မြန်မာ-တရုတ်နယ်စပ် မူဆယ်မြို့နယ် ကျင်စန်းကျော့ဂိတ်အတွင်း ရပ်နားထားသည့် ၂၂ဘီး ကုန်တင်ယာဥ်တန်များပေါ် ဗုံးကျ ပေါက်ကွဲမှုကြောင်း ကုန်ကား (၁၀)စီးထက်မနည်း မီးလောင်ပျက်စီးသွားကြောင်း စုံစမ်းသိရသည်။
သျှမ်းပြည် မူဆယ်မြို့နယ် ကျင်စန်ကျော့နယ်စပ်ဂိတ် သွားမည့်လမ်းပေါ် ကောင်းခန်ကျေးရွာ 7 ဟွာကျင်း ကားဂိတ် တွင် ယနေ့ (နိုဝင်ဘာလ ၂၃ ရက်) နံနက် ၉နာရီခွဲဝန်းကျင်၌ ဗုံးကျရောက်ပေါက်ကွဲမှုကြောင့် ကုန်တင်ကားကြီးများ ၁၀ စီးထက်မနည်း မီးလောင်ပျက်စီးသွားကြောင်း ဒေသခံများက သျှမ်းသံတော်ဆင့်ကို ပြောသည်။
“ဘယ်အဖွဲ့ကလက်နက်ကြီးလဲတော့မသိဘူး။ တချို့ကားသမားကလည်း တရုန်းလို့ပြောကြတယ်။ အတည် မပြုနိုင်သေးဘူး။ ဒီကားကွင်းက မူဆယ်မှာအကြီးဆုံး၊၁၂ ဘီး ၂၂ ဘီးတွေ ပေါ့။ထိခိုက်မှုကတော့ မရှိသေးဘူး”ဟု မူဆယ်မြို့ဒေသခံ အမျိုးသားတစ်ဦး ကပြောသည်။
အဆိုပါ မီးလောင်သွားသည့် ကားများသည် တရုတ်ပြည်မှ တင်သွင်းလာသောကုန်ကားများကို မူဆယ် ၁၀၅ မိုင်မှ မန္တလေးမြို့သို့ သွားမည့် ကုန်တင်ကားများဖြစ်ကြောင်း သိရသည်။
လက်ရှိမှာ မူဆယ်မြို့နယ် အတွင်း စစ်ကောင်စီတပ်ဖွဲ့နှင့် ညီနောင်မဟာမိတ် (၃)ဖွဲ့တို့ တိုက်ပွဲ ဆက်လက်ပြင်းထန်သည့် နေရာဖြစ်သည်။
Leave a Comments