သျှမ်းပြည် တောင်ကြီးခရိုင် ဟိုပုံးမြို့နယ် ပန်လုံရွာသစ်စစ်ရှောင်စခန်းအတွင်းနေထိုင်သည့် ကလေးများ စာသင်ရန်အတွက် စာရေးကိရိယာများ လိုအပ်နေကြောင်း စုံစမ်းသိရှိရသည်။
တိုက်ပွဲကြောင့် ၁ နှစ်ကျော်ကြာ ဟိုပုံးမြို့နယ် ပန်လုံရွာသစ်သို့ ပြောင်းရွှေ့နေထိုင်ရသည့် စစ်ရှောင်များသည် လက်ရှိမှာ ကိုယ်ထူကိုယ်ထ စာသင်ကျောင်းဖွင့်လှစ်နိုင်ခဲ့သော်လည်း ကလေးငယ်များ စာသင်ကြားဖို့ရန်အတွက် စာအုပ်၊ ခဲတံနှင့် ဘောပင် များလိုအပ်နေကြောင်း စစ်ရှောင်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ ကျနော်တို့ ထွက်ပြေးလာကတည်းက ကလေးတွေ စာမသင်ရဘူး။ သံဃာတော်ကနေ အကူညီပေးခဲ့လို့ အခုလိုကိုယ်ထူကိုယ်ထ ဘုန်းကြီးကျောင်းမှာ စာသင်ရတယ်။ ဒါပေမယ့်လည်း စာသင်ဖို့အတွက်က စာအုပ်၊ ခဲတံ၊ ဘောပင်တို့တွေ လိုအပ်နေသေးတာပေါ့။ အခုကရှိသားလေးနဲ့ လုပ်ရတယ်။ မလုံလောက်ဘူး “ ဟု ၎င်းက ပြောသည်။
အဆိုပါ စစ်ရှောင်စခန်းထဲတွင် ကလေးငယ်ဦးရေ ၃၀ ကျော် ရှိပြီး စာသင်ကြားဖို့ရန်အတွက် ကျောင်းသုံးကိရိယာများ လိုအပ်နေကြောင်း သိရသည်။
လက်ရှိ စစ်ရှောင်စခန်းမှ ကလေးငယ်များကို ကျောင်းသုံးပစ္စည်း ကိရိယာထောက်ပံ့ဖို့အတွက်လည်း နေ့စားအလုပ် ပုံမှန်မသွားရသဖြင့် မထောက်ပံ့ပေးနိုင်ကြောင်း စစ်ရှောင် တစ်ဦးက ထပ်လောင်းပြောသည်။
“ အလှူရှင်တွေက မလာတာ ကြာပြီ။ ကိုယ့်ဟာကိုယ် ရှိသာလေးနဲ့စိုက်ပျိုးပြီး စားရတယ်။ နေ့စားအလုပ်က ပုံမှန်မှမရှိတာရယ် အခုဆိုကလေးငယ်တွေလည်း ကျောင်းသုံးပစ္စည်းတွေ ဝယ်ဖို့အတွက် အခက်ခဲရှိနေတယ်။ ပိုက်ဆံမရှိတော့ မဝယ်ပေးနိုင်ဘူး “ ဟု ၎င်းက ပြောသည်။
လွန်ခဲ့တဲ့ ၂၀၂၂ ခုနှစ် (ဒီဇင်ဘာလပိုင်း)ကုန်မှစ၍ စစ်ရှောင်များသည် ကမ္ဘာ့စားနပ်ရိက္ခာ အစီစဉ်အဖွဲ့အစည်း (WFP) ထံ ထောက်ပံ့မှုပြတ်တောက်ခံရပြီး ယနေ့အချိန်ထိ ထောက်ပံ့မှုပြန်လည် မရရှိသေးကြောင်း သိရသည်။
