သျှမ်းပြည်တောင်ပိုင်း ဟိုပုံးမြို့ အထက (၁) ကျောင်းရှိ Non-CDM ဆရာမများသည် ကျောင်းလာအပ်သည့် ကျောင်းသားများကို အတင်းအဓမ္မ ကျုရှင် တက်ခိုင်းနေသည်ဟု စုံစမ်းသိရသည် ။
ဟိုပုံးမြို့ ရှိ အထက (၁) ကျောင်းတွင် ကျောင်းလာအပ်သည့် ကျောင်းသား/သူ များကို ကျုရှင်တက်ခိုင်းပြီး မတက်လျှင် ကျောင်းခန်းထဲကို ပေးမဝင်ကြောင်း ကျောင်းသွားအပ်သည့် မိဘများထံမှ သျှမ်းသံတော်ဆင့် ကို ပြောသည်။
ပြီးခဲ့သည့် ဇွန် ၂ ရက်နေ့ကစပြီး ကျောင်းလာအပ်သည့် ကျောင်းသား/သူ များကို ကျုရှင်တက်ခိုင်းကာ တစ်လကို ၂ သောင်းပေးရမည်ဟု ကျုရှင်တက်ရမည့် အတန်းသည် KG မှ တက္ကသိုလ်ဝင်တန်းထိ တက်ရမည်ဟု ဟိုပုံးဒေသခံ တစ်ဦးက သျှမ်းသံတော်ဆင့်ကို ပြောသည်။
“ကျောင်းလာအပ်တဲ့ကလေးတွေ ကျုရှင်မနေရင် ကျောင်းအပ်လက်မခံဘူး။ ကျောင်းလာအပ်တဲ့ချိန်တုန်းက ဆရာမတွေကတန်းမေးတယ်။ ကျုရှင်တက်မလား မတက်ရင် ကျောင်းခန်းပေးမဝင်ဘူး။ ကျောင်းအပ်လက်မခံဘူး“ဟု ကျောင်းသွားအပ်သည့် မိဘ တစ်ဦးက သျှမ်းသံတော်ဆင့်ကို ပြောသည်။
လက်ရှိ အချိန်ကာလသည် စား၀တ်နေရေးခက်ခဲနေသည့် အချိန်ဖြစ်နေသဖြင့် ကလေးများကို ကျူရှင်ထားရန်လည်း ခက်ခဲကြောင်း၊ တစ်လလျှင် ကျူရှင်ခ ကို မြန်မာကျပ်ငွေ ၂ သောင်းကျပ် ပေးရမည် ဟုလည်း သိရသည်။
“အခုအချိန်မှာ အကုန်လုံးက ခက်ခဲနေတယ်၊ စားဖို့သောက်ဖို့လည်း ခက်ခဲနေတယ်၊ အခုကျုရှင် မထားရင်မနေရဆိုပြီး သူတို့ကပြောတယ် ၊ ကျုရှင်တက်နိုင်လား မတက်နိုင်လားလည်း မမေးတော့ဘူး အတင်းအဓ္ဓမ တက်ခိုင်းနေတယ်” ဟု ၎င်းမိဘ ကထပ်လောင်းပြောသည်။
ထို့အပြင် ဟိုပုံးမြို့ရှိ အထက (၁) ကျောင်းရှိ ဆရာ၊ ဆရာမများ လုံလောက်မှုမရှိသဖြင့် ကလေးငယ်များအတွက် အခက်အခဲဖြစ်နေကြောင်း၊ ယခင်က KG တန်းအတွက် အခန်း ၃ ခန်းရှိရာမှ လက်ရှိမှာ တခန်းထဲတွင် စုပေါင်းပြီး စာသင်နေရကြောင်း၊ ဆရာ အင်အားကို စစ်တပ်ထဲမှ ခေါ်ယူထားကြောင်းလည်း အမည်မဖော်လိုသည့် ဟိုပုံးဒေသခံ အမျိုးသမီး တစ်ဦးက ပြောသည်။
“ကျောင်းဆရာမ လုံလုံလောက်လောက် မရှိထားဘူး။ CDM လုပ်တဲ့ဆရာမ နေရာကို အစားထိုးပြီး စစ်တပ်ထဲကခန့်လိုက်တာလည်းရှိတယ်။ ကလေးတွေကို ကောင်းကောင်းစာသင်ပေးမှာ မဟုတ်ဘူး။ အခန်းထဲမှာ ရာနဲ့ချီပြီးရှိတယ်။ ဆရာမကလည်း မလုံလောက်တော့ ကလေးတွေ ကောင်းကောင်းတော့ စာမသင်နိုင်ဘူး “ဟု အထက်ပါ ပုဂ္ဂိုလ် က ပြောသည်။
ဟိုပုံးမြို့နယ်သည် စစ်ကောင်စီ အာဏာသိမ်းပြီးနောက်ပိုင်း လူငယ်များက နည်းမျိုးစုံဖြင့် ဆန့်ကျင် ဆန္ဒ ထုတ်ဖော်နေလျက်ရှိပြီး စစ်ကောင်စီမှ ကျောင်းဖွင့်ခဲ့သော်လည်း ဆရာ၊ ဆရာမများ CDM ဆက်လက်ပြုလုပ်နေကြောင်း သိရသည်။
Leave a Comments