သျှမ်းပြည် လားရှိုးခရိုင် သိန္နီမြို့နယ်အတွင်း အာဏာသိမ်းစစ်ကောင်စီ တပ်မှ လက်နက်ကြီးဖြင့် ပစ်ခတ်မှုကြောင့် ကိုယ်ဝန်သည် အမျိုးသမီး တစ်ဦး ထိခိုက်ဒဏ်ရာ ရရှိကြောင်း စုံစမ်းသိရသည်။

ယနေ့ (အောက်တိုဘာလ ၉) ရက် နံနက်ပိုင်း ၁၀ နာရီဝန်းကျင်မှ စတင်ကာ သိန္နီမြို့နယ် ကွန်ကောက် ကျေးရွာအုပ်စု (ဢိူင်ႇၵုၼ်ၵွၵ်ႇ)၊ ကောင်းချိုကျေးရွာ (ဝၢၼ်ႈၵွင်းၶဵဝ်) ၌ စစ်ကောင်စီ လက်နက်ကြီးကျကွဲ ပြီး ကိုယ်ဝန်သည် အမျိုးသမီး တစ်ဦး ထိခိုက်ဒဏ်ရာရကြောင်း ဒေသခံ နန်းစေး (နာမည်လွှဲ) က သျှမ်းသံတော်ဆင့်ကို ပြောသည်။

“ရွာထဲကို လက်နက်ကြီး နှစ်လုံးကျကွဲတယ်၊ တစ်လုံးက အိမ်ဝိုင်းထဲကျကွဲလို့ အိမ်ထဲမှာ ရှိနေတဲ့ ကိုယ်ဝန်သည် အမျိုးသမီးတစ်ဦးရဲ့ ကျောကို လက်နက်ကြီးစ ထိမှန်ဒဏ်ရာရသွားတယ်။ အခုတော့ ရွာခံတွေ ထွက်ပြေးကြပြီ၊ ဘုန်းကြီးကျောင်းမှာ စစ်ရှောင်ရောက်နေတယ်” ဟု အထက်ပါ နန်းစောက သျှမ်းသံတော်ဆင့်ကို ပြောသည်။

ကောင်းချိုကျေးရွာအတွင်း ကျကွဲသည့် စစ်ကောင်စီ၏ လက်နက်ကြီးသည် သိန္နီမြို့နယ်ရှိ ဝမ်ပန် (ဝၢၼ်ႈပၢင်ႇ) မှ လက်နက်ကြီးဖြင့် ပစ်ခတ်ခြင်း ဖြစ်ပြီး လက်ရှိတွင် နားကုန်းရွာခံ၊ ကောင်းချိုရွာခံတို့က စစ်ရှောင်ထွက်ပြေးရကြောင်းလည်း သိရသည်။

လက်နက်ကြီး ထိမှန်ဒဏ်ရာရသည့် ကိုယ်ဝန်သည် အမျိုးသမီးကို သိန္နီဆေးရုံသို့ ပို့ဆောင်ရာ လက်မခံ သဖြင့် လားရှိုးဆေးရုံသို့ ဆက်လက်ပို့ဆောင်ရသည်။

ထို့အပြင် စစ်ကောင်စီ၏ တပ်စခန်းရှိရာ သိန္နီမြို့နယ် နမ့်စလပ်ကျေးရွာမှလည်း လက်နက်ကြီး ပစ်ခတ်မှုများ ရှိနေပြီး ပါကန်းကျေးရွာ (ဝၢၼ်ႈပႃၵၢင်း) အတွင်းသို့ လက်နက်ကြီး ၂ လုံးကျကွဲကြောင်း သိရသည်။

လက်ရှိတွင် ကချင်လွတ်လပ်ရေးတပ်မတော် (KIA) တပ်သည် ကွန်ကောက်ကျေးရွာ (ဝၢၼ်ႈၵုၼ်ၵွၵ်ႇ)၊ တန့်ခန်ကျေးရွာ (ဝၢၼ်ႈတၢင့်ၶၢၼ်) နှင့် ပိန်းကန်းကျေးရွာ(ဝၢၼ်ႈပဵင်းၵၢင်း) တို့၌ နေရာယူထားလျက်ရှိပြီး စစ်ကောင်စီနှင့် အပြန်အလှန် လက်နက်ကြီး ပစ်ခတ်မှု ရှိနေကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“သေနတ်တွေသံတွေကျတော့ မကြားရဘူး၊ လက်နက်ကြီးနဲ့ပဲ ပစ်နေတယ်။ အခုဆိုရင် မြို့ပေါ်ကို ထွက်ပြေးတဲ့ ဒေသခံတွေ၊ ဘုန်းကြီးကျောင်းတွေမှာ ရှိနေတဲ့ စစ်ရှောင်တွေ စုစုပေါင်း (၅၀၀) လောက် ရှိမယ်၊ KIA ကလည်းမဆုတ်၊ စစ်ကောင်စီ ကလည်း အင်အားထပ်ဖြည့်လာနေလို့ တချို့လည်း ပြေးဖို့ အတွက် အထုပ်တွေ ပြင်ထားရတာ။” ဟု ဒေသခံ အမျိုးသားက သျှမ်းသံတော်ဆင့်ကို ပြောသည်။

သိန္နီမြို့နယ်အတွင်း အာဏာသိမ်း စစ်ကောင်စီ နှင့် KIA တို့၏ ထိတွေ့တိုက်ပွဲသည် အောက်တိုဘာလ ၇ ရက်မှ စတင်ကာ လက်နက်ကြီးဖြင့် အပြန်အလှန် ပစ်ခတ်ခဲ့ခြင်း ဖြစ်ပြီး ဒေသခံများက စစ်ရှောင် ထွက်ပြေးရခြင်းဖြစ်သည်။

လက်ရှိတွင် KIA တပ်မှ နောက်ဆုတ်ခြင်း မရှိသလို စစ်ကောင်စီတပ်မှ စစ်အင်အား အများအပြားဖြင့် ကွန်ကောက်ကျေးရွာ အတွင်း တိုးချဲ့နေရာယူထားသည့်အတွက် တိုက်ပွဲ ပိုမိုပြင်းထန်မှာကို စိုးရိမ်ရ ကြောင်း ဒေသခံများက ပြောဆိုနေကြသည်။