စီးပွားရေးအခြေအနေ ခက်ခဲနေသည့်ကြား ဆက်ကြေးကောက်သင့်သည့်နေရာ ဆက်ကောက်သွားမည်ဟု ကချင် လွတ်မြောက်ရေး တပ်မတော် (KIO/KIA) က ပြောဆိုလိုက်သည်။
သျှမ်းမြောက် KIO/KIA ထိန်းချုပ်သည့် နေရာများတွင် ဆက်ကြေးကောက်သင့်သည့်နေရာ ဆက်ကောက်သွားမည်ဖြစ်ကြောင်း၊ ပြည်သူများအနေဖြင့် အတတ်နိုင်ဆုံး ကြိုးစားပေးဆောင်သင့်ကြောင်း KIO/KIA မှ ပြောရေးဆိုခွင့်ရှိသူ ဗိုလ်မှူးကြီး နော်ဘူက ပြောဆိုလိုက်သည်။
“ KIO ဗဟို ကော်မတီ သဘောထားအရ အခွန်ကောက်သင့်တယ်လို့ ယူဆတဲ့နေရာတွေကို ဆက်ကောက်သွားမှာပါ။ စစ်ကောင်စီအာဏာသိမ်းတဲ့ နောက်ပိုင်းမှာတော့ ပြည်သူတွေ စီးပွားရေးအကြပ်အတည်းများလာပြီး အခွန် ကောက်များတယ်လို့ ဖြစ်လာတာပါ၊ ကျနော်တို့ပြည်သူလူထုလည်း အတတ်နိုင်ဆုံးကြိုးစားပေါ့” ဟု ဗိုလ်မှူးကြီး နော်ဘူ က သျှမ်းသံတော်ဆင့် ကိုပြောသည်။
ပြည်သူများထံ အခွန်ကောက်ယူရန် KIO/KIA ဗဟိုကော်မတီသတ်မှတ်ချက်အရ ကုန်စည်အမျိုးအစားနှင့် စီးပွားရေးလုပ်ငန်းများခွဲဝေကာ တိကျသည့် အခွန်ကောက်ဗမာဏ သတ်မှတ်ထားပြီဖြစ်ကြာင်း သိရသည်။
“ ကျနော်တို့က ဘယ်ပစ္စည်းဘယ်ဆိုင်တွေကတော့ ဘယ်လောက်ကောက်မယ်ဆိုပြီး သတ်မှတ်ထားတဲ့ စံနှုန်းစံထား တွေရှိပါတယ်၊ ကျနော်တို့ KIO ဗဟိုကော်မတီရဲ့ သဘောထားကတော့ အခွန်ကောက်သင့်တဲ့ ဟာတွေကို အကုန် ကောက်မယ်ဆိုတဲ့ ကျနော်တို့ရဲ့ မူပေါ်လစီပဲဖြစ်ပါတယ်၊ အခွန်ကောက်ဖို့ ကြိုတင် အကြောင်းကြားတာတွေ မကြား တာတွေကတော့ ရှေ့တန်းမှာ အလုပ်လုပ်တဲ့ အဖွဲ့နဲ့ ဆိုင်ပါတယ်” ဟု ဗိုလ်မှူးကြီးနော်ဘူ ကဆိုသည်။
နမ့်ခမ်းမြို့နယ်အတွင်း KIA တပ်ဖွဲ့တို့မှ အခွန်ကောက်ယူမှု ပမာဏသည် ယခင်နှစ်ထက် ၂ ဆ ပိုမိုများပြားလာကြောင်း၊ထို့ပြင် သျှမ်းမြောက်ပိုင်းတွင် တိုင်းရင်းသားလက်နက်ကိုင်တပ်ဖွဲ့ များသည့် အပြင် ပြည်သူ့စစ်များလည်း ရှိသဖြင့် ပြည်သူများဆက်ကြေးကို များစွာပေးဆောင် နေရကြောင်း သိရသည်။
ထို့ပြင် သျှမ်းပြည်မြောက်ပိုင်းရှိ ကွတ်ခိုင်မြို့မှ စတင်ကာ မူဆယ်-နမ့်ခမ်း ဘက်ဆက်သွယ်ထားသည့် ကားလမ်းမကြီး တစ်လျှောက်တွင် အိမ်စီးကားအပါအဝင် မော်တော်ယာဥ်များကို ကချင်တပ်မတော် (KIA) မှ ဆက်ကြေး ကောက်တောင်းခံနေမှု တင်းကြပ်နေကြောင်း အမည်မဖော်လို ဒေသခံအမျိုးသားတစ်ဦးက သျှမ်းသံတော်ဆင့် ကို ပြောသည်။
“ဒီနှစ်အခွန်ကောက်တာ အတော်လေးကို ကြမ်းတယ်၊ အိမ်တွေဆိုင်တွေကို အခွန်ဆောင်ဖို့ လာပြောပြီး မဆက်သွယ်ရင် သေနတ်တွေနဲ့ အိမ်ထိလာပြီး သူတို့ကို မလေးစား သလား၊ ဘာလားတွေ ခြိမ်းခြောက်သွား တယ်၊အရင်နှစ်က ၃ သိန်းပေးရတဲ့ သူတွေက ဒီနှစ်မှာဆို ၆ သိန်းပေးရတယ်” ဟု ၎င်းက ပြောသည်။
ကွတ်ခိုင် – မူဆယ်ကားလမ်းမပေါ်မှ မော်တော်ယာဉ်များထံ ဆက်ကြေးကောက်သည့် KIA တပ်သားများက ကားသမားများကို အခွန်ဆောင်ရန် ခြိမ်းခြောက်ပြောဆိုမှုများလည်း ရှိနေကြောင်း လားရှိုး-မူဆယ်ခရီးသည်တင် ယာဉ်မောင်း ကားသမားများထံမှ သိရသည်။
သျှမ်းပြည်မြောက်ပိုင်းမှာ သျှမ်းတပ်မတော် (SSPP/SSA)၊ တအာင်းတပ်မတော် (TNLA) ၊ ကိုးကန့် တပ်မတော် (MNDAA) အပြင် တခြားသော ဒေသခံပြည်သူ့ကာကွယ်ရေးတပ်ဖွဲ့များလည်း သွားလာလှုပ်ရှားနေသည့် နယ်မြေ ဒေသ ဖြစ်သည်။
