သျှမ်းပြည် တောင်ကြီးခရိုင် ညောင်ရွှေမြို့နယ် အင်းလေးဒေသမှ လူငယ် ၈ ဦးကို NLD၊ NUG၊ PDF နှင့် ပတ်သက်သည်ဟု စွပ်စွဲပြီး စစ်ကောင်စီမှ ဖမ်းဆီးခေါ်ဆောင်သွားခဲ့သူများ ယနေ့အချိန်ထိ ပြန်မလွှတ်လာသေးကြောင်း စုံစမ်း သိရှိရသည်။
ပြီးခဲ့သည့် (ဧပြီလ ၃ ရက်)မှ စ၍ နမ့်ပန်ကျေးရွာအုပ်စု ပေါက်ပါးရပ်ကွက်မှ အသက် ၂၆ နှစ်အရွယ်ရှိ ကိုအောင်ငွေတိုး ကို ပြည်သူ့ကာကွယ်ရေးတပ်ဖွဲ့ PDF ပတ်သက်မှုဖြင့် စွပ်စွဲပြီး စစ်ကောင်စီတပ်ဖွဲ့မှ စတင် ဖမ်းဆီး ခေါ်ဆောင်သွားခဲ့ပြီးနောက် အင်းလေးဒေသမှ နောက်ထပ် လင်မယားနှစ်ဦး အပါအဝင် လူငယ် ၄ ဦးကို စစ်ကောင်စီမှ ထပ်မံဖမ်းဆီးခဲ့သည်။
လက်ရှိ ဖမ်းဆီးခံထားရသည့် လူငယ်များကို ညောင်ရွှေမြို့နယ် နမ့်ပန်ရဲစခန်းတွင် ချုပ်နှောင်ထားခဲ့ပြီး ယနေ့ (ဧပြီလ ၂၁ ရက်နေ့) အထိ ပြန်လွှတ်လာပေးခြင်း မရှိသေးကြောင်း ဖမ်းဆီးခံထားရသည့် လူငယ်တစ်ဦးထဲမှ နီးစပ်သူ အမျိုးသမီးတစ်ဦးက ပြောသည်။
“ဖမ်းခံထားရတဲ့ လူငယ်တွေက ၈ ယောက် လောက်ရှိတယ်။ အခု နမ့်ပန် ရဲစခန်းမှာ ရှိနေတယ်။ အခုက သူတို့ ညှိနေတုန်းလို့လည်း ပြောတယ်။ ပိုက်ဆံပေးပြီး ပြန်ထုတ်လည်း မရဘူး ဖြစ်နေတယ် “ ဟု ၎င်း အမျိုးသမီးတစ်ဦးက ပြောသည်။
အဆိုပါ ဖမ်းဆီးခံရသည့် လူငယ် ၈ ဦးသည် အသက် (၂၅) နှစ်မှ (၃၀) နှစ်ကြား လူငယ်ဖြစ်ကြပြီး ထိုထဲတွင် အသက် ၂၇ နှစ် လင်းစိုးဇင် ဆိုသူ တစ်ဦး ပါဝင်ပြီး ကျန်သည့် လူငယ် ၇ ဦးကိုတော့ နာမည်မသိရသေးကြောင်း ၎င်းက ဆက်ပြောသည်။
အလားတူ (ဧပြီလ ၁၅ ရက်) နှင့် (ဧပြီလ ၁၇ ရက်) ၃ ရက်တွင်း အင်းတိန်မှ လူငယ် ၃ ဦးကို စစ်ကောင်စီမှ အကြောင်းမဲ့ ဖမ်းဆီးသွားခဲ့ပြီး ကျပ်ငွေ (၁၄) သိန်းဖြင့် ပြန်ရွေးထုတ်ခိုင်းသလို အိမ်မွေး တိရစ္ဆာန် ကြက်၊ ဘဲ ကို ပေးဆောင်ခြင်းဖြင့် လူကိုပြန်ရွေးထုတ်ခိုင်းခြင်း ပြုလုပ်ခဲ့ကြောင်းလည်း သိရသည်။
“ တစ်ယောက်ကိုတော့ ည ၉ နာရီက မေးစရာရှိတယ်ဆိုပြီး လာခေါ်သွားတာ။ ည ၁၁ ရောက်တော့ ပြန်လာပို့ ပေးတယ်။ သူတို့က ပိုက်ဆံ (၁၄) သိန်း ပေးရတယ်လို့ ပြောတယ်။ ကျန်တဲ့ လူငယ်နှစ်ယောကိုတော့ အင်းတိန်မှာ ဖမ်းမိတာ။ ရွာသူကြီးကို ဖုန်းဆက်တယ်။ သူတို့ကို (ဘဲ) တစ်ကောင် ပေးပြီးမှ ပြန်လွတ်လာပေးတာ “ ဟု ၎င်းက ထပ်မံဖြည့်စွက် ပြောသည်။
ထို့အပြင် ညောင်ရွှေမြို့နယ်ရှိ အင်းလေးဒေသသည် စစ်ကောင်စီ၏ အုပ်ချုပ်မှုအောက်တွင် ရောက်ရှိနေပြီး စစ်ကောင်စီမှ ဉပဒေမဲ့ပြုပြီး ဒေသခံများထံ ပိုက်ဆံအတင်း အဓမ္မကောက်ယူသောကြောင့် ယခင်ကထက် ပြည်သူများ၏ လုံခြုံရေး ပိုမိုဆိုးဝါးလာကြောင်း အင်းလေးဒေသခံ တစ်ဦးက ထပ်လောင်းပြောသည်။
“ သူတို့က ပိုက်ဆံရနိုင်တဲ့ သူဆီကို ဖမ်းနေတာပဲ။ အသွားအလာတွေ ဆင်ခြင်ကြရတော့မယ်လို့တော့ ထင်တယ်။ ဘာလို့လဲဆို သူတို့က ကြုံရင် ကြုံသလို ဖမ်းနေတယ်။ ၅ သောင်းရရ၊ ၁ သိန်းရရ လိုက်တောင်းနေတာလေ။ သွားရလာရတာလည်း မလုံခြုံတော့ဘူးလို့ ခံစားရတယ် “ ဟု ၎င်းက ပြောသည်။
ထို့အပြင် စစ်ကောင်စီမှ ဖမ်းဆီးခေါ်ဆောင်သွားသည့် အင်းလေးဒေသမှ လူငယ်များသည် ဇနီးမောင်နှံများ ဖြစ်ကြသည့် လွေးလွင်မျိုး (ခ) ကိုမျိုး နှင့် ခိုင်ဇာဝင်း အပါအဝင် ကိုအောင်ငွေတိုး၊ လင်းစိုးဇင် နှင့် အင်းခြံရွာမှ လူငယ် ၃ ဦးတို့ ဖြစ်ကြောင်း သိရသည်။
စစ်တပ်မှ နိုင်ငံတော်ကို အာဏာသိမ်းယူပြီးနောက်ပိုင်း မြန်မာနိုင်ငံတွင် ဖမ်းဆီးခံရသူ (၂၁,၄၆၇) ရှိပြီး သတ်ဖြတ်ခံရသူ (၃,၄၂၂) ရှိကြောင်း ယမန်နေ့ (ဧပြီလ ၂၀ ရက်) တွင် AAPP က ထုတ်ပြန်ထားသည်။
Leave a Comments