သျှမ်းပြည် မူဆယ်မြို့နယ်အတွင်း အာဏာသိမ်း စစ်ကောင်စီ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့ တိုက်ပွဲကြောင့် နေအိမ် ပျက်စီးရသည့်အပြင် အရပ်သား အမျိုးသမီး (၃) ဦးလည်း ထိခိုက် ဒဏ်ရာရကြောင်း စုံစမ်းသိရသည်။
.
ယမန်နေ့ (စက်တင်ဘာလ ၁၉) ရက် ညနေပိုင်း (၅) နာရီဝန်းကျင် အချိန်တွင် မူဆယ်မြို့နယ်၊ စယ်လန့်ကျေးရွာ အုပ်စု အနီး၌ နှစ်ဖက် တပ်ဖွဲ့ ထိတွေ့တိုက်ပွဲဖြစ်ပွားရာ စစ်ကောင်စီဘက်မှ လက်နက်ကြီးများဖြင့် ရမ်းသမ်းပစ်ခတ်ခဲ့ကြောင်း သိရသည်။
လက်နက်ကြီးများဖြင့် ရမ်းသမ်းပစ်ခတ်မှုကြောင့် မူဆယ်မြို့နယ် တိန်းလုံကျေးရွာအုပ်စု၊ စန်းဆာကျေးရွာအတွင်းသို့ လက်နက်ကြီး ကျရောက်ပေါက်ကွဲပြီး နေအိမ် (၂) လုံး ထိမှန်ကာ နေအိမ်အတွင်း ရှိနေသည့် အမျိုးသမီး (၃) ဦး လည်း ထိမှန် ဒဏ်ရာရခဲ့ကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“လက်နက်ကြီးက စန်းဆာတောင်ကနေ ပစ်လာခဲ့တာလို့တော့ ထင်ရတယ်၊ အတိအကျတော့ မသိရပါဘူး။ သူတို့က အရပ်လေးမျက်နှာလုံးကို လက်နက်ကြီးနဲ့ ရမ်း ပစ်နေကြလို့ အသံနဲ့ မှန်းပြီး ပြောရတာပါ။ အိမ်သာပေါ်မှာလည်း လက်နက်ကြီးက ကျကွဲတာ၊ ဒဏ်ရာရသူ (၃) ဦးရှိတယ်” ဟု ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ လက်နက်ကြီးထိမှန် ဒဏ်ရာရသည့် အမျိုးသမီးသည် အသက် (၅၀) အရွယ်ရှိ ပါနန်းလင်း နှင့် ပါနန်းဆွမ်း တို့ဖြစ်သည့်အပြင် အသက် ၁၇ နှစ် အရွယ် မိန်းကလေးတစ်ဦးတို့ ဖြစ်ကြကြောင်း သိရသည်။
နေအိမ်ပေါ် လက်နက်ကြီး ကျရောက်ပေါက်ကွဲမှုကြောင့် ထိခိုက်ဒဏ်ရာရသူများသည် ခါး၊ ပေါင် နှင့် ခြေထောက်တို့တွင် ထိခိုက်ဒဏ်ရာရခြင်း ဖြစ်ပြီး ဒဏ်ရာအခြေအနေ မစိုးရိမ်ရကြောင်းလည်း သိရသည်။
ထို့အပြင် ကျေးရွာအတွင်း လက်နက်ကြီး ကျရောက်ပေါက်ကွဲပြီးနောက် စက်တင်ဘာလ (၁၉) ရက် ည (၁၀) နာရီဝန်းကျင် အချိန်တွင်လည်း မူဆယ်မြို့ပေါ် ဟိုနားရပ်ကွက်ဘက်မှ ပစ်ခတ်သံများ ထွက်ပေါ် လာကြောင်းလည်း မူဆယ်ဒေသခံ အသက် (၄၀) ကျော် အမျိုးသား တစ်ဦးက သျှမ်းသံတော်ဆင့်ကို ပြောသည်။
“သေနတ်သံတွေ အရင်ထွက်လာပြီးမှ လက်နက်ကြီးသံတွေ ကြားရတယ်။ မှန်းမိသလောက်တော့ ရဲစခန်းနား မဟုတ်လည်း ဟိုနားရပ်ကွက်ဘက်က ဖြစ်နိုင်တယ်။ အဲ့ဒီ ပစ်ခတ်မှုက နာရီဝက်ကျော်ကြာမှ အသံငြိမ်သွားတာ” ဟု မူဆယ်ဒေသခံ အသက် (၄၀) ကျော် အမျိုးသားက ပြောသည်။
ပြီးခဲ့သည့် စက်တင်ဘာလ (၁၇) ရက်မှ စတင်ကာ စစ်ကောင်စီ နှင့် TNLA တို့ မူဆယ်မြို့နယ်အတွင်း ထိတွေ့တိုက်ပွဲ ပြန်လည် ပြင်းထန်လာခဲ့ခြင်းဖြစ်ပြီး မူဆယ်မြို့နယ်၊ စယ်လန့်ကျေးရွာအုပ်စုမှ ဒေသခံများလည်း နေအိမ်စွန့်ခွာ စစ်ရှောင်ထွက်ပြေး နေရသည်။
အလားတူ စက်တင်ဘာလ ၁၈ ရက် ညနေပိုင်းအချိန်တွင်လည်း စယ်လန့်ကျေးရွာအုပ်စု မန်ကန်ရွာအတွင်း လက်နက်ကြီးကျည်များ ကျရောက်ပေါက်ကွဲပြီး အသက် (၄၀) ဝန်းကျင် အမျိုးသမီးတစ်ဦး လက်နက်ကြီးကျည်စ ထိမှန်မှု ရှိခဲ့သည်။
သြဂုတ်လအတွင်းမှာလည်း စစ်ကောင်စီ နှင့် TNLA တို့ စယ်လန့်ကျေးရွာအုပ်စုအတွင်း တိုက်ပွဲ ဖြစ်ပွားခဲ့ပြီး ဒေသခံနေအိမ်များ ပျက်စီးမီးလောင်သည့်အပြင် အရပ်သားထိမှန် သေဆုံးမှုလည်း ရှိခဲ့သည်။
Leave a Comments