သျှမ်းပြည် အရှေ့ပိုင်း ကျိုင်းတုံမြို့တွင် အမည်မသိလက်နက်ကိုင် လူတစ်စုက ဆိုင်တစ်ဆိုင်အတွင်း ဝင်ရောက်ကာ အမျိုးသမီးတစ်ဦးကို ပြန်ပေးဆွဲသွားကြောင်း သတင်းရရှိသည်။
ယနေ့ (ဇူလိုင်လ ၂ ရက်) နေ့လည်တွင် ကျိုင်းတုံမြို့ ၊ ရပ်ကွက်(၄) နွဲနော်ရပ်ကွက်ရှိ ပရိဘောဂ နှင့် အိမ်သုံးပစ္စည်း အရောင်းဆိုင်ကို အမည်မသိလက်နက်ကိုင် လူတစ်စုက ဝင်ရောက်ကာ ဆိုင်ပိုင်ရှင်၏ သမီးဖြစ်သူကို ပြန်ပေးဆွဲသွားကြောင်း ကျိုင်းတုံမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ နေ့လည်ကပဲ ပရိဘောဂဆိုင်ကို သေနတ်ရှည်နဲ့ ဝင်ပြီး ဆိုင်ပိုင်ရှင်ရဲ့ သမီးကို ပြန်ပေး ဆွဲသွားတာ။ ကျိုင်းတုံမှာက အခြေအအနေကို ဆိုးနေတာ။စိုးရိမ်ရတဲ့ အခြေနေတော့ ဖြစ်နေပြီ။အရင်နှစ်က မဖြစ်ဖူးဘူး တာချီလိတ်မှာ လောက်ပဲဖြစ်တာ။ပြန်ပေးဆွဲတာက ကျိုင်းတုံမှာ ဒီနှစ်ထဲမှာ ဒါပထမဆုံးပဲ။”ဟု ကျိုင်းတုံမြို့ ဒေသခံအမျိုးသားတစ်ဦးက ပြောသည်။
ပြီးခဲ့သည့် (မေလ ၁၃ ရက်)တွင်လည်း ရွှေဆိုင်ပိုင်ရှင် အမျိုးသမီးတစ်ဦးကို အမည်မသိ လက်နက်ကိုင် လူတစ်စုက သေနက်ဖြင့် ပစ်ခတ်ခဲ့ပြီး ရွှေ ၃ ပိဿ နှင့် ကားကို ဓားပြတိုက်လုယူခဲ့သည်။
အာဏာသိမ်းပြီးနောက်ပိုင်း တရားဥပဒေစိုးမိုးမှု ကင်းမဲ့လာခြင်းအပါအဝင် အခြားအကြောင်းအရင်များကြောင့်မြန်မာနိုင်ငံတဝှမ်းတွင် စီးပွားရေးကျဆင်းလာပြီး စားဝတ်နေရေး ခက်ခဲခြင်းကြောင့် ခိုးဆိုးလုယက်ခြင်း၊ ဓားပြတိုက်ခြင်း၊ ပြန်ပေးဆွဲခြင်းများလည်း နေ့စဉ်နီးပါး ရှိလာသည်။
Leave a Comments