သျှမ်းပြည် မူဆယ်မြို့နယ် စယ်လန့်ကျေးရွာတွင် စစ်ကောင်စီတပ်က ဂျက်တိုက်လေယာဉ်ဖြင့် ဗုံးကြဲတိုက်ခိုက်ခဲ့ရာ ပြည်သူနေအိမ် ၁၀ လုံးကျော် ထိခိုက်ပျက်စီးကြောင်း စုံစမ်းသိရသည်။
ယနေ့ (နိုဝင်ဘာ ၂၄ ရက်) နံနက် ၁ နာရီဝန်းကျင်တွင် မူဆယ်မြို့နယ် စယ်လန့်ကျေးရွာ ကောင်းနောင်ရပ်ကွက်၌ တိုက်ပွဲတစုံတရာ ဖြစ်ပွားခြင်းမရှိဘဲ စစ်ကောင်စီတပ်က ဂျက်တိုက်လေယာဉ်ဖြင့် ပေါင် ၅၀၀ ဗုံး ၂ လုံး ကြဲချခဲ့ခြင်းကြောင့် နေအိမ် ၁၀ လုံးကျော် ထိခိုက်ပျက်စီးကြောင်း မူဆယ်မြို့နယ် စယ်လန့်ဒေသခံများက ပြောသည်။
“ဒီနေ့မနက် ၁ နာရီလောက်က ဂျက်ဖိုက်တာနဲ့ ပေါင် ၅၀၀ ဗုံးထင်တယ် ၂ လုံး လာကြဲချသွားတယ်။ ကောင်းနောင်ရပ်ကွက်က စိုင်းဆံမွန်ရဲ့ အိမ်ခြံဝင်းထဲ ကျကွဲတာ။ သူ့အိမ်နဲ့ ကုန်စုံဆိုင် စုစုပေါင်း ၂ လုံးက တော်တော်လေး ထိခိုက်ပျက်စီးသွားတယ်။ အိမ်မှာ ရပ်ထားတဲ့ ကား ၄ စီးလဲ ဗုံးစမှန်ပြီး ပျက်ကုန်ပြီ။ သူ့ဘေးအိမ်က ၁၀ အိမ်လောက်လဲ ဗုံးစမှန်လို့ ပြတင်းမှန်နဲ့ မျက်နှာကျက်တွေ အကုန်ပျက်တယ်ပြောတယ်”ဟု မူဆယ်မြို့နယ် စယ်လန့်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်မှ ယနေ့ (နိုဝင်ဘာ ၂၄)ရက် နံနက်တွင် စယ်လန့်ကျေးရွာကို လေကြောင်းမှ ဂျက်တိုက်လေယာဉ်ဖြင့် ဗုံးကြဲတိုက်ခိုက်မှုကြောင့် ဦးဆံမွန်၏ နေအိမ်နှင့် ကုန်စုံဆိုင်တို့ ထိခိုက်ပျက်စီးကာ အနီးရှိ နေအိမ် ၁၀ လုံးခန့်မှာ ပြတင်းမှန် ကွဲအက်ပြီး မျက်နှာကျက်များ ပျက်စီး၍ လူထိခိုက်မှု မရှိကြောင်း စယ်လန့်ကျေးရွာမှ ၎င်းအမျိုးသားက ဆက်ပြောသည်။
ပြီးခဲ့သည့် အောက်တိုဘာ ၂၀ ရက်တွင်လည်း မူဆယ်မြို့နယ် စယ်လန့်ကျေးရွာတွင် စစ်ကောင်စီတပ်သည် ဆုတောင်းပြည့်တောင်ပေါ် စခန်းမှနေပြီး လွိုင်တေးမိန်းတောင်ပေါ်ဘုရားသို့ လက်နက်ကြီးဖြင့် ၁၀ လုံးထက်မနည်း ပစ်ခတ်ခဲ့ခြင်းကြောင့် စယ်လန့်ဒေသခံများလည်း ထွက်ပြေးတိမ်းရှောင်ခဲ့ကြောင်း သိရသည်။
ထို့အပြင် မူဆယ်မြို့နယ် စယ်လန့်ကျေးရွာတွင် “၁၀၂၇ စစ်ဆင်ရေး”ကြောင့် နမ့်ခမ်းမြို့မှ ထွက်ပြေးတိမ်းရှောင်လာသည့် စစ်ဘေးရှောင်များလည်း ရှိနေပြီး နီးစပ်ရာ ဆွေမျိုးများထံတွင် ခိုလှုံနေကြကြောင်း နမ့်ခမ်းစစ်ဘေးရှောင်များက ပြောသည်။
“စယ်လန့်မှာ ပြီးခဲ့တဲ့လတုန်းက တိုက်ပွဲဖြစ်ကတည်းက ရှောင်နေကြတာရှိတယ်။ တချို့က ဒီအပတ်ထဲမှ အိမ်ကိုပြန်လာတာရှိတယ်။ ဒီနေ့ မနက်လည်း စစ်ကောင်စီတပ်က ဂျက်လေယာဉ်နဲ့ ဗုံးထပ်လာကြဲတာလေ။ ကျတော်တို့လည်း နမ့်ခမ်းကနေ စယ်လန့်က နီးစပ်ရာ ဆွေမျိုးအိမ်တွေမှာ စစ်ဘေးရှောင်နေရတာ။ အခုလို ညသန်းခေါင် အချိန်တွေမှာ လေယာဉ်နဲ့ဗုံးလာကြဲတော့ ထပ်ပြီးရှောင်လို့လည်း မရဘူးလေ။ အိမ်ထဲမှာ နေတာတောင်မှ မလုံခြုံဘူးပေါ့”ဟု နမ့်ခမ်းမြို့မှ စယ်လန့်ကျေးရွာသို့ ထွက်ပြေးတိမ်းရှောင်လာသည့် စစ်ဘေးရှောင်တစ်ဦးက သျှမ်းသံတော်ဆင့်ကို ပြောသည်။
အလားတူ နိုဝင်ဘာ ၁၉ ရက် ညသန်းခေါင်အချိန်ခန့်ကလည်း စစ်ကောင်စီတပ်မှ နမ့်ဆန်မြို့နယ် မြို့သစ်ကျေးရွာသို့ လေကြောင်းဖြင့် ပေါင် ၅၀၀ ဗုံးကြဲတိုက်ခိုက်ခဲ့ရာ ကလေး ၂ ဦး အပါအဝင် အရပ်သား ၃ ဦး သေဆုံးပြီး ၇ ဦးဒဏ်ရာရရှိကာ နေအိမ် ၂၀ ကျော် ထိခိုက်ပျက်စီးခဲ့ကြောင်း နမ့်ဆန်ဒေသခံများက ပြောသည်။
“၁၀၂၇ စစ်ဆင်ရေး”အတွင်း မူဆယ်ခရိုင် မူဆယ်နှင့် နမ့်ခမ်းမြို့နယ်တို့တွင် စစ်ကောင်စီနှင့် ညီနောင်မဟာမိတ် ၃ ဖွဲ့တို့၏ နှစ်ဖက်တိုက်ပွဲကြောင့် ပြည်သူနေအိမ် ၆၀ ကျော် ထိခိုက်ပျက်စီးခဲ့ပြီး နမ့်ခမ်းမြို့နယ်မှ စစ်ဘေးရှောင်ဦးရေ ၆၀၀၀ ကျော်မှာ မြန်မာ-တရုတ် နယ်စပ်နှင့် မူဆယ်မြို့ပေါ်သို့ ထွက်ပြေးတိမ်းရှောင်နေရကြောင်း ဒေသခံများထံမှ သိရသည်။
