စစ်ကောင်စီက ပြုလုပ်မည့် (၇၅) နှစ်မြောက် ပြည်ထောင်စုနေ့ အခမ်းအနားကို ပြည်တွင်း ပြည်ပ သျှမ်းလူမှုအဖွဲ့အစည်းများ‌ သျှမ်းပြည်တွင်းရှိ တိုင်းရင်းသားလက်နက်ကိုင်များ နိုင်ငံရေးပါတီများ မသွားတက်ရောက်ရန် နှိုးဆော်ထားကြောင်း စုံစမ်းသိရှိရသည်။

ဖေဖော်ဝါရီ (၁၂) ရက်တွင် ကျရောက်မည့် စိန်ရတု ပြည်ထောင်စုနေ့ အခမ်းအနားကို စစ်ကောင်စီက နေပြည်တော်သို့ ပြုလုပ်သွားမည်ဖြစ်ကြောင်း သိရှိရသည်။

“အခု စစ်ကောင်စီက ဖိတ်ခေါ်တဲ့ ထာဝရ ငြိမ်းချမ်းရေး က ဒါကမဖြစ်နိုင်ဘူး။ စစ်ကောင်စီက ထာဝရ ငြိမ်းချမ်းရေး ပေးမယ်ဆိုတာက မက်လုံးတစ်ခုပဲပေါ့။ ယုံကြည်နိုင်ဖွယ်ရာမရှိဘူး။ (၇၅) နှစ်အတွင်း ကြုံတွေ့ခဲ့ရတဲ့ သင်ခန်းစာတွေက သူတို့ လုပ်ရပ်တွေကို ကြည့်ခြင်းအားဖြင့် မဖြစ်နိုင်ဘူးဆိုတာ သိတာဖြစ်တဲ့အတွက် မတက်ရောက်ဖို့ရာ ကျနော်တို့ သျှမ်းအဖွဲ့အစည်းကို တိုက်တွန်းရခြင်းဖြစ်တယ်” ဟု ရန်ကုန် သျှမ်းလူငယ် ပြောရေးဆိုခွင့်ရှိသူ တစ်ဦး ကသျှမ်းသံတော်ဆင့် ကိုပြောသည်။

စစ်ကောင်စီ ပြုလုပ်မည့် ပြည်ထောင်စုနေ့ အခမ်းအနားကို သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) သည် လူကြီးပိုင်း စည်းဝေး မဆုံးဖြတ်ရသေးကြောင်း RCSS ၏ ပြောရေးဆိုခွင့်ရှိသူ ဗိုလ်မှူးခမ်းစံ က သျှမ်းသံတော်ဆင့် ကိုပြောသည်။

“ဒီကိစ္စကတော့ ကျနော်တို့ မဆုံးဖြတ်ရသေးဘူး။ မဆုံးဖြတ်သေးဘူးဆိုတော့ တက်ဖို့ မတက်ဖို့ ကျနော် ပြောဖို့မရှိဘူး။ လူကြီးပိုင်းတွေက သူတို့ စည်းဝေး မဆုံးဖြတ်ရသေးဘူး။ တခြားမှတ်ချက်ပေးဖို့ မရှိဘူး”ဟု RCSS ၏ ပြောရေးဆိုခွင့်ရှိသူ ဗိုလ်မှူးခမ်းစံ က သျှမ်းသံတော်ဆင့် ကိုပြောသည်။

ထိုနည်းတူ တအာင်း(ပလောင်)အမျိုးသား လွတ်မြောက်ရေးတပ်မတော် (TNLA) သည် စစ်ကောင်စီမှ ပြုလုပ်မည့် အခမ်းအနားသွား တက်ရန် မရှိကြောင်း သိရှိရသည်။

“ဖိတ်တာမဖိတ်တာတော့ ကျနော်မသိရဘူး။ တက်ဖို့ကတော့ မရှိဘူး။ တက်ဖို့ မရှိဘူးလို့ အဲ့လိုမျိုးပဲ ရှင်းပြလို့ရတယ်။ ဘာကြောင့်ဆိုတာတော့ ကျနော်မရှင်းပြနိုင်ဘူး။ အထက်ခွင့်ပြုချက်က မတက်ဖို့လို့တော့ ပြောတယ်” TNLA ပြောရေးဆိုခွင့်ရှိသူ ဗိုလ်မှူးတားအိုက်ကျော် က သျှမ်းသံတော်ဆင့် ကိုပြောသည်။

မြန်မာနိုင်ငံမှာ ဒီမိုကရေစီ နှင့် ဖက်ဒရယ်စနစ်အခြေခံသည့် ပြည်ထောင်စု တည်ဆောက်နိုင်ရေးအတွက် ထာဝရငြိမ်းချမ်းရေး အကြိုညှိနှိုင်း ဆွေးနွေးပွဲ တက်ရောက်ဖို့ စစ်ကောင်စီက ဖေဖော်ဝါရီ (၆) ရက်မှာ ထုတ်ပြန်ခဲ့သည်။

ထို ထုတ်ပြန်ချက်မှာ စစ်ကောင်စီဘက်မှ အကြမ်းဖက်အဖွဲ့ကို ကြေညာထားသည့် အဖွဲ့မှ လွဲပြီး တိုင်းရင်းသားအဖွဲ့အစည်း အားလုံးကို ဖိတ်ခေါ်ကြောင်း ထုတ်ပြန်ထားသည်။

“မသွားတက်သင့်ဘူးလို့တော့ မြင်တယ်။ လက်ရှိချိန်မှာ သူတို့ပြောသလို ပြည်ထောင်စု ငြိမ်းချမ်းရေးလုပ်မယ်ဆိုတာ မဖြစ်နိုင်ဘူး။ မဖြစ်နိုင်လို့ ဒီလို အာဏာသိမ်းတာဖြစ်လာတာပေါ့။ မသွားတက်ရောက်သင့်ဘူးပေါ့နော်။ ကျမတို့ လူငယ်တွေအနေနဲ့လည်း အားမပေးဘူးပေါ့နော်” ဟု သျှမ်းလူငယ် အမည်မဖော်လိုသူ အမျိုးသမီး တစ်ဦးကပြောသည်။

သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) အဖွဲ့သည် စစ်ကောင်စီမှ ပြုလုပ်သည့် ပြည်ထောင်စုနေ့ အခမ်းအနား နှင့် ပတ်သက်ပြီး သျှမ်းသံတော်ဆင့်မှ ဆက်သွယ်မေးမြန်းရာမှာ ၎င်းကိစ္စနှင့် ပတ်သက်ပြီး သေချာမသိရသေး ကြောင်း SSPP/SSA ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန် ကပြောသည်။

လာမည့် (၇၅) နှစ်မြောက် ပြည်ထောင်စုနေ့ အခမ်းအနား ကျင်ပစဉ်ကာလအတွင်း ထာဝရငြိမ်းချမ်းရေး အကြိုဆွေးနွေးပွဲ ကျင်းပသွားမည်ဟု သိရသည်။

မြန်မာနိုင်ငံတွင် ပြီးခဲ့သည့် နှစ် စစ်တပ် အာဏာသိမ်းပြီးနောက် အပစ်အခတ်ရပ်စဲရေး လုပ်ထားသည့်အဖွဲ့များနှင့် ငြိမ်းချမ်းရေး ဆွေးနွေးမှုများရပ်တန့်ခဲ့ပြီး တချို့ လက်နက်ကိုင်များနှင့် စစ်ရေးတင်းမာမှုများရှိနေကြောင်းသိရသည်။