သျှမ်းပြည်အတွင်းရှိ တချို့မြို့နယ်များတွင် စက်သုံးဆီများ ပြတ်လပ်နေသေးကြောင်း သတင်းသိရသည်။

စက်သုံးဆီပြတ်လပ်နေသည့် မြို့များမှာ သျှမ်းပြည်ဒေသများဖြစ်သည့် သျှမ်းပြည်မြောက်ပိုင်းမှ ကျောက်မဲမြို့နယ်၊ နမ္မတူ မြို့နယ်၊ လားရှိုးမြို့နယ်၊ ကွတ်ခိုင်မြို့နယ်၊ မူဆယ်မြို့နယ် နှင့် သျှမ်းပြည်တောင်ပိုင်းမှ တောင်ကြီးမြို့၊ ညောင်ရွှေမြို့ တို့ဖြစ်ကြကြောင်း သိရသည်။

ယင်းကဲ့သို့ စက်သုံးဆီများ ပြတ်လပ်မှုကြောင့် ဒေသခံပြည်သူများအနေဖြင့် သွားလာရေးတွင် အခက်အခဲ များ ကြုံတွေ့နေရကြောင်း လားရှိုးမြို့မှ ယာဥ်မောင်းအမျိုးသားတစ်ဦးက သျှမ်းသံတော်ဆင့်ကို ပြောသည်။

“ကျနော်တို့လို လိုင်းကားမောင်းတဲ့ သူတွေက ဒီအခက်ခဲကို ပိုသိတာပေါ့ဗျာ၊ ဘယ်လိုလဲဆိုရင် ကားခကို တိုးကောက်ရင်လည်း ခရီးသည်က မရှိတော့ခက်တယ်၊ အခုဆိုမြို့တွင်းမှာ ဆီတွေပြတ်လပ်နေတယ်၊ ကားတွေနဲ့ ဆီဖြည့်ပေးဖို့ ဆီဆိုင်တွေကလည်း အကန့်အသတ်နဲ့ပဲ ထည့်ပေးတယ်” ဟု လားရှိုးမြို့မှ ခရီးသည် လိုင်းကားမောင်း သည့် ကားသမားတစ်ဦးက ပြောသည်။

ထို့အတူ သျှမ်းပြည်မြောက်ပိုင်း နမ္မတူမြို့၊ မူဆယ်မြို့ နှင့် ကွတ်ခိုင်မြို့တို့တွင်လည်း စက်သုံးဆီဈေးနှုန်း ၂၃၀၀ ကျော်မှ ၂၀၀၀ ဝန်းကျင်သာရှိနေသော်လည်း စက်သုံးဆီများ ပြတ်လပ်နေဆဲဖြစ်ကြောင်းသိရသည်။

လက်ရှိတွင် ကွတ်ခိုင်မြို့အတွင်းရှိ စက်သုံးဆီဆိုင်များ တချို့သည် ဆီပြတ်လပ်မှုကြောင့် ဆိုင်များ ပိတ်ထားနေရပြီး ဖွင့်နေသည့် ဆိုင်များကလည်း အကန့်အသတ်ဖြင့်သာ ဆီများကို ထည့်ပေးနေကြောင်း ကွတ်ခိုင်မြို့ခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ဆီဆိုင်အများစုကတော့ ပိတ်ထားတာတွေ့ရတယ်။ ရောင်းတဲ့ဆိုင်ရှိပေမယ့် အကန့်သတ်နဲ့ ရောင်းပေးတာ ဒီလိုတွေဆက်ဖြစ်မှာဆိုရင် သွားလာရေးတွေ ကူးသန်းရောင်းဝယ်ရေးတွေ ထိခိုက်မှာအမှန်ပဲ၊ ဆီမရှိရင် ဘယ်သူမှ ဘယ်မှ သွားမရဘူးလေ” ဟု ၎င်းအမျိုးသမီးက သျှမ်းသံတော်ဆင့်ကို ပြောသည်။

ထို့အတူပင် သျှမ်းပြည်တောင်ပိုင်း တောင်ကြီးမြို့ပေါ်ရှိ စက်သုံးဆီ ရောင်းချသည့် ဆိုင်တချို့သည် ဩဂုတ် ၆ ရက်၊ နံနက်ပိုင်းမှစပြီး ဓာတ်ဆီ ပြတ်လပ်နေကာ ဆိုင်ပိတ်ထားရခြင်းဖြစ်ပြီး တချို့ဆိုင်များက အကန့်အသတ် ဖြင့်သာ ရောင်းချပေးနေကြောင်း သိရသည်။

ထို့အပြင် ညောင်ရွှေမြို့ရှိ စက်သုံးဆီ အရောင်းဆိုင် အများစုသည် 92 ဓာတ်ဆီနှင့် ရိုးရိုးဒီဇယ် ပြတ်လပ်ကြောင်း ကြေညာကာ ဆိုင်ပိတ်ထားပြီး ဖွင့်လှစ်သည့် ဆိုင်အနည်းငယ် သည်လည်း အကန့်အသတ်ဖြင့်သာ ရောင်းချပေးကြောင်း ဒေသခံအမျိုးသားတစ်ဦးက ပြောသည်။

“ကျနော် ဆီ သွားဖြည့်တော့ မြို့ပေါ်က ဆီပန့်ကြီးတွေမှာတောင် 92 မရှိတော့ဘူး၊ ဒီဇယ်လည်း ကုန်နေပြီတဲ့၊ ဖွင့်နေ တဲ့ ဆိုင်တွေကလည်း ပရီမီယံဒီဇယ်နဲ့ 95 ပဲ ရောင်းနေကြတာ။ ဒါတောင် လိုချင်သလောက် ဝယ်လို့ မရတော့ဘူး။ သူတို့ကတော့ ဆီကား မရောက်သေးလို့ ပိတ်ထားတာတဲ့၊ ဘယ်တော့ ရောက်နိုင်မလဲ မေးတော့ သူတို့လည်း သေချာ မသိဘူး ပြောတယ်” ဟု ညောင်ရွှေမြို့မှ အမျိုးသားက ဆက်လက် ပြောသည်။

ကမ္ဘာ့နိုင်ငံများ အပါအဝင် မြန်မာပြည်မှာလည်း စက်သုံးဆီ စျေးနှုန်းများ ရက်ဆက်ဆိုသလို ကျဆင်းလာသော်လည်း မြန်မာနိုင်ငံမှာ စက်သုံးဆီပြတ်လပ်မှုနှင့် ကြုံတွေ့နေသည်။