သျှမ်းပြည် မူဆယ်မြို့နယ် စယ်လန့်ကျေးရွာအတွင်း နေထိုင်သည့် အမျိုးသားတစ်ဦးကို တအာင်း (ပလောင်) အမျိုးသားလွတ်မြောက်ရေးတပ်မတော် TNLA မှ ယနေ့ (နိုဝင်ဘာ ၇) ရက် နံနက်ပိုင်းတွင် ဖမ်းဆီးခေါ်ဆောင်သွားခဲ့ကြောင်း သတင်းသိရှိရသည်။
ယနေ့ ( နိုဝင်ဘာလ ၇ ရက် ) နံနက်ပိုင်း ၉ နာရီကျော်အချိန်တွင် စယ်လန့်ကျေးရွာအတွင်း သွားလာနေသူ အသက် ၃၅ နှစ်ကျော် အမျိုးသားတစ်ဦးကို TNLA တပ်ဖွဲ့မှ ဖမ်းဆီးခေါ်ဆောင်သွားခဲ့ပြီး လက်ရှိအချိန်ထိ မည်သည့်နေရာသို့ ထိန်းသိမ်းထားခြင်း မသိရှိရသဖြင့် မိသားစုဝင်များက စိတ်ပူနေသည်ဟု ဖမ်းဆီးခံရသူနှင့်နီးစပ်သည့် အသိမိတ်ဆွေတစ်ဦးက ပြောသည်။
“ သူ့ကို မနက်ကတည်းက ဖမ်းသွားတာ အခုထိ ပြန်မလွတ်လာသေးဘူး။ ဘယ်ကို ဖမ်းခေါ်သွားမှန်း မသိရသေးဘူး။ သူတစ်ခုခု ဖြစ်သွားမှာကိုပဲ ကျနော်စိုးရိမ်တယ်။ သူ့မိသားစုတွေလည်း အရမ်းစိတ်ပူနေကြတယ် “ ဟု ၎င်းက ပြောသည်။
ထိုဖမ်းဆီးခံရသည့် အမျိုးသားတစ်ဦးသည် အသက် ၃၅ နှစ်ဝန်းကျင်အရွယ်ရှိ စိုင်းမောဝ်အွန် ဖြစ်ပြီး၊ သူသည် ဒေသအတွင်း တက်ကြွလှုပ်ရှားသည့် လူငယ်တစ်ဦးဖြစ်သဖြင့် TNLA မှ ဖမ်းဆီးသွားခြင်းဖြစ်ကြောင်း ၎င်းက ဆက်လက်ပြောသည်။
မူဆယ်မြို့နယ် စယ်လန့်ကျေးရွာအုပ်စုနေ စိုင်းမောဝ်အွန်သည် စစ်ဘေးရှောင်လာနိုင်မည့် ပြည်သူများအား ၎င်းနေထိုင်ရာကျေးရွာအတွင်း၌ ခေတ္တခိုလှုံနိုင်ရေး ကြိုတင်ပြင်ဆင်ထားဖို့ သွားလာဆောင်ရွက်နေစဥ် ၇-၁၁-၂၀၂၃ နံနက်ပိုင်း၌ TNLA တပ်ဖွဲ့၏ ဖမ်းဆီးခြင်းကို ခံခဲ့ရသည်။
အလားတူ ယနေ့ (နိုဝင်ဘာလ ၇ ရက်) မနက်ပိုင်းအချိန်တွင်လည်း မူဆယ်မြို့နယ် စယ်လန့်ကျေးရွာတွင် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) နှင့် တအာင်း (ပလောင်) အမျိုးသား လွတ်မြောက်ရေးတပ်မတော် (TNLA) တို့ ထိတွေ့တိုက်ပွဲ ဖြစ်ပွားခဲ့သည်။
