သျှမ်းပြည်တောင်ပိုင်း ရပ်စောက်မြို့နယ် နောင်ဝိုးကျေးရွာအုပ်စု ပန်ခါကျေးရွာနေ အသက် ၂၇ နှစ်အရွယ် အမျိုးသားတစ်ဦးသည် ယမန်နေ့ (မတ် ၂)ရက်တွင် မိုင်းနင်းမိပြီး ပွဲချင်းပြီး သေဆုံးသွားကြောင်း စုံစမ်းသိရှိရသည်။
ယမန်နေ့ (မတ်လ ၂) ရက် နေ့လည် ၃ နာရီဝန်းကျင်တွင် အသက် (၂၇)နှစ်အရွယ်ရှိ စိုင်းခမ်းသည် ငါးသွားဖမ်းရန် အတွက် သွားစဉ် တောထဲတွင် မိုင်းနင်းမိပြီး သေဆုံးသွားကြောင်း သိရသည်။
“မနေ့က ဖြစ်တာပါ။ သူက ငါးသွားရှာတာတဲ့။ ငါးသွားရှာရင်း ဖြစ်သွားတာ။ မိုင်းနင်းမိပြီးတော့ အဲနေရာမှာပဲ ချက်ချင်းသေဆုံးသွားတာ။ သူနဲ့လိုက်သွားတဲ့သူတော့ရှိတယ်။ ဒါပေမဲ့ သူပဲ ထိပြီး သေဆုံးသွားတာ” ဟု စိုင်းခမ်း၏ ဆွေမျိုးတော်စပ်သူ အမျိုးသမီးက သျှမ်းသံတော်ဆင့်ကို ပြောသည်။
အဆိုပါ စိုင်းခမ်းသည် ကျေးရွာတွင် လူငယ်ခေါင်းဆောင်ဖြစ်ပြီး လူငယ်များကို ရိုးရာ အက သင်ပေးသူ တစ်ဦးလည်း ဖြစ်သည်။
ထိုသို့ မိုင်းနင်းမိပြီး သေဆုံးခြင်းသည် ပန်ခါကျေးရွာတွင် ပထမဆုံးအကြိမ်ဖြစ်ပြီး ယခင်က မရှိဖူးကြောင်း၊ တိုင်းရင်းသားလက်နက်ကိုင်အချင်းချင်း တိုက်ပွဲဖြစ်ပွားရာမှ မြေမြှုပ်မိုင်းများ ရှိလာကြောင်း သိရသည်။
“အရင်က မရှိဖူးဘူး။ ဒါက ပထမဆုံးပဲ။ အရင်ဆိုရင် မြေမြှုပ်မိုင်းလည်း မရှိဘူး။ ဘာမိုင်းမှမရှိဘူး။ မိုင်းနင်းမိပြီး သေဆုံးတာတော့ သူ ပထမဆုံးပဲ။ တိုက်ပွဲဖြစ်ပြီးနောက်မှ ဒီလိုတွေဖြစ်လာတာ” ဟု ဒေသခံ အမျိုးသမီးတစ်ဦးက ပြောသည်။
RCSS/SSA နှင့် မြောက်ပိုင်းမဟာမိတ်တို့ သျှမ်းပြည်မြောက်ပိုင်းတွင် တိုက်ပွဲစတင်ဖြစ်ပွားခဲ့ပြီး သျှမ်းပြည်တောင်းပိုင်အထိ စစ်မီးကူးလာတာဖြစ်ကြောင်း၊ မြေမြှုပ်မိုင်းများကို အသုံးပြုခဲ့ကြပြီး ပြန်ထွက်ခွာချိန်တွင် မိုင်းများကို ပြန်လည်ဖြေရှင်းပေးတာ မရှိသောကြောင့် ပြည်သူများက မြေစာပင်အဖြစ် မိုင်းနင်းမိ သေဆုံးမှုများရှိနေကြသည်။
ထိုသို့ သေဆုံးမှုများရှိနေသော်လည်း လက်နက်ကိုင်အဖွဲ့အစည်းမှ တာဝန်ယူဖြေရှင်းပေးခြင်းလည်း မရှိကြောင်း သိရသည်။
ထို့အပြင် ပြီးခဲ့သည့် ဖေဖော်ဝါရလ ၂၈ ရက်နေ့တွင်လည်း နောင်ဝိုးကျေးရွာအနီးတွင် ဆိုင်ကယ်ဈေးသည်အမျိုးသားတစ်ဦး မိုင်းနင်းမိပြီး ပြင်းထန်စွာ ဒဏ်ရာရရှိခဲ့ကြောင်း သိရသည်။
Leave a Comments