ကမ္ဘာ့ စံချိန်တင် ကြာရှည်နေသည့် ပြည်တွင်းစစ်သည် အမျိုးသားတန်းတူရေးနှင့် ကိုယ်ပိုင်ပြဌာန်းခွင့်ကို လက်မခံသည့် အာဏာရှင်အဆက်ဆက်၏ ကျဉ်းမြောင်းယုတ်ညံ့သော နိုင်ငံရေးကလိမ်ကျမှုကြောင့် သက်ဆိုးရှည်နေခြင်း ဖြစ်သည်ဟုလည်း SNLD ပါတီက ယနေ့ ထုတ်ပြန်သည်။

အာဏာရှင်စနစ်နှင့် ယင်း၏ထောက်တိုင်များအား အပြီးတိုင်ဖယ်ရှားမှသာ နိုင်ငံရေး ပြဿနာ အရပ်ရပ်ကို နိုင်ငံရေးနည်းဖြင့် ဖြေရှင်းနိုင်မည်ဖြစ်ပြီး ခေတ်အခြေအနေနှင့် လိုက်လျောညီထွေသည့် ဖက်ဒရယ် ပြည်ထောင်စုကို စုပေါင်းတည်ထောင်နိုင်မည်ဟု ထုတ်ပြန်ချက်တွင် ဖော်ပြသည်။

ယနေ့ (အောက်တိုဘာလ ၂၆ရက်) တွင် ကျရောက်သည့် ရှမ်းတိုင်းရင်းသားများ ဒီမိုကရေစီ အဖွဲ့ချုပ်(SNLD) ပါတီ တည်ထောင်မှု (၃၆) နှစ်ပြည့် ထုတ်ပြန်ချက်တွင် အထက်ပါ အတိုင်း ဖော်ပြခြင်း ဖြစ်သည်။

အွန်လိုင်းမှ ယနေ့ နံနက်ပိုင်း ကျင်းပသည့် ပါတီ (၃၆) နှစ်ပြည့် အခမ်းအနားတွင် ပါတီ ဥက္ကဌ ဉီးစိုင်းညွန့်လွင် က“အခုကာလမှာ ကပ်ရောဂါဘေးဒဏ်၊ စစ်ဘေးစစ်ဒဏ်၊ သဘာဝဘေးဒဏ်၊ စစ်လက်နက်ဒဏ်၊ မိုးပေါ်က ကျလာတဲ့ ဗုံးဒဏ်၊ မချစ်မနှစ်သက်သူတွေရဲ့ အုပ်ချုပ်ခြင်းကို ခံရတဲ့ဒဏ်၊ ကုန်ဈေးနှုန်း ကြီးမြင့်တဲ့ဒဏ်၊ ရန်သူမျိုးငါးပါးရဲ့ ဒဏ်၊ ဒဏ်ရာ ဒဏ်ချက်ပေါင်းများစွာကို ခံနေကြရတာဖြစ်ပါတယ်။ ဒါတွေဟာ တစ်ပြည်လုံး အတိုင်းအတာနဲ့ ဖြစ်နေတာပါ” ဟု ထောက်ပြ ပြောဆိုသည်။

“ဒါကို တစ်နေရာထဲကွက်ပြီး ကောင်းအောင် လုပ်လို့ မရပါဘူး။ ကိုယ့်တစ်နေရာထဲ ကွက်ပြီးကောင်းနေလို့လည်း အဆင်မပြေနိုင်ပါဘူး။ တစ်နိုင်ငံလုံး အတိုင်းအတာနဲ့ ဖြေရှင်းရမဲ့ ကိစ္စတွေ ဖြစ်နေတယ်ဆိုတာကိုလည်း ရှင်းလင်း ပြချင်ပါတယ်။ ပွင့်ပွင့် လင်းလင်းပြောရရင် မြန်မာပြည်မှာ ဘယ်လိုအာဏာရှင်ကိုမှ ထပ်ပြီး အုပ်စိုးခွင့်မရအောင် ကျနော်တို့ ကြိုးစားနေကြတာ ဖြစ်ပါတယ်။ အာဏာရှင်စိုးမိုးတဲ့ တိုင်းပြည်ကနေ ပြည်သူ့ကိုယ်စားလှယ်တွေ စိုးမိုး အုပ်ချုပ်တဲ့ တိုင်းပြည်ဖြစ်လာအောင် ကြိုးစား အားထုတ်ကြတာ ဖြစ်ပါတယ်”ဟု ဦးစိုင်းညွန့်လွင် က ဆက်ပြောသည်။

