ကိုးကန့်ဒေသ လောက်ကိုင်မြို့အနီး တိုက်ပွဲများကြောင့် မြို့တွင်း ပိတ်မိနေသည့် ဒေသခံများနှင့် ရွှေ့ပြောင်းလုပ်သားများကို MNDAA ဘက်မှ လမ်းဖွင့်ကာ ကယ်ထုတ်ပေးနေကြောင်း ကိုးကန့်တပ်မတော် (MNDAA) ၏ ထုတ်ပြန်ချက်အရ သိရသည်။

နိုဝင်ဘာလ ၂၆ရက် မနက် ၆နာရီကတည်းမှ စ၍ လောက်ကိုင်မြို့မှ ထွက်လာသူများကို ပါစင်ကျော်ကျေးရွာမှတစ်ဆင့် ချင်းရွှေဟော်-နမ့်တစ်လမ်းအတိုင်း ကယ်ထုတ်ပေးနေပြီး ချင်းရွှေဟော်မှတစ်ဆင့် ‘ဝ’ ပြည် နမ့်တစ်မြို့သို့ ပို့ဆောင်ပေးနေကြောင်း MNDAA တပ်ဖွဲ့မှ တာဝန်ခံ လီကျားဝင်း ၏ ပြောကြားချက်အရ သိရသည်။

” မနက်ကတည်းက ကားတွေ ဆိုင်ကယ်တွေ တလမ်းလုံးအပြည့်ဘဲ ၊လမ်းဖွင့်ပေးတယ်လို့ ကြားကြားချင်း ကျနော်တို့လည်း လူလိုက်စုပြီး ထွက်လာခဲ့ကြတာ ၊မြို့တွင်း လူမကျန်တော့သလောက်ဘဲ၊အိမ်တွေလည်းပိတ် ဆိုင်တွေလည်းပိတ် အကုန်နီးပါး ထွက်လာကြတာ၊”ဟု ရွှေ့ပြောင်းလုပ်သားတစ်ဦးမှ သျှမ်းသံတော်ဆင့်သို့ပြောသည်။

ယခုရက်ပိုင်းအတွင်း လောက်ကိုင်မြို့ကို ဝင်ရောက်တိုက်ခိုက်တော့မည်ဟု MNDAA ဘက်မှ ထုတ်ဖော်ပြောကြားမှုကြောင့် လောက်ကိုင်မြို့အနီး တိုက်ပွဲများ ရက်ဆက်ဖြစ်ပွားနေရာ လောက်ကိုင်မြို့အနီးရှိ စစ်ကောင်စီတပ်မှ လက်နက်ကြီးများ အကြိမ်ကြိမ်ပစ်ခတ်နေသည့်အပြင် MNDAA သိမ်းပိုက်ထားသည့် စခန်းကုန်းတချို့ကိုလည်း လေကြောင်းမှ ပစ်ခတ်နေသောကြောင့် မြို့တွင်းနေ ဒေသခံပြည်သူ သောင်းနှင့်ချီ နေရပ်စွန့်ခွာ စစ်ဘေးရှောင်နေကြရကြောင်း သိရသည်။

၁၀၂၇ စစ်ဆင်ရေး စတင်ပြီးနောက် ရှမ်းပြည်နယ်မြောက်ပိုင်းရှိ စစ်ကောင်စီတပ်စခန်းပေါင်း ၂၁၀ ကျော်ကို မြောက်ပိုင်းမဟာမိတ်ညီနောင်သုံးဖွဲ့မှ သိမ်းပိုက်ခဲ့ပြီး ကိုးကန့်ဒေသမြို့တော် လောက်ကိုင်ကိုလည်း ပိတ်ဆို့ထားနိုင်ကြောင်း ကိုးကန့်သတင်းထုတ်ပြန်ချက်များအရ သိရသည်။