သျှမ်းပြည်တောင်ပိုင်း ရပ်စောက်မြို့နယ် နောင်ဝိုးကျေးရွာအုပ်စု ညဉ့်စဉ်ဘုန်းတော်ကြီးကျောင်းအတွင်း မြောက်ပိုင်းမဟာမိတ် နှင့် RCSS တို့ တိုက်ပွဲဖြစ်ပွားသည့်အတွက် ဆောက်လုပ်ဆဲ ဘုန်းကြီးကျောင်းများ လက်နက်ကြီးကျည်များ ထိခိုက်နေကြောင်း စုံစမ်းသိရှိရသည်။
ပြီးခဲ့သည့် ဇန်နဝါရီ (၄) ရက် ညနေ ၅ နာရီခန့်က နောင်ဝိုးကျေးရွာအုပ်စု ဆောက်လုပ်ဆဲ ညဉ့်စဉ် ဘုန်းတော်ကြီးကျောင်း အနီး တိုက်ပွဲဖြစ်ပွားခဲ့ပြီး ဒေသခံများ ဘုန်းကြီးကျောင်း အဟောင်းတွင်းသို့ ထွက်ပြေးတိမ်းရှောင်လာရကြောင်း စုံစမ်းသိရှိရသည်။
“ဆောက်လုပ်ဆဲ ကျောင်းသစ် နဲ့ ရွာက ၁၀ မိနစ်လောက်ပဲ ကွာမယ်။ ကျနော်တို့က ကျောင်းအဟောင်းမှာပဲ လာရောက် ခိုလှုံထားတယ်။ အဲ့နေ့တော့ ကျနော်တို့ ဒေသခံတွေ ဘုန်းကြီးကျောင်းမှာ တစ်ညလာအိပ်တယ်” ဟု နောင်ဝိုးဒေသခံ အမျိုးသား တစ်ဦး က သျှမ်းသံတော်ဆင့် ကိုပြောသည်။
တိုက်ပွဲဖြစ်ပွားချိန်တွင် ဘုန်းကြီးကျောင်းဟောင်းအနီး အလံ (၂၀) လောက် အကွာမှာ လက်နက်ကြီး ကျရောက် လာကြောင်း သိရှိရသည်။
“ကျောင်းအသစ် နဲ့ နောင်ဝိုးကြား တိုက်ပွဲတွေဖြစ်တယ်။ ကျေးရွာထဲ လက်နက်ကြီး ကျတာတော့ရှိတယ်။ ဒေသခံတွေလဲ စိုးရိမ်ထိတ်လန့်ပြီး ဘုန်းကြီးကျောင်းအဟောင်းမှာ လာနေတယ်။ အလံ ၂၀ လောက် အကွာလောက်မှာ လက်နက်ကြီး လာကျပြီး ပေါက်ကွဲသွားတာရှိတယ်။ထိခိုက်တဲ့သူတွေတော့မရှိဘူး” ဟု နောင်ဝိုးဒေသခံ အမည်မဖော်လိုသူ တစ်ဦး က သျှမ်းသံတော်ဆင့် ကိုပြောသည်။
ယနေ့ ဖေဖော်ဝါရီ (၈) ရက် မနက် (၁၀) နာရီခွဲတွင်လည်း ရပ်စောက်မြို့နယ် ကျောက်ဂူကျေးရွာအုပ်စုဘက် ကျေးရွာအနီး တိုင်းရင်းသားလက်နက်ကိုင် တိုက်ပွဲများဖြစ်ပွားခဲ့ကြောင်း သိရှိရသည်။
“ဒီနေ့ ၁၀ နာရီလောက်ကလဲ ကျောက်ဂူ အင်တောဘက်က ကျေးရွာအနီးတွေမှာ တိုက်ပွဲဖြစ်သေးတယ်လို့ကြားတယ်။ နာရီဝက်လောက်ရှိမယ်ထင်တယ်” ဟု အမည်မဖော်လိုသူ တစ်ဦး ကပြောသည်။
တိုင်းရင်းသားလက်နက်ကိုင် တိုက်ပွဲအချင်းချင်းကြောင့် စစ်ရှောင် (၄၀၀) ကျော်သည် သျှမ်းတောင် ရပ်စောက်မြို့နယ် ကျိုင်းခမ်းကျေးရွာအုပ်စုအတွင်းသို့ ပြောင်းရွေ့ခဲ့ရကြောင်း သိရှိရသည်။
Leave a Comments