သျှမ်း – ကရင်နီ (ကယား) နယ်စပ်ဒေသ တကြောတွင် စစ်ကောင်စီမှ စားနပ်ရိက္ခာများ သယ်ယူခွင့် တင်းကြပ်နေသဖြင့် စစ်ရှောင်များ တောတောင်ထဲရှိ ဟင်းသီးဟင်းရွက်များကိုသာ ရှာဖွေစားသောက်နေကြောင်း သတင်းရရှိသည်။

စစ်ရေးတင်းမာနေသည့် နယ်စပ်ဒေသတလျောက်တွင် စစ်ကောင်စီသည် ဆေးဝါး နှင့် စားနပ်ရိက္ခာများ သယ်ယူခွင့်ကို တားမြစ်ထားသောကြောင့် လုံလောက်သည့် ဆန်၊ ဆီ၊ ဆားများ မရှိကာ စစ်ရှောင်များသည် ချွေသာပြီး စားနေရကြောင်း ဖယ်ခုံ စစ်ရှောင်ကူညီသူ တစ်ဦးက ပြောသည်။

“လမ်းကြောင်းမှာ စားနပ်ရိက္ခာတွေ သယ်ယူဖို့က ခက်တယ်။ အရင်သယ်နေကျလည်း တိုက်ပွဲကြောင့် ပိတ်ထားရတယ်။ ရတဲ့လမ်းကြောင်းတွေမှာက PNO စစ်သားတွေ စောင့်ပြီး ပိုက်ဆံတောင်းတယ်။ ဆန်၊ ဆီ ပေးမသယ်ဘူး။ ဒီဇယ်တောင်မှ အခွန်ဆောင်ပြီး ပေးရတာ။ အလှူရှင်ရှိမှ ကျနော်တို့ စစ်ရှောင်တွေ ဆန်ဝေပေးရတယ်။ မရှိရင် ကြံဖန်ပြီး ဝယ်ရတယ်။ ချွေသာပြီး စားရတယ် “ ဟု ၎င်း စစ်ရှောင်ကူညီသူတစ်ဦးက ပြောသည်။

ဖယ်ခုံမြို့နယ်ရှိ စစ်ရှောင်ဦးရေ (၇) ထောင် အတွက် တစ်လလျှင် ဆန်အိတ်ပေါင်း ၂၀၀ ကျော် မျှဝေသာပေးရကြောင်း ၎င်းကဆိုသည်။

အလားတူ လွိုင်ကော် နှင့် ဖားဆောင်းမြို့အကြား ဒီးမော့ဆို၊ ဖရူဆို နှင့် သျှမ်းပြည်နယ်စပ်ဒေသ ဖယ်ခုံ၊ မိုးဗြဲမြို့ရှိ စစ်ရှောင်များ ထွက်ပြေးလာစဉ် အချိန်ကြာလာသည်နှင့်အမျှ ဆေးဝါး နှင့် စားနပ်ရိက္ခာများကို ကူညီထောက်ပံ့ပေးသည့် အလှူရှင်များလည်း နည်းပါးလာခဲ့သည်။

လက်ရှိ စစ်ရှောင်များ နေထိုင်သည့်နယ်မြေအတွင်း အလုပ်အကိုင် အခွင့်အလမ်းမရှိကာ ဝင်ငွေလည်းမရှိတော့သဖြင့် စားနပ်ရိက္ခာတချို့ကို အလှူရှင်မှ ထောက်ပံ့မှုလွဲ၍ လိုအပ်ချက်များကို ကိုယ်တိုင်ဖြေရှင်းနေရကြောင်း ဒီးမော့ဆိုစစ်ရှောင် ကူညီသူတစ်ဦးက ပြောသည်။

