တရုတ်ပြည်သို့ သွားရောက်အလုပ်လုပ်ရန် အတွက် တခြားပြည်နယ်မှ ပြည်သူများသည် မူဆယ်မြို့နယ် နှင့် နမ့်ခမ်းမြို့နယ် ရှိ အိမ်ထောင်စုစာရင်းထဲဝင်ပြီး မှတ်ပုံတင်အတု ပြုလုပ်နေကြောင်း စုံစမ်းသိရသည်။

ပြီးခဲ့သည့် ၂၀၂၃ ဇန်နဝါရီလမှ ပြန်လည်ဖွင့်လှစ်ခဲ့သည့် မြန်မာ – တရုတ် နယ်စပ်တံခါးသည် တရုတ်နိုင်ငံတွင်းသို့ အလုပ်သွားလုပ်လိုပါက မူဆယ်မြို့နယ်၊ နမ့်ခမ်းမြို့နယ် ရှိပြည်သူများသာ သွားလာခွင့်ရကြောင်း သိရသည်။

အခြားဒေသမှ လာသည့် သူများကို တရုတ်နိုင်ငံတွင်းသို့ ဝင်ရောက်ခွင့်မပြုသည့်အတွက် နယ်ခံများထံ အိမ်ထောင်စုစာရင်းထဲ စာရင်းသွင်းခြင်း၊ ၁၃/ မှတ်ပုံတင် ပြုလုပ်ပေးခြင်းများ ပြုလုပ်နေကြောင်း ဒေသခံများက ပြောသည်။

အဆိုပါ အိမ်ထောင်စု စာရင်းသွင်းခြင်း နှင့် ၁၃/ မှတ်ပုံတင်ပြုလုပ်ခြင်းသည် တစ်ဦးလျှင် ကျပ် ၂၅ သိန်း ထိရှိကြောင်း လည်း သိရသည်။

“ ဟိုနေ့က မူဆယ်သွားတော့ လူတစ်ယောက် လာမေးတယ်။ စာအုပ်အနီလုပ်ချင်လားတဲ့။ သူတို့သူများ အိမ်ထောင်စုကို ဝယ်ပြီးတော့ နာမည်ထည့်ပေးမယ်တဲ့။ တစ်ယောက်ကို ၂၅ သိန်းပဲတဲ့။ မှတ်ပုံတင်လုပ်ဖို့လည်း ရောင်းဝယ်ရေး လိုဖြစ်နေတယ်။ ၂၅ သိန်းဆိုတာလည်း ဈေးကြီးတာ မဟုတ်ဘူး။ တရုတ်နိုင်ငံထဲကို ရောက်သွားရင် ၂ လလောက် အလုပ်လုပ်ရင် ပြန်ရပြီ”ဟု မူဆယ်မြို့ ဒေသခံလူငယ်အမျိုးသားတစ်ဦးက သျှမ်းသံတော်ဆင့်ကိုပြောသည်။

လက်ရှိ မူဆယ်မြို့နယ်အတွင်း ပြည်မကြီးမှ ဒေသခံများ နှင့် ရခိုင်ပြည်မှ ဒေသခံများ ပိုမိုများပြားလာပြီး မှတ်ပုံတင် ၁၃/ ကို ပြုလုပ်ပေးခြင်း နှင့် အိမ်ထောင်စု အသစ်လုပ်ပေးခြင်းများ လုပ်ပေးကြောင်း သိရသည်။

“ တရုတ်ဘက်ကနေလုပ်တဲ့ Tiktok ထဲမှာဆိုရင် မှတ်ပုံတင်အတုတွေ ၊ အိမ်ထောင်စုတွေကို လုပ်ပေးတယ်ဆိုပြီးတော့ ကြေညာရောင်းနေတာရှိတယ်။ ဒါတွေကလည်း နိုင်ငံကူးဖို့ စာအုပ်အနီတွေ လုပ်ပေးနေတာ ဖြစ်တယ်။ တစ်ခြားဒေသက လာတဲ့သူတွေဆိုရင်လည်း ၁၃/ ချက်ချင်းဖြစ်တယ်။ လဝက ရုံးကနေ ဘယ်လိုလုပ်ပေးလည်းတော့ မသိဘူး။ အခုက ရောင်းဝယ်ရေး လုပ်တဲ့သူတွေက အဝင်ထွက် မများဘူး။ အလုပ်သွားလုပ်တဲ့သူတွေပဲ များတယ်” ဟု မူဆယ်ဒေသခံ အမျိုးသမီး တစ်ဦး ကပြောသည်။

နိုင်ငံကူးလက်မှတ် စာအုပ်အနီကို ပြုလုပ်ရန်အတွက် အိမ်ထောင်စုစာရင်း ၊ မှတ်ပုံတင်များကို ပြသရန် လိုအပ်ကြောင်းလည်း သိရသည်။

တစ်ခြားဒေသမှ လာပြီး မူဆယ်မြို့နယ်တွင်း အိမ်ထောင်စုထဲ ဝင်ရောက်လာသည့်အတွက်ကြောင့် နောင်တစ်ချိန်မှာ မူဆယ်ဒေသခံထက် အခြားမြို့ ဒေသခံများ ပိုလွှမ်းမိုးလာမှာကို ဒေသခံများက စိုးရိမ်နေကြသည်။

ထိုကြောင့် မိမိအိမ်ထောင်စုထဲ အခြားဒေသမှ လာသည့်သူများကို ထည့်ချင်ပါက မထည့်ပေးရန်အတွက် မူဆယ်မြို့ ဒေသခံ အမျိုးသမီးတစ်ဦး ကပြောသည်။

“ ကိုယ်မသိတဲ့ သူတွေကို ကိုယ်အိမ်ထောင်စုထဲထည့်လိုက်ရင် သူတို့ကလည်း ကိုယ့်အိမ်သား ဖြစ်သွားမယ်။ ကိုယ့်အိမ်ထောင်စုထဲ မထည့်ခင်မှာလည်း အဲ့လူက ဘယ်သူလဲ ၊ ဘယ်ကလာလဲ ဘယ်လိုလူမျိုးလဲဆိုတာကို သိဖို့လည်းလိုတယ်။ မသိဘဲ ထည့်လိုက်ရင် နောက်အိမ်ထောင်ရေး ပြဿနာတွေကလည်း ဖြစ်လာနိုင်တယ်လေ။ ဖြစ်နိုင်ရင်တော့ တစ်ခြားလူတွေကို ကိုယ့်အိမ်ထောင်စုထဲ မထည့်ပေးတာ ကောင်းပါတယ်” ဟု ၎င်းက ဆက်ပြောသည်။

နိုင်ငံကူးလက်မှတ် စာအုပ်အနီသည် တရုတ်နိုင်ငံအတွင်းသို့ ၁ နှစ်တိတိ အလုပ် လုပ်ကိုင်နိုင်ခွင့်ရှိကြောင်း သိရသည်။

ကိုဗစ်ကာလ မတိုင်ခင်တွင် တရုတ်နိုင်ငံတွင်းသို့ မြန်မာတစ်နိုင်ငံလုံးက ဝင်ရောက် အလုပ်လုပ်ကိုင်နိုင်သော်လည်း လက်ရှိ အာဏာသိမ်းပြီးနောက်ပိုင်း မူဆယ်မြို့နယ်၊ နမ့်ခမ်းမြို့နယ် ဒေသခံများကိုသာ တရုတ်အစိုးရက နိုင်ငံတွင်းသို့ ဝင်ခွင့်ပြုထားကြောင်း သိရသည်။