သျှမ်းပြည် လွိုင်လင်ခရိုင် ကွန်ဟိန်းမြို့နယ်အတွင်း ဖြစ်ပွားသည့် သျှမ်းတပ်နှစ်တပ်၏ ထိတွေ့တိုက်ပွဲကြောင့် ဒေသခံ ပြည်သူတချို့က စစ်ရှောင်ထွက်ပြေးရပြီး သျှမ်းတပ်နှစ်တပ်မှလည်း အပြန်အလှန် ပြစ်တင်ပြောဆို နေကြကြောင်း သတင်းသိရသည်။
ယမန်နေ့ (မတ်လ ၂ ရက်) တွင် သျှမ်းပြည်ပြန်လည်ထူထောင်ရေးကောင်စီ ၊ သျှမ်းပြည်တပ်မတော် (RCSS/ SSA) နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တို့သည် ကွန်ဟိန်းမြို့နယ် လိုက်ကမ်ကျေးရွာအုပ်စု၊ နမ့်တွတ်ကျေးရွာအနီး၌ ထိတွေ့ တိုက်ပွဲဖြစ်ပွားခဲ့သည်။
အဆိုပါ ထိတွေ့တိုက်ပွဲကြောင့် နမ့်တွတ်ကျေးရွာမှ သက်ကြီးရွယ်အိုများ၊ ကလေးသူငယ်များက နီးစပ်ရာ ဘုန်းကြီးကျောင်း နှင့် လယ်တဲထဲ စစ်ရှာင်ထွက်ပြေးရကြောင်း လိုက်ကမ်ကျေးရွာအုပ်စုမှ အသက် ၄၀ ဝန်းကျင် အမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“ဒီဒေသမှာ ထိတွေ့တိုက်ပွဲ တခါမှ မဖြစ်ဖူးသေးဘူး၊ အခုက ပထမဆုံးအကြိမ် ဖြစ်တယ်၊ ဒါကြောင့်မို့ ရွာသားတွေ ကြောက်ကြရတာပေါ့၊ မနေ့ ပစ်ခတ်သံက ၁၀ မိနစ်လောက်တောင် မကြာပါဘူး၊ ဒါပေမဲ့ စစ် ဆိုတာ နဲ့ ရွာသားတွေက ကြောက်နေကြပြီလေ၊ တချို့ သက်ကြီးရွယ်အိုတွေ၊ ကလေးသူငယ်တွေက ဘုန်းကြီးကျောင်း၊ လယ်တဲတွေမှာ စစ်ရှောင်ပြီး ရောက်နေကြတယ်” ဟု အထက်ပါ ဒေသခံက ပြောသည်။
ယနေ့ မတ်လ (၃) ရက်နေ့တွင် စစ်ရှောင်ထွက်ပြေးနေသူ တချို့က နေအိမ်သို့ ပြန်လည်ရောက်ရှိလာသော်လည်း တချို့က ပြန်မလာရဲသေးကြောင်း ၎င်းက ဆက်ဆိုသည်။
လက်ရှိအချိန်တွင် နှစ်ဖက်စစ်တပ် ထိတွေ့တိုက်ပွဲ ငြိမ်သက်သွားသော်လည်း စစ်ရေးတင်းမာမှုများ ရှိနေသေး ကြောင်း သိရသည်။
“အရင်တုန်းကဆိုရင် RCSS/SSA က ဒီ နမ့်တွတ်အနီးမှာ လှုပ်ရှားတယ်။ SSPP/SSA က နောင်တောင်းဘက်မှာ လှုပ်ရှားတယ်။ တစ်ဖွဲ့နဲ့ တစ်ဖွဲ့က အရမ်းနီးတယ်။ တခါတလေ အော်ပြီး စကားတောင်ပြောကြတာပဲ၊ မနေ့က ထိတွေ့မှု ဖြစ်လာတော့ ရွာသားတွေကလည်း လန့်ကြတာ။ တိုက်ပွဲထပ်ဖြစ်မှာစိုးလို့ တချို့က အိမ်တောင် မပြန်ရဲ သေးဘူး” ဟု အထက်ပါ အမည်မဖော်လိုသူက သျှမ်းသံတော်ဆင့်ကို ဆက်ပြောသည်။
