သျှမ်းပြည်တောင်ပိုင်း တောင်ကြီးမြို့တွင် စစ်ကောင်စီ ဦးစီးပြီး တန်ဆောင်တိုင်ပွဲတော်ကို ပြုလုပ်မည်ဟု ဆိုသဖြင့် ပွဲတွင်းကာလတွင် ပဋိပက္ခဖြစ်ပွားမည်ကို ဒေသခံများက စိုးရိမ်နေကြောင်း စုံစမ်း သိရှိရသည်။
လာမည့် နိုဝင်ဘာလ ၇ ရက်တွင် စတင်ပြီး မီးပဒေသာ လှည့်လည်ပူဇော်ပွဲ၊ သင်္ကန်းယက်လုပ် ပူဇော်ပွဲ၊ စိန်နားပန် မီးပုံးပျံ ၂ လုံးလွှတ်တင်ခြင်း၊ မီးပုံးငယ်များ လွှတ်တင်ခြင်းနှင့် မီးပုံးပျံပြိုင်ပွဲများကို ကျင်းပသွားမည် ဖြစ်ကြောင်း ကြေငြာထားသည်။
“ လောလောဆယ်တော့ မီးပုံးပျံပွဲထဲမှာ ဗုံးခွဲမှာကို စိုးရိမ်နေတယ်။ ကလောမြို့မှာလည်း မီးချောတိုင်ပွဲ လုပ်မယ်လို့ ပြောတယ်။ လားရှိုး၊ မေမြို့ တွေမှာ စစ်ကောင်စီက တစ်နိုင်ငံ လုံးလုပ်ခိုင်းနေတယ်လို့ ကြားတယ်။ အဲ့တော့ ဘယ်မြို့က ပွဲကြီးကြီးမားမား ဖြစ်မယ်တော့ မသိဘူး။ ပွဲကတော့ ဖြစ်မှာတော့ဖြစ်တယ် “ ဟု တောင်ကြီးမြို့ ဒေသခံ အသက် (၃၀) ကျော်အမျိုးသားတစ်ဦးက ပြောသည်။
တောင်ကြီး တန်ဆောင်တိုင်ပွဲတော်သည် ကိုဗစ်-၁၉ ရောဂါ ဖြစ်ပွားချိန်ကစပြီး တောင်ကြီးမြို့ရိုးရာ တန်ဆောင်တိုင်ပွဲတော်ကို မပြုလုပ်လာခဲ့သည်မှာ ၃ နှစ် ရှိပြီဖြစ်ကြောင်း သိရသည်။
“ တန်ဆောင်တိုင်ပွဲဆိုတာ ပျော်ပွဲ၊ ရွှင်ပွဲ ပဲလေ။ ဒီပွဲကိုတော့ ရိုးရာဓလေ့ထုံးစံပွဲဆိုပြီး ခေါင်းစဉ်တပ်တာတော့ မကောင်းဘူးလေ။ စစ်ကိုင်း၊ မကွေး၊ ကယား၊ ကရင်တို့ဘက်မှာ ဒီလောက်ဖြစ်နေ၊ ပျက်နေတဲ့ ခေတ်မှာကို ကိုယ့်မှာက ဒီမှာကို ပျော်ပွဲ၊ ရွှင်ပွဲ လုပ်မယ်ဆိုတော့ တရားမမျှတဘူး။ ကျနော်အနေနဲ့ ပြောရရင်တော့ ဒီပွဲကို လုပ်ကိုမလုပ်စေချင်ဘူး “ဟု ၎င်း အထက်ပုဂ္ဂိုလ်တစ်ဦးက ထပ်လောင်းပြောသည်။
ထို့အပြင် အောက်တိုဘာလ ၇ ရက်မှစပြီး ၉ ရက်ထိ စစ်ကောင်စီ ဦးစီးပြီး တန်ဆောင်တိုင်ပွဲတော်ကို ၃ ရက် ဆက်တိုက် ပြုလုပ်ကျင်းပ သွားမည်ဖြစ်သော်လည်း တောင်ကြီး မီးပုံးပျံ အဖွဲ့အစည်းများက လှုပ်ရှားပြီး ပါဝင်ပူးပေါင်းခြင်း မရှိသေးကြောင်း တောင်ကြီးမြို့ ဒေသခံ အသက် (၂၀) နှစ်ကျော် လူငယ်တစ်ဦးက ပြောသည်။
“ မလုပ်ရတာ ၂ နှစ်ရှိပြီဆိုပေမယ့် ဒီနှစ်တော့ ပွဲစည်မယ်မထင်ဘူး။ ပွဲရက်ကလည်း ၃ ရက် ပဲဆိုတော့လေ၊ ကျနော်တို့ ကြည့်ရသလောက်တော့ ကျနော်တို့ လူငယ်အဖွဲ့၊ မီးပုံးပျံ အဖွဲ့အစည်းတွေက ပါဝင်ပူးပေါင်းတာ မရှိဘူး။ အရင်နှစ်တွေတုန်းကဆိုရင် တန်ဆောင်တိုင်ပွဲမရောက် ရှေ့ (၃-၄) လ အချိန်လောက်က စပြီး မီးပုံးပျံတွေ လုပ်နေတာတွေ တွေ့ရတယ်။ ဒီချိန်မှာ ပွဲလုပ်မယ့်ချိန် မဟုတ်ဘူး “ ဟု ၎င်းလူငယ်တစ်ဦးက ပြောသည်။
လာမည့် နိုဝင်ဘာ ၄ ရက်မှစပြီး နိုဝင်ဘာ ၇ ရက်ထိ လားရှိုးမြို့အဝင် ရန်တိုင်းအောင် ဆုတောင်းပြည့် မြို့ ဦးစေတော်ကြီးတွင် စတုတ္ထအကြိမ်မြောက် တန်ဆောင်တိုင်ပွဲကြီးကို ၄ ရက်ကြာ ကျင်းပပြုလုပ် သွားမည်ဖြစ်ကြောင်း သိရသည်။
ထို့အပြင် လားရှိုးမြို့ တန်ဆောင်တိုင်ပွဲတွင် တေးသံရှင် အဆိုတော် ဖြစ်တဲ့ နောနော်၊ လားရှိုး မောင်ဝင်း၊ ဖော့ကိုင်၊ မိုးအောင်ရင်၊ ချောစုခင်၊ L ဆိုင်းဇီ၊ ရွှေရူပါဉီး နှင့် A မီစျာန် စတဲ့ အဆိုများက လာရောက် ဖျော်ဖြေပေးသွားမည် ဖြစ်ကြောင်း ကြေငြာထားပါသည်။
Leave a Comments