Saturday, December 3, 2022

မိုင်းဝီးဒေသခံများကို TNLA မှ မူးယစ်အကြောင်းပြဖမ်းဆီး ပိုက်ဆံတောင်း

Must read

သျှမ်းပြည်မြောက်ပိုင်း နမ့်ခမ်းမြို့နယ် မိုင်းဝီးကျေးရွာအုပ်စုအတွင်းတွင် တအာင်း (ပလောင်) အမျိုးသားလွတ်မြောက်ရေး တပ်မတော် TNLA တို့မှ ဒေသခံပြည်သူများကို မူးယစ်ဆေးဝါးအကြောင်းပြဖမ်းဆီးပြီး ပိုက်ဆံတောင်းခံနေကြောင်း သတင်းသိရသည်။

မိုင်းဝီး

ပြီးခဲ့သည့် ဇူလိုင် ၁၁ ရက် ည ၈ နာရီဝန်းကျင်တွင် TNLA တပ်ဖွဲ့တို့သည် မိုင်းဝီးကျေးရွာအတွင်းသို့ ရောက်ရှိလာပြီး ရွာသားများကို မူးယစ်ဆေးဝါး သုံးစွဲမှုရှိ၊ မရှိ ဆီး စစ်ခဲ့ကြောင်း အသက် ၃၀ ကျော် အမျိုးသား တစ်ဦးက သျှမ်းသံတော်ဆင့်ကို ပြောသည်။

“ရွာထဲကို ရောက်လာတဲ့ TNLA စစ်အင်အားက ၃၀ လောက်ရှိတယ်၊ ရွာသားတွေကို မူးယစ်ဆေးဝါး သုံးမသုံး စစ်မယ်ဆိုပြီးတော့ ခွက်တစ်ခုပေးပြီး ဆီး စစ်တာ၊ အဖြေပေါ်တဲ့သူတွေက အဖမ်းခံထားရပြီးတော့ ပြန်လွတ် စေချင်ရင် ရွာလူကြီးထောက်ခံချက် နဲ့ ပိုက်ဆံ ၅ သိန်း ၆ သိန်း တောင်းတယ်” ဟု အသက် ၃၀ အရွယ်ရှိ အမျိုးသား တစ်ဦး က ပြောသည်။

ပြီးခဲ့သည့် ဇူလိုင်လ ၁၁ ရက်နေ့တွင် ဖမ်းဆီးခံရသည့် ရွာသားများသည် ၂၀ ဦး ထက်မနည်းရှိနေပြီး အများစုသည် သျှမ်းလူမျိုးများဖြစ်ပြီး ပြန်လွှတ်စေလိုပါက ရွာလူကြီး ထောက်ခံချက် နှင့်အတူ ပိုက်ဆံ ၆ သိန်းဖြင့် လာရွေးကြရန် ပြောဆိုခဲ့ကြောင်းလည်း ၎င်းက ဆက်လက်ပြောသည်။

မိုင်းဝီးကျေးရွာ

“တချို့ပြည်သူတွေက မူးယစ်ဆေးသုံးကြတဲ့သူတွေ မဟုတ်ပါဘူး။ ဒါပေမဲ့ သူတို့က သုံးတယ်ဆိုပြီးတော့ဖမ်းတာ ၊ အသက် ၆၀ လောက်ရှိတဲ့ အမျိုးသားတစ်ဦးလည်း အဖမ်းခံရတယ်၊ သျှမ်းလူငယ်တွေလည်း အဖမ်းခံရတာ များတယ်၊အဖမ်းခံထားရတဲ့သူတွေ ပြန်လွှတ်စေချင်ရင် ပိုက်ဆံ ၆ သိန်းပေးရမယ်တဲ့” ဟု အထက်ပါ ပုဂ္ဂိုလ်က ထပ်လောင်း ပြောသည်။

ထို့အပြင် ယမန်နေ့ ဇူလိုင် ၁၃ ရက်တွင်လည်း တပ်သားအင်အား ၂၀ ကျော်ရှိသည့် TNLA တပ်ဖွဲ့သည် မိုင်းဝီးကျေးရွာအုပ်စုအတွင်းသို့ ထပ်မံဝင်ရောက်လာပြီး နောက်ထပ် သျှမ်းလူမျိုး ၂ ယောက်ကို ဖမ်းဆီး ခေါ်ဆောင်သွားကြောင်းလည်း ဒေသခံများထံမှ သိရသည်။

TNLA တပ်သားတို့မှ မူးယစ်ဆေးအကြောင်းပြကာ ရွာသားများကို ဖမ်းဆီးနေခြင်းသည် ဒေသခံရွာသားများကို စိုးရိမ်ထိတ်လန့်စေသည့် အပြင် လုပ်ငန်းဆောင်တာ များကိုပါ ထိခိုက်စေကြောင်း ဒေသခံအမျိုးသားတစ်ဦးက ပြောဆိုဝေဖန်ထားသည်။

“သူတို့ဒီလိုလာလုပ်တော့ ရွာသားတွေက ညမိုးချုပ်တာနဲ့ အပြင်မထွက်ရဲကြတော့ဘူး၊ ပြီးတော့ အခုက လယ်စိုက်ချိန်ဆိုတော့ တချို့လယ်တွေက ရွာနဲ့ဝေးရင် အိမ်ကို စောစောပြန်ရောက်ဖို့ အလုပ်ကို စောစော သိမ်းခဲ့ရတယ် ဆိုတော့ အလုပ်တွေက ပြီးသင့်သလောက်မပြီးဘူးပေါ့” ဟု ၎င်းက ပြောသည်။

TNLA တပ်သားတို့သည် မိုင်းဝီးကျေးရွာအုပ်စုအတွင်းသို့ ညစဥ်နီးပါး ဝင်ရောက်စစ်ဆေးမှုများ ပြုလုပ်နေပြီး ရွာခံများကို ဖမ်းဆီးခြင်း ပိုက်ဆံတောင်းခြင်းများ ပြုလုပ်နေသည့်အတွက် ဒေသခံပြည်သူများ များစွာ အခက်တွေ့နေရကြောင်း သိရသည်။

အဆိုပါဖြစ်စဥ်များနှင့် ပက်သက်ပြီး TNLA ပြောရေးဆိုခွင့်ကို အကြိမ်ကြိမ်ကြိုးစားဆက်သွယ်ခဲ့သော်လည်း အဆက်အသွယ်မရရှိခဲ့ပေ။

Leave a Comments

- Advertisement -spot_img

Latest article