ယခုနှစ် (၂၀၂၃) ခုနှစ်အတွင်း အွန်လိုင်း လိမ်လည်မှု (၁၁၉) မှု မှ တရားခံ (၇၆) ဦး နှင့် အွန်လိုင်း လောင်းကစားမှု (၅၈) မှု မှ တရားခံ ၁၃၄ ဦးတို့ ဖော်ထုတ်အရေးယူနိုင်ခဲ့ကြောင်း စစ်ကောင်စီ ထုတ် မြန်မာ့အလင်း သတင်းစာတွင် ယနေ့ (အောက်တိုဘာ ၂)ရက်စွဲ၌ ရေးသားထားသည်။
အဆိုပါ အွန်လိုင်း လိမ်ညာမှုနှင့် အွန်လိုင်း လောင်းကစားမှု မှ တရားခံများကို ယခုနှစ် ဧပြီ (၁) ရက်မှ ဇွန် (၁၆) ရက်အထိ စစ်ဆင်ရေးကာလ သတ်မှတ်ပြီး တရုတ် – မြန်မာ – ထိုင်း (၃) နိုင်ငံ နားလည်မှုဖြင့် ထိရောက်စွာ ပူးပေါင်းဆောက်ရွက်ခဲ့ဖြင့် ဖော်ထုတ်အရေးယူနိုင်ခဲ့ကြောင်း ယနေ့ ထုတ် သတင်းစာတွင် ရေးသားထားသည်။
စစ်တပ်အာဏာသိမ်းပြီးနောက်ပိုင်း မြန်မာနိုင်ငံ နယ်စပ်ဒေသတလျောက်တွင် အွန်လိုင်းလိမ်လည်မှုနှင့် လောင်းကစားမှု ပိုမိုများပြား လာနေကြသည်။
အွန်လိုင်း လိမ်လည်မှုများနှင့် လောင်းကစားမှုများသည် တရုတ်နယ်ဒေသဖြစ်သည့် ကိုးကန့်ဒေသ၊ ဝ ဒေသနှင့် မူဆယ်မြို့တွင် အများအပြားရှိနေပြီး ထိုင်းနယ်စပ်ဒေသ တာချီလိတ်၊ ကျိုင်းတုံနှင့် ကရင်ပြည်နယ် မြဝတီနှင့် ရွှေကုက္ကုလ်မြို့မှာ ရာနှင့်ချီအွန်လိုင်း လိမ်လည်မှုများ ကြီးစိုးနေကြောင်း သိရသည်။
တရုတ်နယ်စပ်ဒေသရှိ အဆိုပါ လုပ်ငန်းများမှာ လက်နက်ကိုင်တပ်ဖွဲ့များမှ လုံခြုံရေးအစောင့်တပ်အဖြစ် လုပ်ကိုင်နေကြသည်။
ပြီးခဲ့သည့် စက်တင်ဘာလ ၁၆ ရက် တရုတ်နယ်စပ်ဒေသ မူဆယ်မြို့ရှိ ကျင့်ဝှေဟွမ် ဟိုတယ်၊ ရီရှင်း ကုမ္ပဏီ၊ ခိုင်ဝေ နှင့် AK ကုမ္ပဏီ စသည့် ဟိုတယ် ၈ ခုမှ ကျားဖြန့်လုပ်ကိုင်သူနှင့် အွန်လိုင်းလိမ်လည်သူများကို စစ်ကောင်စီနှင့် ပြည်သူ့စစ်ပူးပေါင်းပြီး ဝင်ရောက်ဖမ်းဆီးခဲ့သည်။
“ တရုတ်တွေက ဖမ်းခိုင်းလို့ သူတို့ကဟန်ပြပြီး ဖမ်းရတာပေါ့။ ဒီအွန်လိုင်းလိမ်လည်မှု၊ ကျားဖြန့်လုပ်တဲ့သူတွေ ကလည်း ပြည်သူ့စစ်က တပ်စောင့်လုပ်ပေးတာကို စစ်ကောင်စီက ဖမ်းခိုင်းပြီဆိုရင် သူတို့က ဟန်ပြပြီး လုပ်ပေးတာ “ ဟု မူဆယ်မြို့ ဒေသကျွမ်းကျင်သူတစ်ဦးက ပြောသည်။
အလားတူ စက်တင်ဘာလ ၆ ရက်နှင့် ၇ ရက်တွင် “ဝ” ဒေသအတွင်း ရဲတပ်ဖွဲ့မှ အွန်လိုင်းလိမ်လည်သူ တရုတ်နိုင်ငံသား (၁,၂၀၇) ဦးကို ဖမ်းဆီးရမိပြီး တရုတ်နိုင်ငံရဲတပ်ဖွဲ့ထံသို့ လွှဲပြောင်းပေးအပ်ခဲ့ ရသည်။
