သျှမ်းပြည်တောင်ပိုင်း ရပ်စောက်မြို့ ကျောက်ဂူကျေးရွာအနီးတွင် တိုင်းရင်းသားလက်နက်ကိုင်အချင်းချင်း တိုက်ပွဲ ဆက်လက်ပြင်းထန်နေကြောင်း သတင်းသိရသည်။
ယနေ့ (ဖေဖော်ဝါရီလ ၉ ရက်) မနက် ၁၁ နာရီဝန်းကျင်မှ နေ့လည် ၁ နာရီအထိ သျှမ်းပြည် တောင်ပိုင်း ရပ်စောက်မြို့နယ်အတွင်းမှ ကျေးရွာများအထိ မြောက်ပိုင်းမဟာမိတ်တပ်ဖွဲနှင့် သျှမ်းပြည်ပြန်လည်ထူထောင် ရေး ကောင်စီ၊ သျှမ်းပြည်တပ်မတော် (RCSS/SSA) တို့က တိုက်ပွဲများ ပြင်းထန်စွာ ဖြစ်ပွားနေကြောင်း သတင်း သိရသည်။
“ကျောက်ဂူအပြင်ဘက်က ဘုရားတွေနဲ့ သင်္ချိုင်းကုန်းအနီးမှာ တိုက်ပွဲစဖြစ်ပါတယ်၊ နောက်တော့ တဖြေးဖြေးနဲ့ ရွာတွင်းဘက်ရောက်လာတယ်၊ ရွာသားတွေကလည်း အကုန်လုံး ပုန်းနေကြတယ်”ဟု ကျောက်ဂူကျေးရွာမှ ရွာသားတစ်ဦးက သျှမ်းသံတော်ဆင့်ကို ပြောသည်။
ယနေ့ တိုက်ပွဲတွင် သေနတ်သံများ အပြင် လက်နက်ကြီးသံများလည်းကြားရပြီး ယမန်နေ့ထက် တိုက်ပွဲပြင်းထန်နေသည့်အတွက် ပြည်သူများက အိမ်တွင်း၌ပုန်းအောင်းနေထိုင်ကြရကြောင်း သိရသည်။
ယနေ့ ဖေဖော်ဝါရီ (၈) ရက်တွင်လည်း ရပ်စောက်မြို့နယ် ကျောက်ဂူကျေးရွာအနီးတိုက်ပွဲဖြစ်ပွားသည့် အတွက် အဆောက်အအုံနှင့် ဘုန်းကြီးကျောင်းများ လက်နက်ကျည်ဆန်ထိမှန်ပျက်စီးကြောင်း သတင်းသိရသည်။
“ဒီနေ့လည်း ကျောက်ဂူရဲစခန်းအနီးဘေးဖက်မှာ ရှိနေတဲ့ သစ်သီးပွဲရုံတစ်ခု လက်နက်ကြီးကျပြီး မီးလောင် တယ်လို့ သိရပါတယ်၊ ကျောက်ဂူထဲကိုလည်း SSPP/ SSA စစ်သားတွေလည်းရောက်ရှိနေတယ်” ဟု ဒေသခံများက ပြောသည်။
ယင်းတိုက်ပွဲများနှင့်ပက်သက်ပြီး သျှမ်းပြည်တိုးတက်ရေးပါတီ၊ သျှမ်းပြည်တပ်မတော် SSPP/SSA မှ ပြောရေးဆိုခွင့်ရှိသူ ဗိုလ်မှူးဖုန်းဟန်က “မနေ့က တိုက်ပွဲဖြစ်တာတော့ ဟုတ်တယ်၊ နောင်လုံမှ နောင်ဝိုးကို သွားတဲ့ ကားလမ်းမကြီး ကြားမှာ ဖြစ်တာ၊ နေရာအတိအကျတော့ မသိရသေးဘူး” ဟုသျှမ်းသံတော်ဆင့်ကို ပြောသည်။
တိုင်းရင်းသားလက်နက်ကိုင် တိုက်ပွဲအချင်းချင်းကြောင့် စစ်ရှောင် (၄၀၀) ကျော်သည် သျှမ်းတောင် ရပ်စောက်မြို့နယ် ကျိုင်းခမ်းကျေးရွာအုပ်စုအတွင်းသို့ ပြောင်းရွှေ့ရကြောင်း သိရသည်။
