Friday, June 14, 2024

မြန်မာ-တရုတ်နယ်စပ်ဒေသတွင် တရုတ်ဇနီးမယားအဖြစ် ရောင်းစားခံရမှုတိုးလာ

Must read

မြန်မာ-တရုတ်နယ်စပ်ဒေသတွင် အလုပ်အကိုင်ရှားပါးမှုကြောင့် ပွဲစားမျာကအလုပ်ရှာဖွေပေးမည်ဟု မက်လုံးပေးခေါ်ရာမှ တရုတ်ဇနီးမယားအဖြစ် ရောင်းစားခံရမှုတိုးလာနေကြောင်း သိရသည်။

သျှမ်းမြောက်တွင် “၁၀၂၇ စစ်ဆင်ရေး” တိုက်ပွဲဖြစ်ပွားပြီးနောက် နယ်စပ်ဒေသခံများအပါအဝင် စစ်ဘေးရှောင်များသည် အလုပ်လုပ်ကိုင်ရန်အတွက် မူဆယ်မြို့ရှိ နန်းတော်ဂိတ်တွင် ယာယီနယ်စပ်ဖြတ်သန်းခွင့် လက်မှတ် (TBP) သော်လည်းကောင်း၊ ယာယီလက်မှတ် စာအုပ်နီသော်လည်းကောင်း ပြုလုပ်ပြီး တရုတ်ပြည်သို့သွားရောက်အလုပ်လုပ်ခဲ့ခြင်းဖြစ်သည်။

“အလုပ်ရမယ်၊ အလုပ်ပေးမယ်ခေါ်ပြီးတော့ ဟိုရောက်တော့ရောင်းစားလိုက်တာပေါ့။ အခုက မြန်မာပြည်မှာ အလုပ်ကခက်ခဲတော့ တရုတ်ပြည်ကိုလာကြတယ်။ မြန်မာပြည်မှာကနေလို့လည်းမရ၊ အလုပ်တွေမရှိတော့ ရရာအလုပ်များရမလား တက်လာကြတာ။ ဟိုရောက်တော့ရောင်းစားခံရတာ” ဟု ရောင်းစားခံသူများကို ကယ်ထုတ်ပေးခဲ့သည့် လူမှုကူညီရေးအသင်းမှ တာဝန်ခံတစ်ဦးက ပြောသည်။

ရောင်းစားခံရသူများမှာ အသက် ၂၀ ကျော်အရွယ် မြန်မာ-တရုတ်နယ်စပ်ဒေသက ဒေသခံအမျိုးသမီးများ အပါအဝင် မကွေး၊ ပခုက္ကူ၊ ရန်ကုန် စသည့်ဖြင့် အနယ်နယ်အရပ်ရပ်က အမျိုးသမီးများဖြစ်ကြပြီး တရုတ်ပြည်ယူနန်မြို့အထိသို့ ရောင်းစားခံရကြောင်း၊ အမျိုးသမီးတစ်ဦးလျှင် တရုတ်ယွမ် ၅ သောင်း (မြန်မာကာလပေါက်စျေး ကျပ်သိန်း ၂၈၀ နီးပါး) မက်လုံးပေး၍ ခေါ်ခဲ့ကြောင်း သိရသည်။

လက်ရှိတွင် တရုတ်ဇနီးမယားအဖြစ် ရောင်းစားခံရသည့် အမျိုးသမီး ၆ ဦးကို လူမှုကူညီရေးအသင်းက လက်ခံကူညီခဲ့ပြီး သက်ဆိုင်ရာမြို့နယ်သို့ပို့ဆောင်ပေးခဲ့ပြီးပြီဟု ဆိုသည်။

မြန်မာအမျိုးသမီးများရောင်းစားခံရမှုနှင့် ပတ်သက်၍ နှစ်နိုင်ငံကပူးပေါင်းပြီး ခြေရာခံကိုလိုက်မည်ဆိုလျှင်လည်း ခက်ခဲကြောင်း၊ အမျိုးသမီးများရောင်းစားခံရမှု နောက်ကွယ်မှာ လူမှုအဖွဲ့အစည်းနှင့် လက်နက်ကိုင်တပ်ဖွဲ့တချို့ ပါဝင်ပတ်သက်နေကြောင်း လူမှုကူညီရေးအသင်းက ပြောသည်။

“ကျနော်တို့စုံစမ်းရသလောက်ဆိုရင် ပွဲစားတွေကအဖွဲ့အစည်းပိုင်းကလည်းပါတယ်။ လက်နက်ကိုင်တွေပါတယ်။ ကျနော်တို့လည်း ဘာမှလုပ်လို့မရဘူး၊ မလုပ်ရဲဘူး။ အဲ့ကြောင့်တချို့အရာတွေကလည်း ကျနော်တို့တင်မပြတာ အများကြီးပဲ။ ဘာကြောင့်လည်းဆိုတော့ ကျနော်တို့လုပ်လိုက်တဲ့အခါကျမှ မလွတ်ကင်းတဲ့ဟာများတာကြောင့် ကျနော်တို့လည်းငြိမ်နေရတယ်။ ကျနော်တို့လည်း လက်လှမ်းမှီသလောက်ဟာပဲ လုပ်ပေးနိုင်တယ်” ဟု ၎င်းထပ်လောင်းပြောသည်။

ထို့အပြင် ရောင်းခံစားရမှုဖြစ်စဉ်တချို့တွင် သူငယ်ချင်း အချင်းချင်းဖြစ်သူမှ အလုပ်ရှာဖွေပေးမည်ဟု လိမ်လည်ပြီး တရုတ်ပြည်သို့ ခေါ်ဆောင်ကာ ရောင်းစားခဲ့ကြောင်း၊ အချို့တွင်ကာယကံ ရှင်ဖြစ် သူကိုယ်တိုင်က သဘောတူလက်ခံပြီး မိမိကိုယ်ကို ပြန်လည်ရောင်းစားခဲ့ကြောင်း ဆိုသည်။

စစ်တပ်အာဏာသိမ်းပြီးနောက်ပိုင်း မြန်မာနိုင်ငံ တိုင်းနှင့်ပြည်နယ်အသီးသီးမှာ စစ်ရေးပဋိက္ခများဖြစ်ပွားလာခဲ့ရာ ပြည်သူများသည် စစ်ပြေးနေရသည်ကတစ်ကြောင်း၊ စီးပွားရေးကျဆင်း၍ အလုပ်အကိုင်မဖြစ်သည်က တစ်ကြောင်းနှင့် စစ်မှုထမ်းဥပဒေကိုကြောက်ရွံ့၍ ပြည်ပသို့ထွက်ပြေးနေသူများကတစ်ကြောင်း စသည့်ဖြင့် ပြည်ပသို့ထွက်ပြေးလာကြသည်။

Leave a Comments

- Advertisement -spot_img

Latest article