သျှမ်းပြည်မြောက်ပိုင်း သိန္နီမြို့တွင် ကိုးကန့်တပ်ဖွဲ့ (MNDAA) က ဖမ်းဆီးရမိထားသည့် ရာဇဝတ်မှုကျူးလွန်သူ ၅ ဦးကို လူထုရှေ့တွင် လှည့်လည်လမ်းလျှောက်ခိုင်းကာ ပြသခဲ့ကြောင်း သတင်းရရှိသည်။

ပြီးခဲ့သည့် မေလ ၉ ရက် နံနက် ၈ နာရီဝန်းကျင်တွင် MNDAA ထိန်းချုပ်ထားသည့် သိန္နီမြို့၌ ခိုးမှုနှင့် မူးယစ်ဆေးရောင်းဝယ်မှု ကျူးလွန်သည်ဟု ဖမ်းဆီးထားသူ ၅ ဦးအား သံခြေကျင်းခတ်၍ လူထုရှေ့ လမ်းလျှောက်စေကာ မြို့အတွင်း လှည့်လည်ပြသခဲ့ကြောင်း သိန္နီမြို့နယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“အမျိုးသား ၃ ယောက်က ဆိုင်ကယ်ခိုးမှုနဲ့ ဖမ်းခံရတာ။ အမျိုးသမီးတစ်ယောက်က မူးယစ်ဆေးရောင်းဝယ်မှုနဲ့၊ ကျန်အမျိုးသားတစ်ယောက်ကတော့ မီးကြိုးခိုးလို့ ဖမ်းခံရတာ။ အဲဒီထဲမှာ ၂ ယောက်က သိန္နီဒေသခံတွေဖြစ်ပြီး၊ ၃ ယောက်ကတော့ တခြားမြို့ကလာတဲ့သူတွေပါ” ဟု ၎င်းက ပြောသည်။

အဆိုပါ ပြစ်မှုကျူးလွန်သူများကို မြို့အတွင်း လူထုရှေ့ လှည့်လည်ပြသစဉ် ၎င်းတို့၏ ရင်ဘတ်တွင် “ခိုးမှု” နှင့် “မူးယစ်ဆေးရောင်းဝယ်မှု” ဟု ရေးသားထားသည့် စာတန်းများ ချိတ်ဆွဲထားပြီး၊ မိမိတို့သည် သူခိုးဖြစ်ကြောင်း အော်ဟစ်ပြောဆိုခိုင်းခဲ့ကြောင်းလည်း သိရသည်။

“၁၀၂၇” စစ်ဆင်ရေးနောက်ပိုင်း သိန္နီမြို့နယ်ကို MNDAA က ထိန်းချုပ်လာပြီးနောက် အခြားမြို့နယ်များမှ ပြောင်းရွှေ့လာသူများနှင့် တရုတ်နိုင်ငံသားများ ဝင်ရောက်လာမှု များပြားလာကြောင်း၊ ထို့ပြင် လယ်ယာမြေများကို တရုတ်လုပ်ငန်းရှင်များက ဈေးမြင့်ပေး၍ ဝယ်ယူမှုများလည်း ဖြစ်ပေါ်နေကြောင်း ဒေသခံများထံမှ သိရသည်။

သျှမ်းပြည်မြောက်ပိုင်း၏ အဓိကကုန်သွယ်ရေးလမ်းကြောင်းပေါ်တွင် တည်ရှိသည့် သိန္နီမြို့နယ်ကို MNDAA က သိမ်းပိုက်ထိန်းချုပ်ပြီးနောက် ကိုးကန့်အထူးဒေသ (၁) အဖြစ် သတ်မှတ်ကာ ၂၀၂၃ ခုနှစ် အောက်တိုဘာလမှစ၍ အုပ်ချုပ်ရေးယန္တရားကို စတင်လည်ပတ်ခဲ့သည်။