ရှမ်းတိုင်းရင်းသားများ ဒီမီကရေစီအဖွဲ့ချုပ် SNLD (ကျားခေါင်းပါတီ) ၏ အတွင်းရေးမှူးဟောင်း ဦးစိုင်းတင်လှိုင် ယနေ့ (မေလ ၁၇) ရက် နံနက်အစောပိုင်းတွင် ကွယ်လွန်သွားကြောင်း သိရသည်။
SNLD အတွင်းရေးမှူးဟောင်း ဦးစိုင်းတင်လှိုင်သည် လူကြီးရောဂါဖြင့် နေအိမ်တွင်ကွယ်လွန်သွားခြင်းဖြစ်ပြီး ကွယ်လွန်ချိန်၌ အသက် ၈၄ နှစ်အရွယ်ရှိပြီဖြစ်ကြောင်း SNLD ရုံးအဖွဲ့မှူး လုံးစိုင်းရွှေကြူးက သျှမ်းသံတော်ဆင့်ကိုပြောသည်။
“ဒီနေ့မနက် ၄ နာရီလောက်ကအိမ်မှာပဲ ဆုံးသွားတာဗျ။ အသက်ကတော့ ၈၄ နှစ်ရှိပြီ။ သူလည်းအရင်တုန်းကတော့ လှုပ်ရှားခဲ့တော်တော်လေးရှိတယ်။ အခုတော့ အသက်ကြီးပိုင်း ရောက်လာတဲ့အခါကျတော့ သူလည်းနားနေရာပေါ့ဗျာ။ နောက်လည်းကျန်းမာရေးမကောင်းတော့ လူကြီးရောဂါပေါ့။ အခုကလူကြီးရောဂါနဲ့ဆုံးသွားတာ” ဟု ၎င်းကပြောသည်။
ဦးစိုင်းတင်လှိုင်သည် SNLD အတွင်းရေးမှူးတာဝန်ကို (SNLD ဥက္ကဋ္ဌဦးခွန်ထွန်းဦး ထောင်တွင်းအကျဉ်း ကျချခံရစဉ်ကာလ) ၂၀၀၅ ခုနှစ်မှ ၂၀၁၂ ခုနှစ်အထိ ၇ နှစ်ကြာ တာဝန်ထမ်းဆောင်ခဲ့သည်။
“သူ(ဦးစိုင်းတင်လှိုင်) က ကျနော်တို့အတွက် ပြောရမယ်ဆိုရင် အဲ့အချိန်တွဲဖက်အတွင်းရေးမှူး အနေနဲ့ပေါ့။ ကျနော်တို့ပါတီရဲ့ ပေးအပ်တဲ့တာဝန်ကိုသူထမ်းဆောင်ခဲ့တယ်။ ၂၀၀၅ ကနေ ၂၀၁၂ နှောင်ပိုင်းအထိပေါ့။ နောက်ပိုင်းမှာတော့ လူကြီးတွေပြန်လာတဲ့အခါကျတော့ ကျနော်တို့အထွေထွေအတွင်းရေးမှူး လုံးစိုင်းနွတ် ဥက္ကဋ္ဌပြန်လာတဲ့ အချိန်ကျ သူလည်းနည်းနည်းအသက်ပိုင်းရတော့ နားနေခွင့်တောင်းတော့သူနားနေပါတယ်။ နောက်ပိုင်းတော့ ကျန်းမာရေးပေါ့ဗျာ။ လူကြီးရောဂါ လေဖြန်းတာတို့ ဘာတို့ဖြစ်တာပေါ့ဗျာ။ အဲ့ကနေ ဆုံးပါးသွားတဲ့အထိ လူကြီးရောဂါပါပဲ” ဟု လုံးစိုင်းရွှေကြူးက ပြောသည်။
ဦးစိုင်းတင်လှိုင်သည် SNLD အတွင်းရေးမှူးတာဝန်အဖြစ် တာဝန်ထမ်းဆောင်ခဲ့သူသာမက တွဲဖက်အတွင်းရေးမှူးတာဝန်ပါ ထမ်းဆောင်ခဲ့ပြီး လက်ရှိ SNLD ဥက္ကဋ္ဌ ဦးစိုင်းညွန့်လွင်၏ အစ်ကိုလည်းဖြစ်သည်။
ဦးစိုင်းတင်လှိုင်၏ ကြွင်းကျန်ရစ်သော ရုပ်အလောင်းကို လာမည့် မေလ ၁၉ ရက်တွင် ရန်ကုန်မြို့၊ ရေဝေးသုဿာန်တွင် သင်္ဂြိုဟ် သွားမည်ဖြစ်ကြောင်း နီးစပ်သူများထံသိရသည်။
စစ်တပ်အာဏာသိမ်းပြီးနောက်ပိုင်း စစ်ကောင်စီသည် ရွေးကောက်ပွဲကိုပြန်လည်ကျင်းပရန် ၎င်းတို့ပြဋ္ဌာန်းထားသည့် နိုင်ငံရေးပါတီများ မှတ်ပုံတင်ခြင်း ဥပဒေသစ်တွင် မှတ်ပုံပြန်တင်ခိုင်းရာ
ရှမ်းတိုင်းရင်းသားများ ဒီမိုကရေစီအဖွဲ့ချုပ် SNLD ပါတီအပါအဝင် နိုင်ငံရေးပါတီပေါင်း ၄၀ က မှတ်ပုံတင်ခြင်းမရှိသည့်အတွက် ဖျက်သိမ်းခြင်းခံခဲ့ရသည်။
Leave a Comments