“ဆန်ပြတ်တဲ့ မိသားစုတွေတော့ စခန်းကော်မတီထံ လက်မှတ်နဲ့ သွားတောင်းရတယ်။ ဒီမှာက အရေးပေါ် အတွက် လာယူတဲ့နေရာတော့ ရှိတာပေါ့နော်။ ဒါပေမယ့် အလှူရှင်တွေက အများကြီး မပေးထားဘူး။ တစ်ယောက်ကို ၁ ပြည်၊ ၂ ပြည်နှုန်းပဲ ပေးနိုင်တယ်။ လက်မှတ်နဲ့ ဟိုမှာလိုက်တောင်းလိုက်၊ ဒီမှာလိုက်တောင်းလိုက် လုပ်ရတာပေါ့“ ဟု ၎င်း စစ်ရှောင်ကူညီတစ်ဦးက ပြောသည်။

အလှူရှင်များ ထောက်ပံ့သည့် စားနပ်ရိက္ခာတချို့ နှင့် စစ်ရှောင်များသည် တောတောင်ထဲရှိ ဟင်းသီးဟင်းရွက်များကိုသာ ရှာခူးပြီးစားရ၍ (အသား၊ ငါး) ဟင်းကို ကြာကြာနေမှသာ တစ်ခါ စားရကြောင်း ၎င်းကဆိုသည်။

တိုက်ပွဲနယ်မြေ ဖြစ်သည့်အလျာက် လမ်းပန်းဆက်သွယ်ရေးခက်ခဲရာမှ လက်ရှိတွင် ရွှေဘိုပေါ်ဆန်းမွှေး ၂၄ ပြည်အိတ် တစ်အိတ်ကို ကျပ်ငွေ ၁ သိန်း ဝန်းကျင်ရှိပြီး ကြက်ဉတစ်လုံးကို ကျပ်ငွေ ၃၀၀ ကျော်၊ ၄၀၀ ဝန်းကျင်အထိ ဈေးနှုန်း မြင့်တက်နေသည်။

အဆိုပါ ကုန်ဈေးနှုန်း အဆမတန်မြင့်တက်နေသည့် ကာလအတွင်း အလှူရှင်ထောက်ပံ့မှုများ ပြတ်တောက်ပါက စစ်ရှောင်များသည် စားနပ်ရိက္ခာ ပြတ်လပ်မှုနှင့် ကြုံတွေ့ခဲ့ရကြောင်း စစ်ရှောင်ကူညီသူများက ပြောသည်။

အလားတူ မိုးဗြဲမြို့ စစ်ရှောင်အမျိုးသားတစ်ဦးက “ ဒီဆည် (ရေကာတာ) အောက်မှာ စိုက်ပျိုးလို့ မရဘူး။ စစ်ကောင်စီက လက်နက်ကြီးတွေနဲ့ ရမ်းထုတာ။ ဖယ်ခုံဘက်က မိုးပေါက်ရင်တော့ စပါးနည်းနည်း စိုက်လို့ရသေးတယ်။ အခု ကျနော်တို့တော့ အကူညီလိုအပ်နေတာပေါ့။ ပေးနိုင်ရင်တော့ ဝမ်းသာမှာပါ “ ဟု ၎င်းက ဆိုသည်။

ယင်းကဲ့သို့ စားနပ်ရိက္ခာများ လုံလောက်စွာ ထောက်ပံ့မှု မရှိခြင်းကြောင့် စစ်ရှောင်များသည် အစာအာဟာရပြတ်လပ်နေပြီး နေမကောင်း၊ မကျန်းမာသည့် အချိန်၌ ဆေးဝါးလုံလောက်မှု မရှိသောကြောင့် အာဏာသိမ်း ၂ နှစ်ကျော် ကာလအတွင်း စစ်ရှောင် ၁၄၂ ဦး သေဆုံးခဲ့ကြောင်း တိုးတက်သော ကရင်နီပြည်သူ့အင်အားစုက အောက်တိုဘာလ ၁ ရက်တွင် ထုတ်ပြန်ထားသည်။