သျှမ်းပြည်အရှေ့ပိုင်း ကျိုင်းတုံမြို့နယ် ဘုန်းကြီးကျောင်းအတွင်းတစ်ခုတွင် လောင်းကစားဝိုင်းမျိုးစုံကို အာဏာပိုင်များ၏ ခွင့်ပြုချက်ဖြင့် ဖွင့်လှစ်ခွင့်ပေးနေကြောင်း ဒေသခံများက ပြောသည်။

ကျိုင်းတုံမြို့နယ် မိုင်းဇင်းကျေးရွာအုပ်စု နောင်နွန်းကွက်သစ်ရှိ ဝိသုဒ္ဓါရုံစာသင်တိုက်အတွင်း၌ ဧပြီလ ၁ ရက်နေ့မှစတင်ကာ လောင်းကစားဝိုင်းများကို တစ်လကြာ ဖွင့်လှစ်ခွင့်ပေးထားခြင်း ဖြစ်သည်။

အဆိုပါ ဝိုင်းများတွင် ကြက်ဝိုင်း၊ ဂျင်ဝိုင်း၊ ပိုက်ကျူး၊ ငါးပစ်ဂိမ်း၊ ဂုံးဂင်းနှင့် ရှမ်းကိုးမီး အစရှိသည့် လောင်းကစားနည်းပေါင်းစုံ ပါဝင်နေကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။

“အရင်ကတော့ နာရေးအိမ်တွေမှာပဲ ရှမ်းကိုးမီးလောက် ဆော့ကြတာ။ အခုက မြို့ပြင်က ဘုန်းကြီးကျောင်းထဲမှာကို ဝိုင်းအကြီးအကျယ် ဖွင့်ပေးထားတာ။ အကုန်လုံး စုံနေတာပဲ။ ဒိုင်တွေကတော့ စစ်တိုင်းကရော၊ ရဲနဲ့ ထွေအုပ်ကရော ခွင့်ပြုထားလို့ လုပ်နေတာ” ဟု ၎င်းက ပြောသည်။

အဆိုပါ လောင်းကစားဝိုင်းများကို မိုင်းဇင်းကျေးရွာအုပ်ချုပ်ရေးမှူး၊ အထွေထွေအုပ်ချုပ်ရေးမှူးရုံးစာရေး၊၊ နယ်ထိန်းရဲနှင့် အာဏာပိုင်အချို့ ပူးပေါင်းကာ ခွင်ပြုပေးထားခြင်း ဖြစ်ပြီး တြိဂံဒေသတိုင်းစစ်ဌာနချုပ်နှင့် ပြည်နယ်ရဲမင်းကြီးရုံးတို့ကလည်း သိရှိထားသော်လည်း အရေးယူခြင်းမရှိဘဲ ခွင့်ပြုထားခြင်းဖြစ်ကြောင်း ဆိုသည်။

လောင်းကစားဝိုင်းများ များပြားလာခြင်းနှင့်အတူ ကျိုင်းတုံမြို့ပေါ်တွင် ယခင်က မကြားဖူးသည့် လူသတ်ဓားပြတိုက်မှု၊ ဆိုင်ကယ်လုယက်မှုနှင့် ခိုးမှုများ နေ့စဉ်နှင့်အမျှ ဖြစ်ပွားလာနေကြောင်း ဒေသခံများက ပြောသည်။

လွန်ခဲ့သည့် ရက်ပိုင်းအတွင်းကလည်း ကျိုင်းတုံရဲစခန်းအနီးတွင် နေ့လည်အချိန်တွင် ဆိုင်ကယ်လုယက်မှု ဖြစ်ပွားခဲ့သော်လည်း အရေးယူပေးမည့်သူ မရှိသလောက်ဖြစ်နေကြောင်း ဆိုသည်။

“အခုက ကျိုင်းတုံမှာ နေ့ခင်းတောင် အပြင်မထွက်ရဲတော့ဘူး။ ရဲစခန်းမှာတင် လုနေကြတာ။ ရဲတွေက လောင်းကစားဝိုင်းဆီက ပိုက်ဆံရဖို့ပဲ စိတ်ဝင်စားတယ်” ဟု အထက်ပါဒေသခံတစ်ဦးက ထပ်လောင်းပြောသည်။

ယခုကဲ့သို့ ဘာသာရေးနယ်မြေဖြစ်သည့် စာသင်တိုက်အတွင်း လောင်းကစားဝိုင်းများ ဖွင့်လှစ်ခွင့်ပေးနေခြင်းသည် ဘာသနာရေးဆိုင်ရာ ဂုဏ်သိက္ခာကို ထိခိုက်စေသည့်အပြင် ဒေသတွင်း တရားဥပဒေ စိုးမိုးမှု ကင်းမဲ့လာခြင်းကို သက်သေပြနေခြင်း ဖြစ်ကြောင်း ဒေသခံများက ပြောသည်။

အဆိုပါ လောင်းကစားဝိုင်းများကို ဧပြီလကုန်အထိ တစ်လကြာ ဖွင့်လှစ်ရန် ခွင့်ပြုထားသည်ဟု သိရပြီး ဒေသခံများကမူ ယင်းလောင်းကစားဝိုင်းများအား ချက်ချင်းပိတ်သိမ်းပေးရန်နှင့် နယ်မြေလုံခြုံရေးကို ထိရောက်စွာ ဆောင်ရွက်ပေးရန် လိုလားနေကြသည်။