သျှမ်းပြည်တောင်ပိုင်း ကျေးသီးမြို့နယ် အတွင်း တိုက်ပွဲဖြစ်ပွားခဲ့သည့်အတွက် ထွက်ပြေးတိမ်းရှောင်လာသည့် အသက် (၁၉)နှစ် အရွယ်ရှိ အမျိုးသား (၁)ဦးသည် လဲချားမြို့နယ် လွိုင်တန့်အနီးတစ်ဝိုက် ပျောက်ဆုံးခဲ့သည်မှာ (၃)လအကြာ ရှိခဲ့ပြီဖြစ်ကြောင်း စုံစမ်းသိရသည်။
စိုင်းဆိုင်ဟုမ် (၁၉) နှစ်သည် ကျေးသီးမြို့နယ် ဝမ်းကာကျေးရွာတွင် နေထိုင်ပြီး နိုဝင်ဘာ ၁ ရက်နေ့တွင် လဲချားမြို့နယ် လွိုင်တန့်ကျေးရွာအနီးတဝိုက်တွင် ဖမ်းဆီးခံရကြောင်း၊ ထိုနေရာတွင် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA)မှ နယ်မြေစိုးမိုးနေသည့် နေရာဖြစ်ကြောင်း စိုင်းဆိုင်ဟုမ်၏ မိသားစုဝင်တစ်ဦးက သျှမ်းသံတော်ဆင့် ကို ပြောသည်။
“အဲနားမှ RCSS တွေ ရှိထားတဲ့နေရာဖြစ်တယ်။ ကျမတို့သိထားရတာက စိုင်းဘောဂ ဦးဆောင်တဲ့ တပ်မ(၆)က ခေါ်သွားတယ်လို့ သိရတယ်။ အခုတော့ တောင်ပေါ်ကို ခေါ်သွားတယ်လို့သိရတယ်။ သူ့ကို ပြန်လွှတ်လာပေးဖို့လည်း ကျမတို့ စာတင်ထားတယ်။ ၂ ကြိမ်ရှိပြီ စာတင်ထားတာ။ သူတို့ဘာမှ ပြန်မပြောလာဘူး” ဟု စိုင်းဆိုင်ဟုမ်၏ မိသားစုဝင် အမျိုးသမီး တစ်ဦးက ပြောသည်။
လက်ရှိအချိန်ထိ စိုင်းဆိုင်ဟုမ်ကို အဆက်အသွယ်မရသေးကြောင်း၊ မိသားစုဝင်များအနေဖြင့် စိုးရိမ်စိတ်ပူနေကြောင်း လည်း သိရသည်။
“သူ့အသက်က ၁၉ နှစ်ပဲရှိသေးတယ်။ သူ့အမေတော့ တော်တော်လေးစိတ်ပူနေတယ်။ သူ့သားကို မြန်မြန်တွေ့ချင်နေပြီ။ အဆက်အသွယ်လည်းမရတော့ သူ့အမေက နေ့တိုင်း ငိုနေတယ်။ စိတ်ကျရောဂါပါ ဖြစ်လာနိုင်တယ်” ဟု စိုင်းဆိုင်ဟုမ်နှင့် နီးစပ်သူ ဆွေမျိုးတစ်ဦးက ပြောသည်။
အဆိုပါ ကိစ္စနှင့် ပတ်သက်ပြီး သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) ပြောခွင့်ရ ဗိုလ်မှူး စိုင်းခမ်းစံက အသေးစိတ် မသိရှိရသေးကြောင်း ပြောသည်။
“ဒီကိစ္စနဲ့ ပတ်သက်ပြီးတော့ ကျနော်တို့ အသေးစိတ် မသိရသေးဘူး။ မြေပြင်သတင်းဖြစ်တဲ့အတွက်ကြောင့် ကျနော်တို့လည်း အသေးစိတ်မသိရသေးဘူး။ တကယ် ဖမ်းလား မဖမ်းလားလည်း မသိရသေးဘူး” ဟု ဗိုလ်မှူး စိုင်းခမ်းစံက သျှမ်းသံတော်ဆင့် ကို ပြောသည်။
စိုင်းဆိုင်ဟုမ်းသည် ယခင်က သျှမ်းပြည်တိုးတက်ရေးပါတီ (SSPP/SSA)တွင် ၅ လအကြာ တာဝန်ထမ်းဆောင်ခဲ့ဖူးသူ ဖြစ်ကြောင်း သိရသည်။
Leave a Comments