သျှမ်းပြည်တောင်ပိုင်း ညောင်ရွှေမြို့နယ် အင်းလေးဒေသတွင် ဖောင်တော်ဦး ဘုရားပွဲတော်ကို လာမည် အောက်တိုဘာလတွင် ကျင်းပမည်ဖြစ်ပြီး ပွဲတော်ကို အခွင့်ကောင်းယူပြီး စစ်တ်ပမှ ပေါ်တာဆွဲဖမ်းဆီးမည်ကို ဒေသခံများက စိုးရိမ်နေကြကြောင်း သတင်းရရှိသည်။
ဖောင်တော်ဉီး ဘုရားပွဲကို (၁၂)ရက်မှ (၂၉) ရက်နေ့အထိ ၁၈ရက်ကြာ ကျင်းပသွားမည်ဖြစ်သည်။
ထို့သို့ အင်းလေးဖောင်တော်ဦး ဘုရားပွဲတော် ရက်ရှည်ကျင်းပရာတွင် နယ်မြေ မတည်ငြိမ်မှုနှင့် ညောင်ရွှေတွင် စစ်တပ်မှ မကြာမခဏပေါ်တာဆွဲ ဖမ်းဆီးမှု လုပ်ဆောင်လာမှုကြောင့် ဒေသခံများနှင့် ခရီးသွားများက စိတ်လုံခြုံမှုမရှိနေကြောင်း ညောင်ရွှေဒေသခံ အမျိုးသားတဉီးက သျှမ်းသံတော်ဆင့်ကိုပြောသည်။
“ညောင်ရွှေမှာ ခရီးသွားတွေရော စစ်ရှောင်တွေရော အဖွဲ့အစည်းတွေရော တော်တော်စုံတယ်၊ ဘုရားပွဲဆိုရင် ခရီးသွားတွေ အများလာကြမှာ ဒေသခံတွေလည်း ပွဲတော်ကျင်းပကြတယ်ဆိုတော့ အလုပ်နားပြီး ပါဝင်ကြမှာ၊ ဒီအပေါ်မှာ စစ်တပ်က အခွင့်ကောင်းယူပြီး ပေါ်တာတွေ ဆွဲနိုင်တယ်၊ အရင်ကတည်းက တည်းခိုတဲ့ နေရာတွေမှာ ဝင်ဆွဲနေကြဆိုတော့ စိတ်မချရဘူး။”၎င်းကပြောသည်။
ထို့အပြင် ပွဲတော်ကာလအတွင်း စစ်တပ်နှင့် ပအိုဝ်းပြည်သူ့စစ် ( PNO)တို့က လုံခြုံရေးယူမည်ဖြစ်ပြီး လုံခြုံရေး အကြောင်းပြ၍ စစ်ဆေး ငွေညှစ်တောင်းခံမှုများလည်း ရှိသဖြင့် သတိထားသွားလာကြရန် အဆိုပါ အမျိုးသားက အသိပေးပြောထားသည်။
ပွဲတော်ကာလအတွင်း ခရီးသွားများ များလာနိုင်သောကြောင့် ဒေသခံများ၏ အလုပ်ကိုင်အခွင့်လမ်းနှင့် စားဝတ်နေရေး အဆင်ပြေမှုများလည်း ရှိလာနိုင်သည်ဟု အင်းလေး ဒေသခံ အမျိုးသမီးတစ်ဦးက ပြောသည်။
“ပွဲတော်အတွင်းမှာဆို လှေသမားတွေကလည်း အလုပ်ရပြီး စားဝတ်နေရေး အဆင်မပြေလာမှာ၊ ဈေးသည်တွေ နောက်ပြီး အင်းလေး ချည်ထည်တွေဆို ပိုရောင်းကောင်းလာမှာ၊ ဒေသခံတွေအတွက် အသက်ရှုချောင်တာပေါ့လေ၊ ကိုယ့်အင်းလေး ဒေသက ရိုးရာပွဲလည်း ဖြစ်တော့ ဂုဏ်ယူမိတယ်၊ နိုင်ငံရေး အခြေနေ ကောင်းရင်တော့ ပိုပြီး လူစည်တာပေါ့။” ဟု အင်းလေး ဒေသခံ အမျိုးသမီးတစ်ဦးက ပြောသည်။
အင်းလေးဖောင်တော်ဦး ဘုရားပွဲတော်ကို နိုင်ငံရေးအခြေနေများကြောင့် ပြီးခဲ့သည့် ၂၀၂၃ ခုနှစ်မှစ၍ ပြန်လည် ကျင်းပခဲ့ပြီး လူစည်ကားမှုမရှိခဲ့ကြောင်းနှင့် ယခု ၂၀၂၆ ခုနှစ်တွင် ခရီးသွားများနှင့် စည်ကားလာနိုင်သည်ဟု ၎င်အမျိုးသမီးက ပြောသည်။
ယခု လက်ရှိ တောင်ကြီးခရိုင်အတွင်း မိုးများ အဆက်မပြတ် ရွာသွန်းမှုကြောင့် အင်းလေးကန်အတွင်း ရေကြီးရေလျှံမှုနှင့် ရေလှိုင်းရိုက်ခတ်မှုများကြောင့် ခရီးသွားများ လှေစီးရာတွင် အဆင်မပြေမှုများ ကြုံနေသည်ဟု ခရီးသွားများထံမှ သိရသည်။
ပြီးခဲ့သည့် ၂၀၂၅ ခုနှစ် စက်တင်ဘာလ (၂၂) ရက်နေ့တွင်လည်း ငလျင်ဘေးနှင့် ရေဘေး နလန်မထူနိုင်သည့် ကြား အင်းလေးဖောင်တော်ဦး ဘုရားပွဲတော်ကို စစ်ကော်မရှင်တပ်နှင့် PNO တပ်တို့ ဦးစီး၍ ဒေသခံများထံ ပိုက်ဆံကောက်ယူကာ ကျင်းပပြုလုပ်ခဲ့သည်။
Leave a Comments