သျှမ်းပြည်မြောက်ပိုင်း သိန္နီမြို့နယ် သိန္နီ – ဟိုပန် လမ်းကြားတွင် သိန္နီပြည်သူ့ ကာကွယ်ရေးတပ်ဖွဲ့ PDF နှင့် အာဏာသိမ်း စစ်ကောင်စီတို့ တိုက်ပွဲဖြစ်ပွားခဲ့ပြီး PDF ဘက်မှ ၇ ဦး ကျဆုံးခဲ့ကြောင်း သတင်းသိရသည်။
ပြီးခဲ့သည့် နိုဝင်ဘာလ ၂ ရက် ညနေပိုင်းမှ စတင်ခဲ့သည့် နှစ်ဖက်တပ်ဖွဲ့ ထိတွေ့တိုက်ပွဲတွင် PDF ဘက်မှ ၇ ဦးကျသည့်အပြင် ယနေ့အချိန်ထိ နှစ်ဖွဲ့တပ်ဖွဲ့ စစ်ရေးတင်းမာနေလျက်ရှိကြောင်း သျှမ်းမြောက်မှ PDF တပ်ဖွဲ့ ဝင် တစ်ဦးက သျှမ်းသံတော်ဆင့် ကို ပြောသည်။
“TNPDF အခြေစိုက် ပင်မ ဗဟိုစခန်းကုန်းပေါ်ကို စစ်ကောင်စီက လက်နက်ကြီး နဲ့ လှမ်းပစ်တာ၊ TNPDF ဘက်က ၇ ဦး ကျတယ်၊ စစ်ကောင်စီဘက်က တော်တော်များများ ကျသွားတယ်လို့ သတင်းသိရတယ်၊ ဒီနေ့ အချိန်ထိ စစ်ရေးတင်းမာနေတုန်းပဲ” ဟု အထက်ပါ နီးစပ်သူ အမျိုးသားက သျှမ်းသံတော်ဆင့်ကို ပြောသည်။
ကွမ်းလုံလမ်းပိုင်းဖြစ်သည့် သိန္နီ – ဟိုပန် ကြားတောင်ကြောဘက်ရှိသည့် TNPDF ၏ တပ်စခန်း အနီးကို စစ်ကောင်စီတပ်ဖွဲ့ တောနင်းရာမှ ထိတွေ့တိုက်ပွဲများ ဖြစ်ပွားခဲ့ခြင်းဖြစ်ကြောင်း TNPDF မှ ၎င်းတို့၏ လူမှုကွန်ရက် စာမျက်နှာတွင် ထုတ်ပြန်ထားသည်။
ထို့အပြင် TNPDF တပ်ဖွဲ့ဘက်မှ ရဲဘော် အယောက် ၃၀ ကျော်လည်း ထိခိုက် ဒဏ်ရာရရှိနေသည့်အတွက် ရှေ့ဆက် တိုက်ပွဲဖြစ်ပါက အသေခံ တိုက်ပွဲဝင်ရန်သာရှိကြောင်း TNPDF ၏ ထုတ်ပြန်ချက်တွင် ရေးသားဖော်ပြထားသည်။
“တပ်ဆုတ်ခွာဖို့ အတွက်လည်း အနီးပတ်ဝန်းကျင်မှာ ပြည်သူနေ ကျေးရွာရှိနေလို့ မဲမဲမြင်ရာ လိုက်ပစ်တဲ့ စကစရန်ကို ကျည်မကုန်မချင်း ဒီစခန်းမှာ အသေခံ တိုက်မယ့် ကျူပ်တို့ TNPDF တပ်ဖွဲ့ဝင် အားလုံးထဲက ဒဏ်ရာရလို့ ဆေးကုနေရတဲ့ ရဲဘော် ၃၂ ယောက် အပါအဝင် တပ်ဖွဲ့ဝင် ညီအကို မောင်နှမ အားလုံး သူတို့ ရန်သူကို ရင်ဆိုင်ဖို့ အသင့်ဖြစ်နေကြပါတယ်” ဟု ထုတ်ပြန်ရေးသားထားသည်။
ယင်းကဲ့သို့ ထိတွေ့တိုက်ပွဲများ နှင့် စစ်ရေးတင်းမာမှု ရှိနေသေးသည့်အတွက် လားရှိုး – သိန္နီ – ဟိုပန် ကားမောင်းသည့် ကားသမားတချို့လည်း ရပ်နားထားရကြောင်းလည်း သိရသည်။
ယင်းကဲ့သို့ ထိတွေ့တိုက်ပွဲ ပြင်းထန်နေသည့်အတွက် လက်နက်၊ ခဲယမ်း ထပ်မံဝယ်ယူနိုင်ရန်အတွက် NUG ကာကွယ်ရေးဝန်ကြီးဌာန (MOD) ကို TNPDF မှ အကူညီတောင်းခံထားကြောင်းလည်း သတင်းသိရသည်။
ပြီးခဲ့သည့် ၂၀၂၁ ခုနှစ် နှောင်းပိုင်း ဒီဇင်ဘာလ အတွင်းတွင် သိန္နီပြည်သူ့ကာကွယ်ရေးတပ်ဖွဲ့ ( သိန္နီ PDF ) အဖွဲ့သားတချို့ စစ်ကောင်စီ၏ ဖမ်းဆီးခြင်းခံရပြီး မည်သည့်နေရာသို့ ခေါ်ဆောင်ထားခြင်းကို မသိရသည့် ဖြစ်စဥ်လည်း ဖြစ်ပွားခဲ့သည်။