ထို့အပြင် နိုင်ငံအနှံ့အပြားနှင့် ရှမ်းပြည်နယ်မြောက်ပိုင်းနေ ပြည်သူများ၊ ပါတီဝင်များအး နိုင်ငံရေးပါတီ အနေဖြင့် ကာကွယ် မပေးနိုင်၍ စိတ်မကောင်းဖြစ်ရပြီး စိတ်ဓာတ်ကြံ့ခိုင်ရန်၊ စည်းလုံးညီညွတ်ကြရန် ၎င်းက တိုက်တွန်းသည်။

လက်ရှိ သျှမ်းများ အနေဖြင့် စစ်ရေး၊ နိုင်ငံရေး ဘက်စုံ အကျပ်အတည်း ကြုံတွေ့နေရသည်ကို ဝန်ခံကြောင်း၊ နားလည်မှုရှိသည့် ညီညွတ်ရေး တည်ဆောက်ရမည့် ကာလဖြစ်ကြောင်း၊ မျိုးချစ်စိတ်ဓာတ်ကို အကဲဖြတ်ရမည့် အချိန်အခါဖြစ်ကြောင်း ၎င်းကထောက်ပြသည်။

“ကျနော်တို့ဟာ ကိုယ်မြေ၊ ကိုယ့်ရေ၊ ကိုယ့်ဒေသကို ထားခဲ့ပြီး ရှောင်ထွက်သွားလို့ မရနိုင်တဲ့အတွက် ဘယ်လိုပဲ ဒုက္ခပင်လယ် ဝေနေပါစေ ဇွဲသတ္တိနဲ့ ခိုင်မာတဲ့စိတ်ဓာတ်ကို အရင်းပြုပြီး အဲ့ဒီအခက်အခဲ တွေကို ဖြတ်ကျော်ကြရမှာ ဖြစ်ပါတယ်။ ကျနော်တို့ပါတီ အနေနဲ့ ကိုယ့်ပါတီဝင်တွေ၊ ကိုယ့်မဲဆန္ဒရှင်တွေ၊ ကိုယ့်ကိုအားပေးထောက်ခံနေသူ တွေကို ဒီအတိုင်းပစ်ထားမှာ မဟုတ်ပါဘူး” ဟု ၎င်းက ကတိပြုသည်။

အခမ်းအနား တက်ရောက်လာသည့် KNU ဥက္ကဋ္ဌ ပဒိုစောကွယ်ထူးဝင်း ကလည်း စစ်တပ်သည် လူတစု အကျိုး အတွက် အာဏာကို နည်းမျိုးစုံဖြင့် ရယူနေခဲ့ကြောင်း ပြောသည်။

