ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) သည် အမျိုးသားညီညွတ်ရေးအစိုးရ (NUG) ထံသို့ ပြည်ထောင်စုနေ့ အထိမ်းအမှတ် သဝဏ်လွှာကို ပထမဆုံးအကြိမ် ပေးပို့ခဲ့ကြောင်း သတင်းသိရသည်။

ယနေ့ (ဖေဖော်ဝါရီ ၁၂ ရက်)တွင် ကျရောက်သည့် (၇၇)နှစ်မြောက် ပြည်ထောင်စုနေ့ အထိမ်းအမှတ်အဖြစ် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA)၊ ချင်းအမျိုးသားတပ်ဦး (CNF) နှင့် ကချင်လွတ်လပ်ရေးတပ် (KIO/KIA) ၃ ဖွဲ့တို့ ပူးတွဲ၍ အမျိုးသားညီညွတ်ရေးအစိုးရ (NUG) ထံသို့ သဝဏ်လွှာ ပေးပို့ခဲ့ကြသည်။

၎င်းသဝဏ်လွှာထဲတွင် ပြည်သူလူထုတစ်ရပ်လုံး ပါဝင်ဆင်နွှဲနေသော နွေဦးတော်လှန်ရေးအချိန်၌ အာဏာရှင်စနစ်မှန်သမျှကို တွန်းလှန်ချေမှုန်းကာ အကောင်အထည်ဖော် ဆောင်ရန် ပျက်ကွက်ခဲ့ကြသော ပင်လုံစာချုပ်၊ ပင်လုံကတိကဝတ်နှင့် ပင်လုံသဘောတူညီချက်များ ကို ပြန်လည်ဖော်ဆောင်ခြင်းဖြင့် နှစ်ပေါင်းရှည်ကြာစွာ ဖြစ်ပွားနေသော ပြည်တွင်းပဋိပက္ခများ ချုပ်ငြိမ်းသွားနိုင်မည်ဟု မျှော်လင့်ကြောင်း ရေးသားထားသည်။

အလားတူ ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) ဦးဆောင်ပါဝင်ပြီး အဖွဲ့ဝင် (၁၂)ပါတီ ရှိသည့် ဖက်ဒရယ်ဖော်ဆောင်ရေး ပြည်သူ့ကိုယ်စားလှယ်များ ကော်မတီ (PRCF)မှလည်း ဖက်ဒရယ်ဒီမိုကရေစီ ပြည်ထောင်စုဖွဲ့စည်းပုံ အခြေခံဥပဒေကို ယနေ့ (ဖေဖော်ဝါရီ ၁၂ ရက်)တွင် ထုတ်ပြန်ကြေငြာလာသည်။

အာဏာရှင်စနစ် ပပျောက်ရေး၊ ဒီမိုကရေစီနှင့် လူ့အခွင့်အရေးတို့ကို အာမခံသည့် ဖက်ဒရယ်ဒီမိုကရေစီ ပြည်ထောင်စုအဖြစ် တည်ဆောက်ရန် ကျင့်သုံးနိုင်မည့် ဖွဲ့စည်းပုံအခြေခံဥပဒေ တစ်ရပ်ကို တိုင်းရင်းသားပေါင်းစုံ စုပေါင်းပါဝင်ထားသော PRCF က ဖေဖော်ဝါရီလ ၃ ရက်နေ့တွင် အထူးစုံညီ အစည်းအဝေး ကျင်းပပြီး ကန့်ကွက်သူမရှိ အတည်ပြုနိုင်ခဲ့သည်။

PRCF မှ ယခုထုတ်ပြန်လာသည့် ဖက်ဒရယ်ဒီမိုကရေစီ ပြည်ထောင်စုဖွဲ့စည်းပုံ အခြေခံဥပဒေကို စုပေါင်းခေါင်းဆောင်မှု၊ စုပေါင်းအင်အားဖြင့် စုပေါင်းပိုင်ဆိုင်သော ပြည်ထောင်စုကို ပြန်လည် တည်ဆောက်ရန် ရည်ရွယ်၍ ရေးဆွဲပြဋ္ဌာန်းခြင်းဖြစ်ကြောင်း သိရသည်။

အမျိုးသားညီညွတ်ရေးအစိုးရ (NUG)က လက်ခံအတည်ပြုထားသည့် ဖက်ဒရယ်ဒီမိုကရေစီ ပဋိညာဉ် ကို ရေးဆွဲရာတွင်လည်း ၂၀၂၁ မတ်လအတွင်းက PRCF အနေဖြင့် ပါဝင်ခဲ့ကြောင်း ဖော်ပြထားသည်။

ယနေ့ (ဖေဖော်ဝါရီလ ၁၂ ရက်)တွင် ကျရောက်သည့် (၇၇)နှစ်မြောက် ပြည်ထောင်စုနေ့ အထိမ်းအမှတ်အဖြစ် နွေဦးတော်လှန်ရေးတွင် ပေါ်ပေါ်ထင်ထင် မပါဝင်ခဲ့သော သျှမ်းတပ် SSPP/SSA နှင့် ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD ပါတီ)တို့သည် သဝဏ်လွှာနှင့် ဖက်ဒရယ်ပြည်ထောင်စု ဖွဲ့စည်းပုံအခြေခံဥပဒေတို့ကို အသီးသီး ထုတ်ပြန်လာကြသည်။