သျှမ်းပြည် တောင်ကြီးခရိုင် ညောင်ရွှေမြို့နယ် နမ့်ပန်ကျေးရွာအုပ်စုအတွင်း နေထိုင်သည့် လူငယ်တစ်ဦးကို စစ်ကောင်စီမှ ဖမ်းဆီးသွားခဲ့ကြောင်း စုံစမ်းသိရှိရသည်။
ပြီးခဲ့သည့် (ဧပြီလ ၃ ရက်) ညသန်းခေါင်အချိန်၌ ညောင်ရွှေမြို့နယ် နမ့်ပန်ကျေးရွာအုပ်စု ပေါက်ပါးရပ်ကွက်အတွင်း နေထိုင်သည့် အသက် ၂၆ နှစ် အရွယ်ရှိ ကိုအောင်ငွေတိုးအား ပြည်သူ့ကာကွယ်ရေး တပ်ဖွဲ့ PDFနှင့် ပတ်သက်မှုရှိသည်ဟု စွပ်စွဲပြီး စစ်ကောင်စီတပ်ဖွဲ့မှ ၎င်း၏နေအိမ်အတွင်းသို့ ဝင်ရောက်ဖမ်းဆီးသွားခဲ့ကြောင်း ကိုအောင်ငွေတိုးနှင့်နီးစပ်သူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ အရင်ညက ကျမရဲ့ သူငယ်ချင်းတစ်ယောက် အိမ်မှာနေရင်းနဲ့ ဝင်ဖမ်းသွားတယ်။ PDF နဲ့ ဘယ်လိုအချိတ်အဆက်ရှိတယ် ဆိုပြီး စစ်ကောင်စီက လာဖမ်းသွားတာလည်းတော့ သေချာမသိရဘူး။ ညသန်းခေါင်ကျော်အချိန်မှာပဲ သူနေတဲ့နေအိမ်မှာ ဝင်ဖမ်းသွားတာ “ ဟု ၎င်း အမျိုးသမီးတစ်ဦးက ပြောသည်။
အဆိုပါ လူငယ်တစ်ဦး ဖမ်းဆီးခံရပြီးနောက်ပိုင်း အင်းလေးဒေသရှိ ပြည်သူများသည် လုံခြုံရေးအတွက် စိုးရိမ်နေကြောင်း သိရသည်။
အလားတူ ယမန်နေ့ (ဧပြီလ ၅ ရက်) နေ့ခင်းပိုင်းအချိန်တွင် ညောင်ရွှေမြို့ပေါ်ရှိ ဂိမ်းဆိုင်တစ်ဆိုင် ဖွင့်လှစ်ပြီး ဂိမ်းရောင်းနေသူ ကိုမျိုးကိုလည်း စစ်ကောင်စီမှ သေနတ်ဖောက်ပြီး ဖမ်းဆီးသွားခဲ့သည်ဟု သိထားရသော်လည်း သျှမ်းသံတော်ဆင့်သတင်းဌာနအနေဖြင့် အတည်ပြုမရသေးပေ။
စစ်တပ် အာဏာသိမ်းပြီးနောက်ပိုင်း မြန်မာနိုင်ငံတွင် ဖမ်းဆီးခံရသူ (၂၁,၂၂၂) ဦးရှိပြီး ထိန်းသိမ်းခံရသူ (၁၇,၃၅၅) ဦးရှိရာ သတ်ဖြတ်ခံရသည့် လူဦးရေပေါင်း (၃,၂၁၂) ဦး ရှိခဲ့ပြီဖြစ်ကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP မှ ဧပြီ ၅ ရက် ၏ ထုတ်ပြန်ချက်အရ သိရသည်။
Leave a Comments