သျှမ်းပြည် တောင်ပိုင်း ရပ်စောက်မြို့နယ် ကျောက်ဂူတိုက်နယ်အတွင်း ပြီးခဲ့သည့် ဖေဖော်ဝါရီ ၁၂ ရက်က ဒေသခံ အမျိုးသမီး ၂ ဦး မိုင်းနင်းမိပြီး ပြင်းထန်ဒဏ်ရာ ရရှိခဲ့ကြောင်း သတင်းသိရသည်။
ပြီးခဲ့သည့် ဖေဖော်ဝါရီ ၁၂ ရက် မွန်းလွဲ ၃ နာရီကျော်တွင် ကျောက်ဂူတိုက်နယ် နောင်ဝိုးကျေးရွာနှင့် ကုန်းသာ ကျေးရွာအကြား ကြိုးတံတား အနီးတွင် မိုင်းနင်းမိခဲ့တာဖြစ်ကြောင်း သိရသည်။
“ညီအစ်မ နှစ်ယောက်ပါ၊ ညီမဖြစ်သူက နောင်ဝိုးရွာကနေ ပန်ဟိုင်းရွာမှာ ရှိတဲ့ အစ်မဖြစ်သူကို သွားကြိုတာ၊ သွားတုန်းက ဘာမှ မဖြစ်ဘူး၊ ပြန်လာတဲ့အချိန်မှာ ဖြစ်သွားတာ၊ ကြိုးတံတား အကျော် ကုန်းအတက် ဆိုင်ကယ်က မတက်နိုင်တော့လို့ ခြေလှမ်းထောက်လိုက်တဲ့ အချိန် မိုင်းနင်းမိတာ၊ လမ်းလယ်ခေါင်မှာကို ဖြစ်သွားတာ” ဟု ကျောက်ဂူကျေးရွာမှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို အမျိုးသမီး ၂ဦးမှာ နန်းမိုခေါင် (၂၃)နှစ် နှင့် နန်းကြာဥ (၁၉)နှစ်တို့ ဖြစ်ကြောင်း၊ ဒဏ်ရာပြင်းထန်မှုကြောင့် ရပ်စောက်ဆေးရုံမှ တဆင့် တောင်ကြီး စဝ်စံထွန်းဆေးရုံသို့ ပို့ဆောင်ကာ ဆေးကုသမှု ခံယူနေရကြောင်း သိရသည်။
“အစ်မဖြစ်သူက ခြေထောက်၊ တင်ပါး၊ ခါးတွေမှာ ဒဏ်ရာရခဲ့တာ၊ ညီမဖြစ်သူကတော့ ပေါင်ရင်း၊ ကျောကုန်းနဲ့ တင်ပါးတွေမှာ ထိမှန်ခဲ့တယ်၊ ဒဏ်ရာတွေကတော့ ပြင်းတယ်၊ ပြီးတော့ ငွေကြေးလည်း အခက်ခဲ ဖြစ်နေသေး တယ်၊ ခွဲစိတ်ရမှာတွေ ရှိတယ်လို့ ပြောတယ်” ဟု မိုင်းထိလူနာကို ကူညီနေသူ အမျိုးသားတစ်ဦးက ပြောသည်။
ရပ်စောက်မြို့နယ် ကျောက်ဂူတိုက်နယ်အတွင်း ပြီးခဲ့သည့် ဖေဖော်ဝါရီ ၉ ရက်နေ့တွင် မြောက်ပိုင်း မဟာမိတ်တပ်ဖွဲ့နှင့် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) တို့ တိုက်ပွဲပြင်းထန်ခဲ့ပြီး ဒေသခံနေအိမ်များ၊ ဂိုဒေါင်၊ ဆောက်လက်စ ဘုန်းကြီးကျောင်းတို့ လက်နက်ထိမှန် ပျက်စီးမှုများလည်း ရှိခဲ့ကြောင်း ဒေသခံများထံမှ သိရသည်။
ထို့အပြင် ထိုတိုက်ပွဲကြောင့် ကျောက်မဲမြို့နယ်မှ ရပ်စောက်မြို့နယ် ကျိုင်းခမ်းကျေးရွာအုပ်စုအတွင်း လာရောက်ခိုလှုံနေသည့် စစ်ရှောင် (၅၀၀)ကျော်သည် ဟိုပုံးမြို့နယ် ဖာလိုင်းကျေးရွာတို့ ထပ်မံပြောင်းရွေ့ တိမ်းရှောင်ခဲ့ရကြောင်း သိရသည်။
Leave a Comments