သျှမ်းပြည် တောင်ကြီးခရိုင် ဆီဆိုင်မြို့နယ် ဆိုက်ခေါင်စံပြကျေးရွာအနီးရှိ ပအိုဝ်းပြည်သူ့စစ်တပ်ဖွဲ့ (PNO/PNA) ပြုလုပ်သော ရပ်ရွာလုံခြုံရေး စစ်သင်တန်းကို ဒေသခံလူငယ်များက သဘောမကျကြောင်း စုံစမ်းသိရှိရသည်။
စစ်အာဏာသိမ်းပြီး ၂၀၂၂ မေလမှ စပြီး ပအိုဝ်းပြည်သူ့စစ်တပ်ဖွဲ့ (PNO/PNA) က တစ်အိမ်လျှင် ငွေ ၃ သောင်းနှင့် ဆန်တစ်ပြည်ကို တောင်းခံခဲ့ပြီး ရပ်ရွာလုံခြုံရေးအတွက် ကျေးရွာတစ်ခုကို အမျိုးသားလူငယ် အယောက် ၂၀ တောင်းခံခဲ့ကြောင်း သိရသည်။
လက်ရှိ ပအိုဝ်းပြည်သူ့စစ်တပ်ဖွဲ့ (PNO/PNA) စစ်သင်တန်းခေါ်ယူခြင်းသည် စုစုပေါင်း (၇) ကြိမ်မြောက် ရှိလာပြီဖြစ်ကြောင်း အဆိုပါ စစ်သင်တန်း နှင့် ပတ်သက်ပြီး လူများထပ်မံခေါ်ဆောင်နေရာမှာ ဒေသခံလူငယ်များက မလိုလားကြောင်း ဆိုက်ခေါင်ဒေသခံ လူငယ်တစ်ဦးက ပြောသည်။
“သူတို့ ရွာမှာခေါ်နေတာ မူးယစ်ဆေးဝါးသုံးစွဲနေတဲ့သူတွေ တော်တော်များများပါတယ်။ တချို့ အသက် ၅၀ အထက် အသက် ၆၀ နီးပါးလည်း ပါတယ်။ ကျနော့် လူငယ်တွေတော့ ဘယ်သူ့မှ မဝင်ချင်ဘူး။ သူတို့က စစ်တပ်နဲ့ပေါင်းတော့ သိပ်သဘောမတွေ့ဘူး။ သူတို့က စစ်တပ်နဲ့ မပေါင်းရင် လူငယ်တွေ တော်တော်များများ သွားလောက်တယ် “ ဟု ၎င်းက ပြောသည်။
အဆိုပါ စစ်သင်တန်းသည် ၁၇ ရက်သာကြာပြီး စစ်သင်တန်းတတ်မြောက်ပြီးသူတိုင်း ရပ်ရွာလုံခြုံရေးအတွက် တာဝန်ထမ်းဆောင်ရကြောင်း သိရသည်။
ယခင် စစ်အာဏာ မသိမ်းခင်က ပအိုဝ်းပြည်သူ့စစ် (PNO/PNA) သည် ရပ်ရွာလုံခြုံရေးအတွက် စစ်သင်တန်းကို တစ်ကြိမ်မျှ မခေါ်ဖူးကြောင်း စစ်အာဏာသိမ်းပြီးနောက်ပိုင်းမှ စစ်သင်တန်းပြုလုပ်လာသည့်အပေါ်မှာ ဒေသခံများ၏ လိုအပ်ချက်များတစ်ခုအဖြစ် လုပ်ဆောင်ခြင်းသာဖြစ်သည်ဟု စစ်သင်တန်းတက်ရောက်သူ အမျိုးသားတစ်ဦးကပြောသည်။
“ သူတို့ ဘာရည်ရွက် နဲ့ စစ်သင်တန်းခေါ်ဆောင်တာလဲတော့ ကျနော်လည်း သိပ်မသိဘူး။ ဒါပေမယ့် ကျနော် နားလည်တာတော့ လိုအပ်ချက်တစ်ခု အနေနဲ့ ဒီခေတ် ဒီကာလမှာ လုပ်မယ့်အရာလို့ဘဲ ထင်ပါတယ် “ ဟု စစ်သင်တန်း တက်ရောက်ပြီးသူ အသက် ၃၀ နှစ် အမျိုးသားတစ်ဦးက ပြောသည်။
ပအိုဝ်းပြည်သူ့စစ် (PNO/PNA) စစ်သင်တန်းခေါ်ဆောင်မှုနှင့် ပတ်သက်ပြီး ဒေသခံလူငယ်များမှာ သဘောမကျသလို တချို့မှာလည်း စစ်သင်တန်း ပြုလုပ်ရမည်ကို စိုးရိမ်ကြောက်လန့်နေသဖြင့် ထိုင်းနိုင်ငံအတွင်း ထွက်ပြေးတိမ်းရှောင်နေသူများလည်း ရှိသည်။
