ကိုးကန့်တပ်ဖွဲ့ (MNDAA) ထိန်းချုပ်ထားသည့် သျှမ်းပြည်မြောက်ပိုင်း သိန္နီနှင့် ကွတ်ခိုင်မြို့နယ်များတွင် ဇူလိုင်လ ၁ ရက်နေ့မှစတင်၍ လျှပ်စစ်မီးများ ပြန်လည်ရရှိနေပြီဖြစ်သော်လည်း အိမ်သုံးမီတာခ တစ်ယူနစ်လျှင် ၄၀၀ ကျပ်အထိ ပေးဆောင်ရမည်ဖြစ်ကြောင်း ဒေသခံများထံမှ သိရသည်။

“၁၀၂၇ စစ်ဆင်ရေး” ကာလအတွင်းမှစတင်ကာ သုံးနှစ်နီးပါးကြာ လျှပ်စစ်မီးပြတ်တောက်ခဲ့သည့် အဆိုပါဒေသများတွင် ယခုအခါ သိန္နီမြို့အနောက်ဘက် ဟိုနားကျေးရွာအနီးရှိ ရေအားလျှပ်စစ်စက်ရုံမှတစ်ဆင့် မီးစတင်ဖြန့်ဖြူးပေးနေခြင်းဖြစ်ကြောင်း သိရသည်။

သို့သော် MNDAA က သတ်မှတ်လိုက်သည့် မီတာခနှုန်းထားမှာ စစ်ကော်မရှင်ထိန်းချုပ်ရာ ဒေသများနှင့် နှိုင်းယှဉ်ပါက များစွာကွာဟနေသည့်အတွက် ဒေသခံအချို့က စိုးရိမ်မှုရှိနေကြသည်။

စစ်ကော်မရှင်ထိန်းချုပ်ထားသည့် လားရှိုးမြို့တွင် အိမ်သုံးမီတာ တစ်ယူနစ်လျှင် ၅၀ ကျပ်မှ ၁၀၀ ကျပ်အတွင်းသာ ရှိသော်လည်း ယခု သိန္နီနှင့် ကွတ်ခိုင်တွင် သတ်မှတ်သည့် ၄၀၀ ကျပ်မှာ ၄ ဆခန့် ပိုမိုများပြားနေခြင်းဖြစ်ကြောင်း သိန္နီမြို့ခံတစ်ဦးက ပြောသည်။

“အခု သိန္နီနဲ့ ကွတ်ခိုင်ဘက်မှာတော့ မီးတွေပြန်ရပြီ။ ဒါပေမယ့် တစ်ယူနစ်ကို ၄၀၀ ကျပ်ကနေ ၆၀၀ ကျပ်အထိ ပေးရမယ်လို့ ပြောထားတယ်။ အရင်အစိုးရ လက်ထက်တုန်းက တစ်ယူနစ်ကို ၂၀ ကျပ်နေ ၁၀၀ ကျပ်အထိပဲ ပေးရတာ” ဟု သိန္နီမြို့ခံတစ်ဦးက ပြောသည်။

MNDAA ၏ ဇွန်လနောက်ဆုံးပတ် ထုတ်ပြန်ချက်အရ သိန္နီနှင့် ကွတ်ခိုင်မြို့တို့တွင် အိမ်သုံးမီတာခ တစ်ယူနစ်လျှင် ၄၀၀ ကျပ်၊ စီးပွားရေးနှင့် စက်မှုလုပ်ငန်းသုံးအတွက်မူ တစ်ယူနစ်လျှင် ၆၀၀ ကျပ်မှ ၇၀၀ ကျပ်အထိ ကောက်ခံသွားမည်ဟု သိရသည်။

“မီးပြန်ရတော့ ကောင်းပါတယ်။ ဒါပေမဲ့ မီတာခက အရမ်းဈေးကြီးတယ်။ ပြီးတော့ မီးမရခင်ကတည်းက ကျနော်တို့က ပိုက်ဆံအကုန်ကျခံပြီး ဆိုလာတွေ တပ်ထားတာ” ဟု သိန္နီမြို့ခံတစ်ဦးက ဆက်ပြောသည်။

ဟိုနားကျေးရွာအနီးရှိ ရေအားလျှပ်စစ်စက်ရုံသည် ၁၂,၆၀၀ ကီလိုဝပ် (၁၂.၆ မဂ္ဂါဝပ်) ထွက်ရှိပြီး သိန္နီ၊ ကွတ်ခိုင်နှင့် တာမိုးညဲမြို့များအပြင် လားရှိုးမြို့အစပ်ရှိ ကျေးရွာများအထိ ဖြန့်ဖြူးရန် စီစဉ်ထားကြောင်း သိရသည်။

အဆိုပါ လျှပ်စစ်စီမံကိန်းကို အထူးဒေသ (၁) ရေပေးဝေရေးနှင့် လျှပ်စစ်စွမ်းအားကုမ္ပဏီလီမိတက် (Myanmar Federal First Special Region Water and Power Co., Ltd.) က လုပ်ဆောင်နေခြင်းဖြစ်ပြီး ဒေသတွင်း တရုတ်ရင်းနှီးမြှုပ်နှံသူများကို ဖိတ်ခေါ်နိုင်ရန်နှင့် ကုန်ထုတ်လုပ်မှုလုပ်ငန်းများ လည်ပတ်နိုင်ရန်အတွက် ရည်ရွယ်လုပ်ဆောင်နေခြင်းဖြစ်ကြောင်း The Kokang သတင်းဌာန၏ ထုတ်ပြန်ချက်များအရ သိရသည်။

လတ်တလောတွင် သိန္နီမြို့ပေါ်ရပ်ကွက်များ၌ မီးအပြည့်အဝရရှိနေပြီဖြစ်သော်လည်း ကွတ်ခိုင်မြို့တွင်မူ ရပ်ကွက် (၅) နှင့် တာမိုးညဲဘက်ကို ဦးစားပေးလုပ်ဆောင်နေပြီး ကျန်ရှိသည့်နေရာများကို တဖြည်းဖြည်းချင်း တိုးချဲ့ပေးသွားမည်ဟု သိရသည်။

“ကျနော်တို့ မြို့ပေါ်မှာတော့ မီးတွေပြန်ရပြီ။ တာမိုးညဲဘက်ကိုလည်း ဆက်ပြီး ပေးဖို့လုပ်နေတယ်။ အရင်တုန်းက မီးရခဲ့တဲ့ကျေးရွာတွေနဲ့ မီးကြိုးမီးတိုင်ရှိတဲ့နေရာကိုလည်း ပြန်ပြင်ပြီး ပေးဖို့လုပ်နေတယ်” ဟု ကွတ်ခိုင်မြို့ခံတစ်ဦးကလည်း သျှမ်းသံတော်ဆင့်ကို ပြောသည်။

MNDAA အနေဖြင့် ၎င်းတို့ထိန်းချုပ်ထားသည့် နယ်မြေများတွင် ကိုယ်ပိုင်အုပ်ချုပ်ရေးယန္တရားကို အကောင်အထည်ဖော်လျက်ရှိရာ သိန္နီမြို့နယ် နမ့်စလတ်ရွာအနီးတွင်လည်း နောက်ထပ် ရေအားလျှပ်စစ်စီမံကိန်းတစ်ခုကို ထပ်မံတည်ဆောက်နေကြောင်း သိရသည်။