မြန်မာ-တရုတ်နယ်စပ် မူဆယ်မြို့နယ် မိုင်းယု (၁၀၅) မိုင်တွင် ယမန်နေ့ (နိုဝင်ဘာ ၁၆) ရက် ညနေ ၌ စစ်ကောင်စီနှင့် တအာင်း(ပလောင်) အမျိုးသားလွတ်မြောက်ရေးတပ်မတော်တို့ကြား တိုက်ပွဲဖြစ်ပွားမှုကြောင့် ကလေးတစ်ဦးနှင့်အမျိုးသမီး တစ်ဦး ကျည်ထိမှန်ခဲ့ကြောင်း စုံစမ်းသိရသည်။
ယမန်နေ့ (နိုဝင်ဘာ ၁၆) ရက် ညနေ ၃ နာရီဝန်းကျင်တွင် မူဆယ်မြို့နယ် မိုင်းယု (၁၀၅) မိုင်အတွင်း ဖြစ်ပွားသည့် တိုက်ပွဲကြောင့် အသက် (၁၀) နှစ်အရွယ် အမျိုသား ပေါင်ထိမှန်၊ အသက် ၃၀ အရွယ်ရှိ အမျိုးသမီး ခြေတလုံးထိမှန်သွားကြောင်း မိုင်းယုဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
“ ပစ်ခတ်မှုကြောင့် အရပ်သား (၂) ယောက်ထိမှန်တာ ဟုတ်ပါတယ်။ ဒဏ်ရာတွေကတော့ မစိုးရိမ်ရဘူး။ လူမှုကူညီရေးအသင်းတွေကတော့ မူဆယ်မြို့ပြည်သူ့ဆေးရုံကို ပို့လိုက်တယ်” ၎င်းအမျိုးသားက ဆိုသည်။
အလားတူ မူဆယ်မြို့နယ် တန့်ခန်ကျေးရွာ အတွင်း TNLA နှင့် စစ်ကောင်စီတို့သည် နံနက်ပိုင်းမှစတင်ပြီး အပြန်အလှန် ပစ်ခတ်မှုကြောင့် အရပ်သား (၅)ဦး ကျည်ထိမှန်ခဲ့ကြောင်း သိရသည်။
ထိုထိခိုက်ဒဏ်ရာရရှိသည့် အရပ်သား (၅)ဦးထဲတွင် အမျိုးသမီး ၂ ဦး နှင့်အမျိုးသား (၃)ဦးတို့ဖြစ်ပြီး မူဆယ်ပြည်သူ့ဆေးရုံ သို့ ပို့ဆောင်သွားလိုက်ကြောင်း လည်း တုန့်ခန်ဒေသခံတစ်ဦးက ပြောသည်။
မူဆယ်မြို့အတွင်း စစ်ဘေးရှောင် တစ်ထောင်ကျော် နှင့် ပန်ဆိုင်း(ကြူကုတ်)တွင် စစ်ဘေးရှောင် ၂ထောင်ကျော် ရှိကြောင်း စစ်ဘေးရှောင်ကူညီပေးနေသူတစ်ဦးက ပြောသည်။
ယနေ့အချိန်ထိ မူဆယ်ခရိုင် အတွင်း ညီနောင်မဟာမိတ် (၃)ဖွဲ့ နှင့် စစ်ကောင်စီတို့ စစ်ရေးပြင်းထန်နေသေးကြောင်း သိရသည်။
