သျှမ်းပြည်တောင်ပိုင်းရှိ ဟိုပုံး – ကျောက်တန်း – ပင်လုံလမ်းအသစ်တွင် ပအိုဝ်းအမျိုးသား တပ်မတော် (PNA) က စစ်ဆေးရေး ဂိတ် ဖွင့်လှစ်ပြီး အင်အားဖြည့်တင်းနေကြောင်း ကိုယ်တိုင် ကြုံတွေ့ခဲ့သူများက ပြောပြသည်။

“ဒီစစ်ဆေးရေးဂိတ်က အရင်ကတည်းက ရှိခဲ့တယ်၊ ဒါပေမဲ့ စစ်သားတွေ ဒီလောက်မရှိခဲ့ဘူး၊ ဒီနေ့ ကျနော်က ပွန်ချောင်းဘက် သွားရင်းနဲ့ တွေ့ခဲ့တာ၊ ပိုက်ဆံကောက်တာတော့မရှိဘူး၊ ဘယ်သွားမယ် ဘယ်ကလာလဲဆိုတာတော့ မေးတယ်” ဟု ကိုယ်တိုင်ကြုံတွေ့ခဲ့သည့် အသက် ၃၀ ကျော် အမျိုးသားက သျှမ်းသံတော်ဆင့်ကို ပြောသည်။

အဆိုပါ PNA စစ်ဆေးရေးဂိတ်သည် ဟိုပုံး – ကျောက်တန်း – ပင်လုံ ကားလမ်းသစ်မှ ပွန်ချောင်း မရောက်ခင်တွင် တည်ရှိနေပြီး စစ်တပ် အာဏာသိမ်းပြီးနောက်ပိုင်းမှ လာရောက်ဖွင့်လှစ်သော စစ်ဆေးရေးဂိတ် ဖြစ်ကြောင်း သတင်းသိရသည်။

စစ်တပ်မှ နိုင်ငံတော်အာဏာသိမ်းပြီးနောက်ပိုင်း ဖွင့်လှစ်လာသည့် အဆိုပါ စစ်ဆေးရေးဂိတ်သည် အစောင့် စစ်သား အနည်းငယ်ဖြင့်သာ စောင့်ကြည့်ထားရှိသော်လည်း ယနေ့ ဖေဖော်ဝါရီလ ၉ ရက်နေ့တွင် မြင်တွေ့ ရသော စစ်သားများသည် ယခင်နေ့ရက်များထက် ပိုမိုများပြားကြောင်း ဒေသခံများက ပြောသည်။

“အရင်တုန်းက ကားကို ရပ်မပေးဘဲ သူတို့ဖွင့်ပေးတာနဲ့ ဖြတ်သွားလို့ရတဲ့ ဂိတ်ပေါ့၊ ဒီနေ့တော့ ကားကို စစ်တယ်၊ ပြီးတော့ သတင်းပေးရတယ်၊ စစ်သားအရေအတွက်လည်း ခါတိုင်းထက် ပိုများတယ်” ဟု ကြုံတွေ့ရသည့် အမျိုးသားက သျှမ်းသံတော်ဆင့်ကို ပြောသည်။

ယင်းကဲ့သို့ စစ်ဆေးမှုများ ပြုလုပ်လာမှုနှင့် ပတ်သက်ပြီး PNA မှ တာဝန်ရှိသူများဖြစ်ကြသည့် စစ်ဦးစီးချုပ် ဦးခွန်မြင့်အောင်နှင့် ဗိုလ်မှူးကြီး ဇော်ပျံ တို့ကို ဆက်သွယ်မေးမြန်းရာ အကြောင်းရင်း မသိရှိရသေးကြောင်း သျှမ်းသံတော်ဆင့်ကို ပြောဆိုသည်။

ယမန်နေ့ ဖေဖော်ဝါရီလ ၈ ရက်တွင်လည်း အဆိုပါ ဟိုပုံး – ကျောက်တန်း – ပင်လုံ လမ်းဘက်တွင် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) မှ လမ်းသွားလမ်းလာပြည်သူများထံ အခွန်ငွေ တောင်းခံသည့် သတင်းများလည်း ထွက်ပေါ်လာသည်။

ယင်းကဲ့သို့ RCSS/SSA မှ အခွန်ကောက်ခံသည့် သတင်းထွက်ပေါ်လာပြီးနောက် PNA မှ စစ်ဆေးရေးဂိတ်ကို အင်အားဖြည့်တင်းခြင်းနှင့် စစ်ဆေးမှုများ စတင်ပြုလုပ်လာခြင်း ဖြစ်သည်။