သျှမ်းပြည်တောင်ပိုင်း ကျေးသီးမြို့နယ်အတွင်း အမျိုးသမီးတဦး ကားပေါ်တွင် လည်ပင်းညစ်သတ်ခံရကြောင်း စုံစမ်းသိရှိရသည်။
ဖြစ်စဉ်မှာ ဇန်နဝါရီ ၂၃ ရက်တွင် ထိုအမျိုးသမီးသည် ကျေးသီးမြို့နယ် ဟာဝမ်းကျေးရွာမှ ကားမောင်း ထွက်ခွာခဲ့ပြီးနောက် ကျေးသီးမြို့ အကျော် ၁ မိုင် အကွာတွင် သတ်ခံရတာဖြစ်ကြောင်း သိရသည်။
“ဘာကြောင့် သတ်ခံရတာလည်း မသိရဘူး။ ကျမတို့ သွားတွေ့ချိန်က သူက သေနေပြီ။ သူ့မှာ ဘာကိစ္စရှိတာလဲ မသိဘူး။ ကားပေါ်မှာပဲသေနေတာ။ လည်ပင်းနဲ့ ကျောကုန်းမှာက ညိုနေတယ်။ လည်ပင်းညစ်ခံရသလိုပဲ။ ဘာကြောင့် ဖြစ်တာလဲ အခုထိ ကျမတို့လည်း ဘာမှ မသိရသေးဘူး” ဟု သေဆုံးသွားသည့် အမျိုးသမီး၏ မိခင်က ပြောသည်။
ထိုသေဆုံးသွားသည့် အမျိုးသမီးသည် အသက် (၂၈)နှစ်အရွယ် ဟာဝမ်ကျေးရွာတွင် နေထိုင်သူဖြစ်ပြီး လက်ရှိအချိန်ထိ တရားခံ လွတ်မြောက်နေဆဲဖြစ်ကြောင်း သိရသည်။
“အခုချိန်ထိ သူ့ကို ဘယ်သူသတ်သွားလဲ မသိရသေးဘူး။ ရဲကို တိုင်ကြားလည်း ဘာမှ မရဘူး။ သူတို့ ဟိုနေ့ အလောင်းလာကြည့်တာတောင် စစ်ဆေးမှု မပြုလုပ်ဘူး။ ကျနော်တို့ အိမ်ပြန်ရောက်ပြီး သူ့အလောင်းကို ပြင်ပေးမှ သူ လည်ပင်းညစ်သတ်ခံရတာလို့ သိလိုက်ရတာ” ဟု ကျေးသီးမြို့နယ် ဒေသခံ အမျိုးသားတဦးက ပြောသည်။
အဆိုပါ အမျိုးသမီး သတ်ခံရသည့် ကိစ္စနှင့် ပတ်သက်ပြီး နီးစပ်သူများက လိုက်လံစုံစမ်းနေလျက်ရှိကြောင်း သိရသည်။
Leave a Comments