောက်ရှိရင် ၁ယောက် ၊ ၅ယောက် ရှိရင် ၂ ယောက်ယူတယ်။တစ်နေ့အေးချမ်း လို့ပြန်လာတဲ့အခါ သန်ခေါင်စာရင်းပြန်ကောက်ရင် အဲ့ချိန်ပေါ်လာလို့ရှိရင် အရေးယူမယ်။ အသက်က ၁၅ နှစ်အထက်ပေါ့ ။ကလေးတွေကို လာမလုပ်စေချင်ရင်၊ ငါကိုတိုင်လုပ်မယ်ဆို ရင်ရတယ်။ အသက် ၁၅ နှစ်ကနေ ၅၀ အောက် ယူပါတယ်”ဟု MNDAA တပ်ဖွဲ့ဝင် တစ်ဦးက ပန်ဆိုင်းမြို့ ဘုန်းကြီးကျောင်းတွင် ဒေသခံများကို လာရောက်ပြောပြသည်။
ညီနောင်မဟာမိတ် (၃) ဖွဲ့က စစ်ကောင်စီ ကို “၁၀၂၇ စစ်ဆင်ရေး” စတင်ပြီးနောက် သျှမ်းမြောက် တကြော စစ်ရေးပြင်းထန်မှု ရှိပြီး ဒေသခံပြည်သူ ၈ သောင်းကျော် စစ်ဘေးတိမ်းရှောင်နေရသည်။
“၁၀၂၇ စစ်ဆင်ရေး” စတင်ပြီးနောက် နိုဝင်ဘာလ ၂၇ ရက်တွင် MNDAA တပ်ဖွဲ့သည် မုံးကိုးမြို့ ဘုန်းကြီးကျောင်းရှိ ကိုရင်များကို လူဝတ်လဲပြီး စစ်သားစုဆောင်းမှု ပြုလုပ်ခြင်း၊ အချို့ဘုန်းကြီးကျောင်းမှ ကိုရင်များ၏ မိဘများသည် ၎င်းတို့၏ သားကို ပြန်လာခေါ်ပြီး ထွက်ပြေးသွားကြောင်း သိရသည်။
