သျှမ်းပြည်မြို့တော် တောင်ကြီးမြို့သို့ တိမ်းရှောင်ရောက်ရှိလာသည့် စစ်ဘေးရှောင်များသည် တစ်ပတ်တစ်ခါ ဧည့်စာရင်း တိုင်ကြားနေရပြီး တစ်ကြိမ်လျှင် ကျပ်ငွေ သုံးထောင် (၃,၀၀၀) ပေးဆောင်နေရကြောင်း သတင်းရရှိသည်။

တောင်ကြီးမြို့သို့ တိမ်းရှောင်ရောက်ရှိနေသည့် စစ်ဘေးရှောင်များသည် ပြီးခဲ့သည့် ၂၀၂၃ ခုနှစ် နိုဝင်ဘာလတွင် စစ်ကော်မရှင်တပ်နှင့် ကရင်နီတော်လှန်ရေး တပ်ပေါင်းစုတို့ လွိုင်ကော်မြို့တွင် ဖြစ်ပွားခဲ့သည့် တိုက်ပွဲနှင့် ၂၀၂၃ ခုနှစ် အောက်တိုဘာလတွင် စစ်ကော်မရှင်တပ်နှင့် ညီနောင်မဟာမိတ်တပ်ကြား သျှမ်းပြည်မြောက်ပိုင်းတွင် ဖြစ်ပွားသည့် တိုက်ပွဲများကြောင့် ရောက်ရှိလာသူများ ဖြစ်သည်။

ထိုစစ်ဘေးရှောင်များအတွက် သီးသန့် စစ်ဘေးရှောင်စခန်းဟူ၍ သတ်သတ်မှတ်မှတ် မရှိသော်လည်း ၎င်းတို့သည် တောင်ကြီးမြို့ပေါ်နှင့် အနီးတဝိုက်တွင် နေအိမ်နှင့် အခန်း ငှားရမ်းပြီး နေထိုင်ရခြင်းကြောင့် တစ်ပတ်တစ်ခါ ဧည့်စာရင်းတိုင်ရခြင်းသည် ဝန်ထုပ်ဝန်ပိုး ဖြစ်စေကြောင်း စစ်ဘေးရှောင်များက ပြောသည်။

“တောင်ကြီးမှာ အိမ်ငှားနေတာ အဲ့ဒါကို တစ်ပတ်တစ်ခေါက် ဧည့်စာရင်း သွားတိုင်နေရတယ်၊ တစ်ခါတိုင်ရင် တစ်ယောက်ကို ငွေကျပ် (၃၀၀၀)ပေးခဲ့ရတယ်။ မိသားစု ၈ ယောက်လောက် ရှိရင် တစ်ပတ်ကို ၂၄၀၀၀ ပေးနေရတယ်၊ မတိုင်လို့လည်း မရဘူး။ သူတို့က ရဲတွေပါ ခေါ်လာမယ် ပြောလို့ မဖြစ်မနေ သွားတိုင်နေရတယ်”ဟု တောင်ကြီးမြို့ရောက် လွိုင်ကော်စစ်ဘေးရှောင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

စစ်ဘေးရှောင်များအနေဖြင့် ဧည့်စာရင်း တိုင်ကြားမှု မပြုလုပ်လျှင်လည်း စစ်ကော်မရှင်လက်အောက်ခံ ရပ်ကွက်အုပ်ချုပ်ရေးမှူးများက အိမ်တိုင်ရာရောက် ခြိမ်းခြောက်မှု ပြုလုပ်သကဲ့သို့ အိမ်ရှင်များကလည်း အိမ်ငှားရမ်းမှု မပေးတော့ကြောင်း သိရသည်။

ထို့အပြင် တောင်ကြီးမြို့တွင် ရပ်ကွက်အုပ်ချုပ်ရေးမှူးများက စစ်ရှောင်များကိုလည်း စစ်မှုထမ်းကြေးဟု ပြောဆိုကာ တစ်လလျှင် ကျပ်ငွေ သုံးသောင်း (၃၀၀၀၀)အထိ ထပ်မံ ကောက်ခံနေကြောင်း ကျောက်မဲမြို့ဘက်မှ တိမ်းရှောင်လာသည့် စစ်ရှောင်အမျိုးသားတစ်ဉီးက သျှမ်းသံတော်ဆင့်ကို ပြောသည်။