“စစ်တပ်ဟာ တိုင်းရင်းသား ပြည်သူ တစ်ရပ်လုံး တောင်းဆိုတဲ့ တိုင်းပြည်ရဲ့ အခြေခံ နိုင်ငံရေး ပြဿနာ တစ်ခုဖြစ်တဲ့ ၂၀၀၈ ဖွဲ့စည်းပုံ ဖျက်သိမ်းရေး၊ နိုင်ငံရေးမှ စစ်တပ် ထွက်ခွာရေး၊ နိုင်ငံကို ဖက်ဒရယ် ဒီမိုကရေစီ ပြည်ထောင်စု ဖွဲ့စည်းပုံအရ တည်ဆောက်ရေး အခုအချိန်အထိ ငြင်းပယ်ပြီး စစ်တပ် အာဏာတည်မြဲရေးအတွက် ၂၀၀၈ ဖွဲ့စည်းပုံကို အသုံးချပြီး ပြည်သူတွေရဲ့ ဆန့်ကျင်မှုကို လုံး၀ဥဿုံ စစ်ရေးအရ အင်အားအသုံးချပြီး ရက်စက် လူသားမဆန်စွာ ဖိနှိပ်သတ်ဖြတ်တဲ့ ဖက်ဆစ်စစ်တပ် ကျင့်စဉ်ကို ကျင့်သုံးနေပါတယ်”ဟု ၎င်းက ပြောသည်။

ပြည်တွင်းစစ်ကာလရှည်ကြာသည်နှင့်အမျှ ပြည်ထောင်သားအချင်းချင်းကြား အတူယှဉ်တွဲနေထိုင်သည့် နိုင်ငံရေးစိတ်ဆန္ဒကောင်းများကိုပင် မှေးမှိန်ခမ်းခြောက်လုမတတ် တွန်းပို့လျက်ရှိရာ ငြိမ်းချမ်းစွာ အတူယှဉ်တွဲနေထိုင်ရေးမှုအရ တိုင်းပြည်ကို ပြန်လည်တည်ဆောက်ကြရမည်ဟု SNLD ပါတီ၏ ထုတ်ပြန်ချက်တွင် တိုက်တွန်းသည်။

မတရားသဖြင့် လက်နက်ကိုင် အနိုင်ကျင့်မှုကို မလွဲမရှောင်သာ ဆန့်ကျင်တွန်းလှန် ရမည် ဆိုသော်လည်း တိုက်ခိုက်ရေး အောင်ပွဲများမှသည် ပြည်သူ့နိုင်ငံရေး အောင်ပွဲများအထိ ဆက်လက် သယ်ဆောင် အနားသတ်ပေးနိုင်မှ တည်ငြိမ်အေးချမ်းမှု အစစ်အမှန် ခံစားရမည်ဟု ဖော်ပြသည်။

ထို့အပြင် လူမျိုးရေးအစွန်းရောက် ကန့်သတ်ခွဲခြား ဆက်ဆံမှုများ မလုပ်ဆောင်မိရန် လိုအပ်ပြီး ပန်းတိုင်ဖြစ်သော တန်းတူညီမျှသည့် ပြည်ထောင်စု တည်ဆောက်ရေး မျက်ခြေမပြတ်ရန် အထူးလိုအပ်သည်ဟုလည်း တိုက်တွန်း ဖော်ပြထားသည်။

SNLD ပါတီကို ၁၉၈၈ ခုနှစ်၊ အောက်တိုဘာလ ၂၆ ရက်တွင် စတင်တည်ထောင်ခဲ့ပြီး စစ်ကောင်စီ လက်အောက်ခံတွင် နိုင်ငံရေးပါတီ အဖြစ် ထပ်မံ မှတ်ပုံတင်ခြင်း မပြုရန် ပါတီက တရားဝင် ဆုံးဖြတ်ထားသည်။

ယနေ့ ကျင်းပသည့် SNLD ပါတီ ၃၆ နှစ်ပြည့် အခမ်းအနားသို့ သျှမ်းအခြေစိုက် သျှမ်းပြည်တိုးတက်ရေးပါတီ (SSPP)၊ သျှမ်းပြည်ပြန်လည်ထူထောင်ရေးကောင်စီ (RCSS)၊ ကရင်အမျိုးသားအစည်းအရုံး(KNU)၊ လူ့ဘောင်သစ်ပါတီ အပါအဝင် တိုင်းရင်းသား တပ်ဖွဲ့ခေါင်းဆောင်များ၊ နိုင်ငံရေးပါတီများ၊ အရပ်ဘက်အဖွဲ့များ တက်ရောက်ခဲ့သည်။