သျှမ်းပြည် မူဆယ်ခရိုင် မူဆယ်မြို့အတွင်း ကိုးကန့်တပ်မတော် MNDAA တပ်ဖွဲ့ ဆက်ကြေး (အခွန်)ဆောင်ရန် ဆိုင်များထံ စာလိုက်ပို့နေကြောင်း သတင်းရရှိသည်။
ပြီးခဲ့သည့် မတ်လ ၂၇ ရက်နေ့ကစပြီး ဧပြီ ၁ ရက်ထိ ကိုးကန့်တပ်မတော် MNDAA မှ ကုန်စုံဆိုင်များ၊ ဖုန်းဆိုင်များထံ ဆက်ကြေး ဆောင်ရန် စာပို့လာကြောင်း မူဆယ်ဒေသခံများပြောပြချက်အရသိရသည်။
“ သူတို့စာအိတ်နဲ့ ဆိုင်တွေမှာ လိုက်ပို့နေတာ။ ဖုန်းဆိုင်တွေ၊ ကုန်စုံဆိုင်တွေ၊ KTV ဆိုင်တွေမှာ စာအိတ်နဲ့ လိုက်ပို့နေတာ အခွန်ဆောင်ဖို့ စာလာပို့ပေးတာ။ ဆိုင်ကယ်တစ်စီး နဲ့ လူ ၂ ယောက်လာပြီးတော့ တွေ့တဲ့ ဆိုင်တွေမှာ အခွန်ဆောင်ဖို့ စာလာပို့ပေးတာ” ဟု မူဆယ်မြို့ ဒေသခံ တစ်ဦးက ပြောသည်။
အဆိုပါ စာဆောင်ထဲတွင် ၅ ရက်အတွင်းအခွန်လာဆောင်ရန် နှင့် အခွန်လာမဆောင်ပါက ဖြစ်လာမည့်အရာကို တာဝန်ယူဖြေရှင်းသွားမည်မဟုတ်ကြောင်း ဒေသခံများပြောပြချက်အရသိရသည်။
MNDAA မှ တောင်းယူသည့် ဆက်ကြေးမှာ KTV ဆိုင် တစ်ဆိုင်လျှင် သိန်း ၁၀၀၊ ဖုန်းဆိုင်တဆိုင်လျှင် သိန်း ၃၀ မှစပြီး အိမ်ဆိုင်ငယ်များကို ကျပ်သိန်း ၁၀ အထိ ပေးဆောင်ခိုင်းနေကြောင်း သိရသည်။
“ ဆိုင်ကြီးတို့ KTV တို့ဆိုရင်တော့ သိန်း ၁၀၀ အထိအခွန်ဆောင်ခိုင်းတယ်။ ဖုန်းဆိုင်တွေဆိုရင်တော့ သိန်း ၃၀ ပေါ့။ အိမ်ဆိုင်ငယ်တွေကိုရင် ၁၀ သိန်းလောက်တောင်းတယ်။ အခွန်ကိုတော့ စာလာပို့တဲ့နေ့ကစပြီးတော့ ၅ ရက်အတွင်းသွားဆောင်ခိုင်းတာ။ မဆောင်ရင်တာ့ ဖြစ်လာမဲ့ဟာတွေကို တာဝန်မယူဘူးလို့တော့ရေးထားတယ်” ဟု အထက်ပါ ဒေသခံတစ်ဦးက ပြောသည်။
ကိုးကန့်တပ်မတော် MNDAA မှ ပေးသည့်အခွန်စာများသည် တရုတ်စာ နှင့် မြန်မာစာ နှစ်ဘာသာဖြင့် ပေးပို့လာခဲ့သည်။
မူဆယ်မြို့ရှိ ဆိုင်များထံ တိုင်းရင်းသား လက်နက်ကိုင်တပ်ဖွဲ့များဖြစ်သည် ရှမ်းပြည်တိုးတက်ရေးပါတီ၊ ရှမ်ပြည်တပ်မတော်( SSPP/SSA)၊ တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) နှင့် ကချင်လွတ်လပ်ရေးတပ်မတော် (KIA)တို့ထံ နှစ်စဥ်နှစ်တိုင်း ဆက်ကြေးဆောင်ခဲ့ရပြီး MNDAA သည် ယခုနှစ် မှစပြီး မူဆယ်မြို့တွင်း တိုးလာသည့် အဖွဲ့ဖြစ်ကြောင်း ဒေသခံများ ပြောပြချက်အရသိရသည်။
ထို့အပြင် အမည်မသိ လက်နက်ကိုင်တစ်ချို့များထံတွင်လည်း အွန်လိုင်းမှာ တစ်ဆင့် ခြိမ်းခြောက် ဆက်ကြေး ကောက်ခံနေကြသည်။
မူဆယ်မြို့အတွင်း သွားလာလှုပ်ရှားနေသည့် တိုင်းရင်းသား လက်နက်ကိုင်တပ်ဖွဲ့များသည် ပြည်သူများထံ ဆက်ကြေးကောက်ယူမှုရှိနေသော်လည်း ပြည်သူများအတွက် လုံခြုံရေးအပြည့်ဝ ယူဆောင်ပေးခြင်းမရှိပေ။
