သျှမ်းပြည် မူဆယ်မြို့နယ် မိုင်းယနှင့် မုံးပေါ် ကြားရှိ စစ်ကောင်စီစခန်းတခုကို ကချင်လွတ်မြောက်ရေးတပ်မတော် KIA နှင့် ကိုးကန့်တပ်ဖွဲ့ MNDAA တို့ပူးပေါင်းပြီး ဝင်ရောက်တိုက်ခိုက်သိမ်းပိုက်ခဲ့ကြောင်း စစ်ရေးသတင်းရင်းမြစ် တစ်ဦးက ပြောသည်။
ယမန်နေ့ (အောက်တိုဘာလ ၁၉) ရက် နံနက်အစောပိုင်း အချိန်မှစပြီး မိုင်းယ နှင့် မုံးပေါ်ကြားရှိ ဝိန်းလတောင်စခန်းတခုကို KIA နှင့် MNDAA တို့ပူးပေါင်းပြီး တစ်ရက်နီးပါးဝင်ရောက်တိုက်ခဲ့ကာ စစ်ကောင်စီဘက်မှ ထိခိုက်သေဆုံးမှုပြီး ၎င်းတို့စခန်းကိုလည်း သိမ်းပိုက်နိုင်ခဲ့ကြောင်း သိရသည်။
စခန်းသိမ်းတိုက်ပွဲအတွင်း စစ်ကောင်စီဘက်မှ လေကြောင်းအသုံးပြုပြီး တိုက်ခိုက်ခဲ့ကြောင်း ဒေသအတွင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။
“ နံနက်အစောပိုင်းမှာ KIA နဲ့ MNDAA တို့ပူးပေါင်းပြီး စစ်ကောင်စီ ဝိန်းလတောင်စခန်းတခုကို ဝင်တိုက်ခဲ့တယ်။ စစ်ကောင်စီဘက်ကလည်း လေကြောင်းနဲ့ ပစ်ခတ်တိုက်ခိုက်ခဲ့တယ်။ စစ်ကောင်စီစခန်းကိုတော့ သိမ်းနိုင်ခဲ့တယ် “ ဟု စစ်ရေးသတင်းရင်းမြစ်တစ်ဦးက ပြောသည်။
အဆိုပါ တိုက်ပွဲအတွင်း လက်နက်ခဲယမ်းများလည်း သိမ်းဆည်းရမိပြီး စစ်ကောင်စီဘက်မှ ထိခိုက်သေဆုံးမှု ရှိခဲ့ကြောင်း ၎င်းကဆက်ပြောသည်။
အလားတူ ကွတ်ခိုင်မြို့နယ် နမ့်ဖတ်ကာရှိ စစ်ကောင်စီစခန်းမှ လက်နက်ကြီး ၂ လုံးဖြင့် ခိုမုန်းကျေးရွာ၏ အနောက်ဘက်ခြမ်းကို ပစ်ခတ်ခဲ့ကြောင်း၊ မူဆယ်မြို့နယ် စယ်လန့်ကျေးရွာ ဆုတောင်းတောင်ပေါ်မှ တပ်စွဲထားသော စစ်ကောင်စီကလည်း လွိုင်တေးမိန်းတောင် အရှေ့ဖက်ခြမ်းရှိ တောင်ကုန်းတနေရာကို လက်နက်ကြီးဖြင့် ၉ လုံး ပစ်ခတ်တိုက်ခဲ့သည်။
စယ်လန့်ကျေးရွာနေ ဒေသခံအမျိုးသားတစ်ဦးက “ ဆုတောင်းတောင်ပေါ်ကနေ လက်နက်ကြီး ၂ လုံးနဲ့ လွိုင်တေးမိန်းတောင်ပေါ်ကို စပစ်တယ်။ အဲ့အနီး တောင်ကုန်းကိုလည်း ပစ်တယ်။ လူထိခိုက်ဒဏ်ရာရတာတော့ မသိရသေးဘူး။ တစ်နေ့ကုန် နီးပါးလောက် ပစ်နေတာ အလုံး ၁၀ လုံးလောက်ရှိနေပြီ “ ဟု ပြောသည်။
ပြီးခဲ့သည့် စက်တင်ဘာလတွင်လည်း မူဆယ်မြို့နယ် စယ်လန့်ကျေးရွာအတွင်း စစ်ကောင်စီနှင့် တအာင်း (ပလောင်) အမျိုးသားလွတ်မြောက်ရေးတပ်မတော်တို့အကြား တစ်လနီးပါးကြာ တိုက်ပွဲဖြစ်ပွားခဲ့သည်။
လက်ရှိအချိန်ထိ မူဆယ်မြို့နယ်အတွင်း စစ်ကောင်စီနှင့် ကချင်လွတ်မြောက်ရေးတပ်မတော် KIA ၊ တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) တို့အကြား စစ်ရေးတင်းမာနေလျက်ရှိနေသည်
