သျှမ်းလူထုထောက်ခံမှုအများဆုံးရသည့် ပါတီဖြစ်သည့် ရှမ်းတိုင်းရင်းသားများ ဒီမိုကရေစီ အဖွဲ့ချုပ် (SNLD) ပါတီ မှတ်ပုံပြန်တင်ရန်၊ မတင်ရန် ကိစ္စနှင့် ပတ်သက်ပြီး ဆွေးနွေးမှုများ ပြုလုပ်နေကြောင်း စုံစမ်းသိရသည်။

စစ်ကောင်စီလက်အောက်တွင် ကျင်းပမည့် ရွေးကောက်ပွဲကို ဝင်ရောက်ယှဉ်ပြိုင်ရန် အတွက် ယခုရက်ပိုင်းတွင် လူမျိုးစုများဘက်မှ နိုင်ငံရေးပါတီများအဖြစ် ထပ်မံဖွဲ့စည်းခဲ့ကြပြီး ရွေးကောက်ပွဲ ကော်မရှင်ဆီ ကို မှတ်ပုံတင်နေကြသည်။

ရွေးကောက်ပွဲအတွက် ကြိုတင်ပြင်ဆင်နိုင်ရန် အတွက် နိုင်ငံရေးပါတီ တည်ထောင်ခွင့်များကို ယခု လ (မေ ၉)ရက် နောက်ဆုံးထားပြီး လျှောက်ထားရမည်ဟု ပြည်ထောင်စုရွေးကောက်ပွဲကော်မရှင်က ကြေညာထားသည်။

“ ဒီရက်ပိုင်း ကျနော်တို့ SNLD အနေနဲ့ နိုင်ငံရေးပါတီ မှတ်ပုံပြန်တင်ဖို့ ကိစ္စတွေ ဆွေးနွေးတာတွေရှိပါတယ်။ တချို့ကလည်း ပြန်တင်ချင်တယ်။ တချို့ကလည်း မှတ်ပုံပြန်မတင်ချင်ဘူး။” ဟု SNLD ပါတီ အဖွဲ့ဝင် တစ်ဉီးက သျှမ်းသံတော်ဆင့်ကို ပြောသည်။

ထို့ကြောင် SNLD ပါတီ အနေဖြင့် မည်ကဲ့သို့ ဆုံးဖြတ်ထားသည်ကို သျှမ်းသံတော်ဆင့် အနေဖြင့် ဆက်လက်စုံစမ်းနေဆဲပါ။

စစ်ကောင်စီလက်အောက်ခံ ရွေးကောက်ပွဲ ကော်မရှင်ထံတွင် လက်ရှိ နိုင်ငံရေးပါတီနှစ်ခု တည်ထောင်ခွင့်လျှောက်ထား သည့် မျိုးဆက်သစ် ဝံသာနုပါတီနှင့် ဇိုမီးအမျိုးသားပါတီတို့ကို ဧပြီလနှောင်းတွင် နိုင်ငံရေးပါတီ အဖြစ် တည်ထောင်ခွင့် လာရောက်လျှောက်ထားသည်ဟု ပြည်ထောင်စု ရွေးကောက်ပွဲ ကော်မရှင်က ထုတ်ပြန်ထားသည်။

ယခုနှစ် ဒီဇင်ဘာလကုန်ပိုင်း သို့မဟုတ် လာမည့်နှစ် ဇန်နဝါရီလဆန်းပိုင်းမှာ ရွေးကောက်ပွဲလုပ်ရန် စစ်တပ်က ပြင်ဆင်နေခြင်းဖြစ်ပြီး ဝင်ရောက်ယှဉ်ပြိုင်မည့်ပါတီ စုစုပေါင်း ၇၀ ကျော်ရှိသည်။ အဆိုပါ နိုင်ငံရေးပါတီများအနက် ပါတီ ၅၀ ကို မှတ်ပုံတင်ခွင့်ပြုထားပြီး ပါတီသစ်တည်ထောင်ခွင့် လျှောက်သည့်ပါတီ ၂၁ ခုရှိသည်ဟု UECက ထုတ်ပြန်ထားသည်။

နိုင်ငံရေးပါတီအဖြစ် တည်ထောင်ခွင့်ပြုနိုင်ရေးအတွက် ပြည်ထောင်စုရွေးကောက်ပွဲကော်မရှင်က ဆက်လက် စိစစ်ဆောင်ရွက်နေတယ်လို့လည်း ဆိုပါတယ်။

လက်ရှိအချိန်ထိ နိုင်ငံရေးပါတီ တည်ထောင်ခွင့်လျှောက်ထားသော ပါတီ၂၄ ပါတီရှိပြီး နိုင်ငံရေးပါတီအဖြစ် ဆက်လက်တည်ထောင်ခွင့်နှင့် မှတ်ပုံတင်ခွင့်လျှောက်ထားသည့် ပါတီ ၅၀၊ စုစုပေါင်း ၇၄ ပါတီရှိကြောင်း သိရသည်။

ထို့အပြင် အမျိုးသားဒီမိုကရေစီအဖွဲ့ချုပ် NLD ပါတီဝင်အချို့လည်း စစ်ကောင်စီ၏ ရွေးကောက်ပွဲကော်မရှင်ထံ ပါတီ ပြန်လည်မှတ်ပုံတင်ရန် ပါတီဥက္ကဋ္ဌ ဒေါ်အောင်ဆန်းစုကြည်ထံ သွားရောက်ခွင့်တောင်းခဲ့ရာ ဒေါ်အောင်ဆန်းစုကြည်က လက်မခံခဲ့ကြောင်းလည်းသိရသည်။