တောင်ကြီးမြို့ပေါ်ရှိ ဟိုတယ်နှင့်တည်းခိုခန်းသို့ သွားရောက်တည်းခိုမည့် ဧည့်သည်များကို မှတ်ပုံတင် မိတ္တူ အရှေ့နောက် နှင့် ဧည့်သည်၏ပုံကို ရိုက်ပြီး ဌာနဆိုင်ရာ များထံသို့ပို့ ဆောင်ပေးရကြောင်း စုံစမ်းသိရသည်။
သျှမ်းပြည် တော်ကြီးမြို့ ရှိ ဟိုတယ်နှင့်တည်းခိုခန်း များတွင် နိုဝင်ဘာလ ၂၀ ရက်နေ့ မှ နိုဝင်ဘာ လကုန်ထိ လာရောက် တည်းခိုမည့် ဧည့်သည်များကို မှတ်ပုံတင် မူရင်း၊မိတ္တူ အရှေ့နောက် နှင့် ဧည့်သည်၏ပုံကိုရိုက်ပြီး ဌာနဆိုင်ရာ များထံသို့ ပေးရကြောင်း တောင်ကြီးမြို့တွင်း ဟိုတယ် ဝန်ထမ်းတစ်ဦးက သျှမ်းသံတော်ဆင့်ကို ပြောပါသည်။
“မှတ်ပုံတင် မူရင်းလည်းယူတယ်။ ဧည့်သည်တွေရဲ့တစ်ကိုယ်လုံးပုံကိုလည်းယူတယ်။ ပြီးတော့ မှတ်တင်ပုံရဲ့အရှေ့ဖက်၊အနောက်ဖက်ကို အကုန် မိတ္တူ ယူပြီး ဌာနဆိုင်ရာတွေကို သွားပို့ပေးရတာ၊ရုံး ၃ခု ၄ ခုလောက်တော့ ပို့ပေးရတာ။ သက်ဆိုင်ရာကလည်း ပို့ပေးဖို့တောင်းဆိုထားတာပေါ့နော်” ဟု ဟိုတယ် ဝန်ထမ်းတစ်ဦးက ပြောသည်။
လက်ရှိ ကာလသည် တောင်ကြီးတန်ဆောင်တိုင်ပွဲတော်ကျင်းပသည့်အချိန်ကာလဖြစ်ပြီး၊ စစ်ကောင်စီမှဦးစီးကျင်းပသည့် ပွဲတော်ဖြစ်သဖြင့် ပွဲပျက်မည်ကို စစ်ကောင်စီဘက်မှ စိုးရိမ်မှုများရှိနေကြောင်း တောင်ကြီးဒေသခံများက သုံးသပ်ပြောသည်။
” တော်လှန်ရေးအင်အားစုကလည်း ပွဲတော်မသွားဖို့၊ နောက်တခုခုဖြစ်ရင် တာဝန်မယူဘူးဆိုတာတွေ အခုလည်း လွိုင်ကော်ဘက်က စစ်ရှောင်တွေက တောင်ကြီးဘက်ကို အများအပြားရောက်လာတော့ စကစဘက်ကလည်း စိုးရိမ်လာလို့ အဲ့လို လုပ်လိုက်တဲ့သဘောပဲ” ဟု တောင်ကြီးဒေသခံအမျိုးသမီး တစ်ဦးက သျှမ်းသံတော်ဆင့်ကိုပြောသည်။
ထိုပြင် ယနေ့ (နိုဝင်ဘာ ၂၁)ရက် ညနေ တွင် တောင်ကြီး တန်ဆောင်တိုင် ဖွင့်ပွဲရှိသဖြင့် တောင်ကြီးမြို့ အဝင်ဂိတ်ပေါက်များအားလုံးပိတ်ဆိုင်းထားပြီး၊အထွက်သာခွင့်ပြုကြောင်း သိရသည်။
တောင်ကြီးတန်ဆောင်တိုင်ပြုလုပ်မည့် ကွင်းရှိအနားရှိ တက္ကသိုလ်ဝင်သည့်လမ်း၊ ဧရာဝတီလမ်း၊ သံလမ်း၊ လမ်းကြိုလမ်းကြား အားလုံးပိတ်ထားကြောင်းသိရသည်။
တောင်ကြီးတန်ဆောင်တိုက်ပွဲတော်ကိုသွားရောက်လည်ပတ်ရန်အတွက် အချို့ဒေသခံများလည်း လုံခြုံရေး စိုးရိမ်မှုများရှိနေကြပြီး ပွဲတော်သို့ သွားလာခြင်းမပြုရန်လည်း တော်လှန်ရေးလုပ်သူများက တိုက်တွန်း ထားကြသည်။
