သျှမ်းပြည် အရှေ့ပိုင်းတွင် စက်သုံးဆီဈေးနှုန်းမြင့်တက်ပြီး အကန့်သတ်ဖြင့် ဝယ်နေရခြင်းကြောင့် မိုင်းလား – ကျိုင်းတုံ ကားခများ ဈေးနှုန်းမြင့်တက်လာကြောင်း စုံစမ်းသိရသည်။
လက်ရှိ အရှေ့အလယ်ပိုင်း စစ်ရေးပဋိပက္ခကြောင့် စက်သုံးဆီစျေး ပြဿနာဖြစ်လာပြီး စျေးနှုန်းမြင့်တက်လာသည့်အပြင် စက်သုံးဆီ ရှားပါးမှု ဖြစ်လာသည့်အတွက် မိုင်းလား-ကျိုင်းတုံ ပြေးဆွဲနေသည့် ကားများသည် တနေ့လျှင့် စက်သုံးဆီ ၁၀လီတာခန့်သာ ဝယ်ယူနိုင်ကြောင်းသိရသည်။
ထိုသို့ စက်သုံးဆီစျေးနှုန်းမြင့်တက်ခြင်းနှင့် အတူ စက်သုံးဆီကို ဝယ်ယူရာတွင် ကန့်သတ်ရောင်းချမှုကြောင့် ကားခစျေးနှုန်းများလည်း မြင့်တက်လာကြောင်း ကျိုင်းတုံ- မိုင်းလား ပြေးဆွဲနေသည့်
ကားသမားတစ်ဦးက သျှမ်းသံတော်ဆင့်ကို ပြောသည်။
“လိုင်းကားတွေက အသွားအလာနည်းသွားတယ်။ဆီဈေးကတော့ နည်းနည်းပဲတက်ပါတယ်။ဆီကို အကန့်သတ်နဲ့ ဝယ်နေရလို့။ကားခတွေကလည်း ဈေးတက်တာ။မိုင်းလား-ကျိုင်းတုံ ကားခက ၂၅၀ ယွမ်ဖြစ်သွားပြီလေ။”ဟု မိုင်းလားမြို့နယ် ကားသမားတစ်ဦးက ပြောသည်။
ယခင်တွင် မိုင်းလားမြို မှ ကျိုင်းတုံသို့ ကားခ တစ်ဦးလျှင် တရုတ် ယွမ်ငွေ ၁၅၀ (ကျပ်ငွေ ၈ သောင်းကျော်) သာပေးရပြီး လက်ရှိ တစ်ဦးလျှင် တရုတ် ယွမ်ငွေ ၂၀၀ (ကျပ်ငွေ ၁ သိန်းကျော်) အထိဈေးနှုန်းမြင့်တက်လာကြောင်း ၎င်းကပြောသည်။
မိုင်းလား-ကျိုင်းတုံသည့် မိုင်ပေါင်း ၆၀ ဝန်းကျင်သာရှိကြောင်း သိရသည်။
အလားတူ မိုင်းလားမြို့ မှ တာချီလိတ်မြို့သို့ တစ်ဦးလျှင် တရုတ် ယွမ်ငွေ ၄၀၀ (ကျပ်ငွေ ၂ သိန်းခွဲ) အထိပေးနေရကြောင်း သိရသည်။
လက်ရှိတွင် တရုတ် ယွမ်ငွေ ၁၀၀ ကို မြန်မာ ကျပ်ငွေ ၆ သောင်းခွဲအထိရှိနေကြောင်း သိရသည်။
အဆိုပါ မိုင်းလားမြို့နယ်တွင် စက်သုံးဆီ တစ်လီတာလျှင် တရုတ်ယွမ် ၁၀ ယွမ် (ကျပ်ငွေ ၆၄၀၀ ခန့်) အထိရှိပြီး ဈေးနှုန်း အဆမတန် မြင့်တက်မှု မရှိသော်လည်း 95 ဓာတ်ဆီ နှင့် ဒီဇယ် ရှားပါးနေကြောင်း သိရသည်။
အမျိုးသားဒီမိုကရေစီ မဟာမိတ်တပ်မတော် (NDAA) ကိုယ်ပိုင် အုပ်ချုပ်ခွင့်ရ အထူးဒေသ-၄ မိုင်းလားမြို့နယ်သည် တရုတ်နိုင်ငံမှ ရောင်းချပေးသည့် စက်သုံးဆီကိုသာ အဓီကမှီခို အသုံးပြုနေ ရကြောင်းသိရသည်။
Leave a Comments