ယင်းကဲ့သို့ ထိတွေ့တိုက်ပွဲ ဖြစ်ပွားမှု နှင့် ပတ်သက်ပြီး သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည် တပ်မတော် RCSS/SSA ကို ဆက်သွယ်မေးမြန်းရာ SSPP/SSA ထိုးစစ်ဆင်လာမှုကြောင့် ထိတွေ့တိုက်ပွဲ ဖြစ်ရခြင်း ဖြစ်ကြောင်း တပ်ဖွဲ့၏ ပြောရေးဆိုခွင့် ဗိုလ်မှူးခမ်းစံက သျှမ်းသံတော်ဆင့်ကို ပြောသည်။
“ဒီနယ်က ကျနော်တို့ လှုပ်ရှားတဲ့ နယ်မြေဖြစ်တယ်၊ သူတို့ (SSPP/SSA) အစီအစဥ် နဲ့ ကျနော်တို့ နယ်ထဲကို ဝင်ရောက် လာတော့ ထိတွေ့တိုက်ပွဲက ဖြစ်ရတာပါ၊ အသေးစိတ်တော့ မသိရသေးဘူး၊ အခုချိန်ထိတော့ နှစ်ဖက် စစ်ရေးက တင်းမာနေသေးတယ်” ဟု ဗိုလ်မှူးခမ်းစံက သျှမ်းသံတော်ဆင့်ကို ပြောသည်။
ရှမ်းပြည်တိုးတက်ရေး ပါတီ၊ ရှမ်းပြည်တပ်မတော် SSPP/SSA ကို ဆက်သွယ်မေးမြန်းရာမှာတော့ RCSS/SSA တပ်သားများ၏ ချောင်းမြောင်းပစ်ခတ်မှုကြောင့် ထိတွေ့တိုက်ပွဲ ဖြစ်ပေါ်လာရကြောင်း SSPP/SSA တပ်ဖွဲ့မှ ဗိုလ်ကြီး သီဟရာဇာက သျှမ်းသံတော်ဆင့်ကို ပြောသည်။
“အဲ့ဒေသမှာ လှုပ်ရှားတဲ့ ကျနော်တို့ တပ်သားတွေကို သူတို့ (RCSS/SSA) ကနေ ချောင်းမြောင်း ပစ်ခတ်ဖို့ ကြိုးစားမှု အကြိမ်ကြိမ် ရှိခဲ့ပါတယ်၊ သျှမ်းအချင်းချင်း ထိတွေ့တိုက်ပွဲ မဖြစ်ချင်လို့ ကျနော်တို့ဘက်က အတတ်နိုင်ဆုံး အကြိမ်ကြိမ် ရှောင်ခဲ့တယ်၊ ဒါပေမဲ့ မနေ့ကတော့ ထိတွေ့မှု အနည်းငယ် ဖြစ်ခဲ့တာပေါ့နော်၊ ကျနော်တို့က စပြီးပစ်ခဲ့တာ မဟုတ်ပါဘူး” ဟု ဗိုလ်ကြီး သီဟရာဇာက သျှမ်းသံတော်ဆင့်ကို ပြောသည်။
ကွန်ဟိန်းမြို့နယ် နမ့်တွတ်ကျေးရွာအနီး ထိတွေ့တိုက်ပွဲ ဖြစ်ပွားမှုနှင့် ပတ်သက်ပြီး သျှမ်းတပ်နှစ်တပ်၏ ပြောရေးဆိုခွင့်များကို ဆက်သွယ်မေးမြန်းရာမှာတော့ အပြန်အလှန် အချင်းချင်း ပြစ်တင် ပြောဆိုမှုများ ရှိနေကြသည်။
၂၀၂၃ ခုနှစ်အတွင်း သျှမ်းတပ်နှစ်တပ်၏ ထိတွေ့တိုက်ပွဲသည် ယခုတစ်ကြိမ် ပထမဆုံး အကြိမ် ဖြစ်နေပြီး နောက်ဆုံး ထိတွေ့တိုက်ပွဲက ပြီးခဲ့သည့် ၂၀၂၂ ခုနှစ် ဇူလိုင်လအတွင်း ရပ်စောက်မြို့နယ်ထဲ ဖြစ်ပွားခဲ့ခြင်း ဖြစ်သည်။
Leave a Comments