“စစ်မှုထမ်းကြေးကတော့ လတိုင်း ထည့်နေရတယ်၊ တစ်လနဲ့ တစ်လ ထည့်ရတာ မတူဘူး၊ တစ်ခါဆိုရင် နှစ်သောင်းကနေ သုံးသောင်းအထိ ထည့်ရတယ်”ဟု ၎င်းစစ်ရှောင် အမျိုးသားက ပြောဆိုသည်။

လက်ရှိတွင် သျှမ်းပြည်မြောက်ပိုင်း တကြောနှင့် ကရင်နီ(ကယား)ပြည်နယ် လွိုင်ကော်အနီးတဝိုက် စစ်ရေးငြိမ်သက်နေသော်လည်း စစ်ရှောင်အများစု နေအိမ်သည် လက်နက်ကြီးနှင့် လေကြောင်းဗုံးကြဲခံရမှုကြောင့် ထိခိုက်ပျက်စီးခဲ့ရသဖြင့် နေရပ်ပြန်နေရန် အဆင်မပြေကြောင်း ၎င်းအမျိုးသားက ဆက်ပြောသည်။

တောင်ကြီးမြို့တွင် လုံးချင်းအိမ်တစ်ထပ်လျှင် ငှားရမ်းခ ငွေကျပ် (၈)သိန်းအထိ ပေးနေရပြီး ဆန်တစ်ပြည်လျှင် ငွေကျပ် (၅၀၀၀)အထိ ရှိနေသောကြောင့် စစ်ရှောင်များအနေဖြင့် နေ့စားသမားများအဖြစ်သာ လုပ်ကိုင်ရပြီး ဝင်ငွေလောက်ငှမှု မရှိကြောင်း လွိုင်ကော်မြို့မှ စစ်ရှောင်လာသည့် အမျိုးသမီးက ထပ်လောင်းပြောသည်။

“ကျမတို့ စစ်ရှောင်တွေက ဒီမှာ ဘဝပြန်စရတာ။ နေ့စားလိုက်ရတာ နေ့တိုင်းလည်း မရသလို ဝင်ငွေလည်း နေ့တိုင်းမရှိဘူး။ ကုန်စျေးနှုန်းကလည်း တက်၊ အိမ်ငှားခလည်းတက်။ နောက် ဧည့်စာရင်း၊ စစ်မှုထမ်းကြေးတွေကလည်း ကောက်ဆိုတော့ ကျမတို့ ရှာသမျှ မလောက်ဘူး။ အိမ်အရမ်းပြန်ချင်တယ်” ဟု ၎င်းစစ်ရှောင်အမျိုးသမီးက သျှမ်းသံတော်ဆင့်ကို ပြောသည်။

လွိုင်ကော်မြို့မှ စစ်ဘေးတိမ်းရှောင်လာသည်မှာ ၂နှစ်ကျော်ပြီဖြစ်သောကြောင့် အလှူရှင်များလည်း နည်းပါးကာ အလုပ်အကိုင် အခွင့်အလမ်း နည်းပါး၍ နေ့စားအလုပ်သာ လုပ်ရပြီး တစ်နေ့လျှင် ငွေကျပ် တစ်သောင်းသာလျှင် ရရှိကြောင်း အဆိုပါ အမျိုးသမီးက ဆက်ပြောသည်။

လက်ရှိ တောင်ကြီးမြို့တွင် စက်သုံးဆီဈေးနှုန်း မြင့်တက်လာသည့်အပြင် ကုန်ဈေးနှုန်းများလည်း အဆမတန် မြင့်တက်လာသောကြောင့် အခြေခံလူတန်းစားများ အပါအဝင် စစ်ဘေးရှောင်များအတွက် စားဝတ်နေရေးနှင့် အလုပ်အကိုင် အခက်အခဲများ ကြုံတွေ့နေရသည်။