Saturday, July 13, 2024

မူဆယ်မြို့ အသက် ၁၀ နှစ်အရွယ် မိန်းကလေးတစ်ဦး ပြန်ပေးဆွဲခံရ

Must read

သျှမ်းပြည် မူဆယ်ခရိုင် မူဆယ်မြို့ စျေးရပ်ကွက်တွင်နေထိုင်သည့် အသက် ၁၀ နှစ်အရွယ်ရှိ မိန်းကလေးတစ်ဦးကို အမည်မသိ လက်နက်ကိုင်တပ်ဖွဲ့က ပြန်ပေးဆွဲသွားကြောင်း စုံစမ်းသိရသည်။

မူဆယ်မြို့

ယမန်နေ့ (ဇန်နဝါရီလ ၁၀) ရက် နံနက် ၅ နာရီခွဲကျော်တွင် မူဆယ်မြို့ ဈေးရပ်ကွက်တွင် နေထိုင်သည့် ကလေးငယ်တစ်ဦး တရုတ်ကျောင်းသွားရန်အတွက် အိမ်ရှေ့၌ ထွက်ရပ်စောင့်စဥ် အမည်မသိ လူတစ်စုက ကားဖြင့် လာရောက် ဖမ်းခေါ်သွား ကြောင်း သတင်းသိရသည်။

ထိုသို့ လာရောက် ဖမ်းဆီးပြီးနောက် ၎င်း၏ မိဘများထံ တရုတ်ငွေ တစ်သိန်းခွဲ (၁၅၀,၀၀၀) မြန်မာငွေကာလပေါက်စျေး ကျပ်သိန်း (၆၀၀) ကျော်ဖြင့် ပြန်လည်လာရွေးရန် ဖုန်းဆက်တောင်းဆိုခဲ့သည်။

“ကလေးမက တရုတ်ကျောင်းတက်နေတယ်၊ ကျောင်းသွားဖို့ အိမ်ရှေ့မှာ သူ့အမေကို ထွက်ရပ်စောင့်နေတဲ့ အချိန် ဖမ်းခေါ်သွားခံရတာ၊ သူ့အမေက ကလေးကို ကျောင်းပို့ဖို့ အိမ်ထဲကနေ ဆိုင်ကယ်တွန်းထုတ်လာတဲ့အချိန် လူတစ်စုက သူ့ကလေးကို ကားထဲကို ဖမ်းခေါ်နေတာတွေ့လို့ အော်လည်းအော်နဲ့ မဖမ်းဖို့ ပြောလည်း ဖမ်းခေါ် သွားတာ” ဟု နီးစပ်သူ အမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ ဖမ်းခံရသည့် ကလေးငယ်သည် အသက် ၁၀ နှစ်ကျော်အရွယ် အမျိုးသမီးငယ်ဖြစ်ပြီး လာရောက်ဖမ်းခေါ် သူများက တရုတ်ငွေ ၁ သိန်းခွဲပေးမှ လွတ်ပေးမည်ဟု ပြောဆိုဆက်သွယ်လာသည့်အတွက် မိဘများက တောင်းပန်ပြောဆိုရာ တရုတ်ငွေ တစ်သိန်းငါးသောင်းဖြင့် ကလေးငယ်ကို ပြန်လွတ်ပေးခြင်း ဖြစ်ကြောင်း အထက်ပါ နီးစပ်သူက ဆက်ပြောသည်။

“ကလေးကို ဖမ်းခေါ်သွားပြီး လူတစ်ယောက်က သူ့မိဘဆီ ဖုန်းဆက်ပြီး ပိုက်ဆံ ယူလာပေးဆိုပြီးတော့ ပြောတယ်၊ ကလေးက တစ်နေရာ ၊ ပိုက်ဆံကို သွားပေးရတာ တစ်နေရာ အဲ့လိုလုပ်တာ၊ စုစုပေါင်းတရုတ်ယွမ်ငွေ တစ်သိန်းခွဲပေးရတယ်၊ ပိုက်ဆံပေးရတဲ့ နေရာကိုတော့ မသိရဘူး” ဟု ၎င်းက ဆက်ပြောသည်။

မူဆယ်မြို့နယ်အတွင်း ကလေးပြန်ပေးဆွဲမှုများ နှင့် ဖမ်းဆီးခေါ်ဆောင်မှုများ များပြားလာသည့်အတွက် ကလေး အုပ်ထိန်းသူများ ဖြစ်သည့် မိဘကိုယ်တိုင်များကလည်း ကလေး၏ လုံခြုံရေးအတွက် မပေါ့ဆသင့် ကြောင်းလည်း မူဆယ်မြို့နေ ကလေး ဖခင်တစ်ဦးက သျှမ်းသံတော်ဆင့်ကို ပြောသည်။

“များသောအားဖြင့် ပိုက်ဆံရှိတဲ့ အသိုင်းဝိုင်းက ကလေးတွေ ပိုဖမ်းဆီးခံရတာ များတယ်၊ ဒါပေမဲ့ ကလေးအားလုံး အတွက် လုံခြုံရေးကို အထူးဂရုစိုက်ပေးရမယ့် အချိန်ဖြစ်နေပါတယ်၊ ကျောင်းထားရင်လည်း ကျောင်းဝင်းထဲမှာရော ကျောင်းကြို ကျောင်းပို့ရမယ့် နေရာတွေရာ အစစအရာရာ သတိထားရမယ်၊ အမျိုးသမီးနဲ့ ကလေးချည်း အပြင် ထွက်လို့မကောင်းတော့တဲ့ အခြေအနေပါ” ဟု အထက်ပါ ဖခင်တစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် အောက်တိုဘာ ၁၅ ရက် နံနက်ပိုင်းတွင် တရုတ်စာသင်ကျောင်း သွားတက်သည့် ၉ နှစ်အရွယ်ရှိ ကလေးငယ် တစ်ဦး ရပ်ကွက်လမ်းထဲ လမ်းလျှောက်သွားနေစဉ် ကားတစ်စီး နှင့် လူ ၄ ယောက်က လာရောက် ဖမ်းဆီးပြီး တရုတ်ယွမ်ငွေ ၅ သိန်းဖြင့် ပြန်လည်ရွှေးခိုင်းသည့် ဖြစ်စဥ်လည်း ဖြစ်ပွားခဲ့သည်။

Leave a Comments

- Advertisement -spot_img

Latest article