သျှမ်းပြည်တောင်ပိုင်း၊ဆီဆိုင်မြို့နယ် ထမ်ဆိုင်းကျေးရွာနှင့် အနီးနားကျေးရွာများတွင် ဘောင်းဘီဝတ်ခွင့် ပိတ်ပင်ထားပြီး၊ ဘောင်းဘီဝတ်လျှင် ဒဏ်ငွေပေးဆောင်ရမည်ဖြစ်ကြောင်း သတင်းရရှိသည်။

ပြီးခဲ့သည့် မေလဆန်းပိုင်းမှစကာ ထမ်ဆိုင်းကျေးရွာနှင့် ၎င်းပတ်ဝန်းကျင် အနီးနားရှိကျေးရွာမှ ဒေသခံများ ရိုးရာ ဝတ်စားဆင်ယင်မှု လျော့နည်းလာခြင်း၊ ကျေးရွာ ဂုဏ်သိက္ခာထိခိုက်စေလာမှုကြောင့် ဘောင်းဘီဝတ်ဆင်မှုကို ကျေးရွာသူကြီးများက ကန့်သတ်လိုက်ကြောင်း ၎င်းဒေသခံများက ပြောသည်။

အဆိုပါ ကန့်သတ်ချက်ကို မလိုက်နာလျှင် ကျေးရွာအလိုက် ငွေကျပ် တစ်သောင်းမှ ငါးသောင်းအထိ ဒဏ်ငွေပေးဆောင်ရမည်ဖြစ်ပြီး ကျေးရွာအတွင်း သာရေး နာရေး ပွဲလုပ်လျှင်လည်း မကူညီကြပဲ ဖယ်ကျဉ်ထားမည်ဟု ရွာလူကြီးများ၏ ခြိမ်းခြောက်မှုကိုလည်း ခံနေရကြောင်း အသက် ၃၀ အရွယ် ကိုယ်တိုင်ပြောဆိုခံရသည့် အမျိုးသမီးတစ်ဉီးက သျှမ်းသံတော်ဆင့်ကိုပြောသည်။

“အိမ်မှာနေရင်းတောင် ဘောင်းဘီဝတ်လို့မရဘူး၊ ဟိုးနားဒီနားလည်လည်း ဝတ်လို့မရဘူး၊ဝတ်ချင်ရင် တခြားနေရာ မြို့တွေသွားမှ ဝတ်ရမယ်တဲ့၊ ကျေးရွာဂုဏ်သိက္ခာထိခိုက်လို့တဲ့ ရိုးရာဓလေ့ တွေ့ပျောက်ကွယ်မှာ ဆိုးလို့ပြောတာပဲ၊ ဘောင်းဘီဝတ်တာက ပိုလွတ်လပ်တယ်လေ အခုမဝတ်ရတော့ အဆင်မပြေနေေဘူး။”ဟု ၎င်းအမျိုးသမီးကပြောသည်။

ခေတ်နှင့်အညီ လိုက်လျောညီထွေ လွတ်လပ်ပေါ့ပါးမှုကို လူငယ်အများစုကြိုက်နှစ်သက်ပြီး ကန့်သတ်ချက်များသည် စိတ်ကျဉ်းကျပ်စေသောကြောင့် ဖြေလျော့ပေးစေလိုကြောင်း ၎င်းအမျိုးသမီးက ထပ်လောင်းပြောသည်။

ထို့အပြင် လူငယ်အများစုသည် မိမိတို့၏ ရိုးရာဝတ်စုံကို မေ့လျော့ကာ ဘောင်းဘီ စကတ်များဝတ်ဆင်သူ များလာခြင်းကြောင့် ရိုးရာဓလေ့များ ကွယ်ပျောက်သွားမည်ကို စိုးရိမ်ကြောင်းနှင့် ကန့်သတ်ချက်များကို လိုက်နာကာ ရိုးရာဓလေ့ထိန်းသိမ်းသင့်ကြောင်း အသက် (၆၀)ဝန်းကျင် အမျိုးသမီးတစ်ဦးက ပြောသည်။

“ဒါက ကိုယ့်ရိုးရာ ယဉ်ကျေးမှုဆိုတော့ ထိန်းသိမ်းရမယ်လေ၊ အမွိုးတို့ဆို ငယ်ငယ်လေးကတည်းက ရိုးရာဝတ်စုံဝတ်ခဲ့တာ တန်ဖိုးထားတယ်၊ အခုခေတ်ဆို ပွဲလမ်းသဘင်တွေမှ ကိုယ့်ရိုးရာဝတ်စုံကို ထုတ်ဝတ်ကြတာ၊ နောက်ဆို ကိုယ့်ရိုးရာကို မေ့ပျောက်သွားမှာစိုးရိမ်မိတယ်။”ဟု အဆိုပါ အမျိုးသမီးတစ်ဦးက ပြောသည်။

ဆီဆိုင်မြို့နယ်သည် ပအိုဝ်းပြည်သူ့စစ် (PNO)ထိန်းချုပ်သည့် ဒေသဖြစ်ပြီး ကျေးရွာလူကြီးများသည်လည်း PNO မှရွေးချယ်ခန့်အပ်သူ အများဆုံးဖြစ်ကြောင်း သိရသည်။

ထို့ကြောင့် ကျေးရွာတစ်ရွာ၏ အာဏာသည် ကျေးရွာလူကြီးလက်ထဲတွင်ရှိပြီး PNOမှ ကျောထောက်နောက်ခံ ပြုပေးထားသောကြောင့် အမိန့်များကို လွန်ဆန်ရဲသူမရှိကြောင်း ဆီဆိုင်ဒေသခံများက ပြောသည်။

အလားတူ ပြီးခဲ့သည့် ၂၀၂၂ ခုနှစ် ထမ်ယန်းကျေးရွာအုပ်စု ဘက်တွင်လည်း ဘောင်းဘီစကတ် မဝတ်ရ ကန့်သတ်ထားသည့်အပြင် ချစ်သူရည်းစားဖြင့် ဆိုင်ကယ်အတူစီးခြင်း၊ ဆံပင်အရောင်ဆိုးခြင်း မပြုလုပ်ရန် ကန့်သတ်ထားပြီး မလိုက်နာလျှင် သဲတစ်စီးနှင့် ငွေကျပ် ငါးသောင်း ဒဏ်ငွေဆောင်ခိုင်းကြောင်း သိရသည်။